Ezekiel 20

¹ Kô sarina, thla pangawhna, cha thla noh hrawh noh liana chata, Izarel machâzy ahyzy tlyma ABEIPA a chhohia awpa ta a vy ei ta, ei hmiakô liata atyuh ei ta.

² ABEIPA bie cha ei hnohta vaw tlô ta:

³ “Chyhsa y, Izarel machâzy hnohta reih la, ama hnohta, Abeipa KHAZOHPA ta he tana heta a tah, na chhohia awpa ta a vypa ma nama châ? Nâmo a chhohiapa ta y aw va na, ei hro na, Abeipa KHAZOHPA ta a tah, tah teh.

⁴ Âmo pachia aw va chi ma, chyhsa y, âmo pachia aw va chi ma? Ama pawzy pasichhihnazy cha pahnosa teh,

⁵ ama hnohta, Abeipa KHAZOHPA chata he tana heta a tah: Izarel sahlao ei tly nota Zakaw chhôhkhazy atlypazy hnohta, ku pazawhpa tlaita Izi râh liata ama hnohta a pahnosapa ta ama hnohta, ei ku pazawhpa ta, kei he ABEIPA nama Khazohpa cha ei châ, tahpa ta.

⁶ Cha noh liata Izi râh tawhtapa chhihthapa ta ama châta râh ei pahawhpa, sâhpiti nata kheihti ta a lohpa râh, râh zydua liata a ngia chaipa liata chhihtha awpa ta ei ku ei pazawh no liana khata.

⁷ Ama hnohta: Chyhsa to ta nama mo ta hmôpa hmo pasichhihpa cha thy ula, Izi râh liata khazoh nohthlahpazy chata a papuapalei khah u; kei he ABEIPA nama Khazohpa cha ei châ na, tahpa ta reih na ta.

⁸ Châhrasala ei chô liata aty ei ta, na nahthlie leipa ei ta; chyhsa to ta ama mo ta hmôpa hmo pasichhihpazy chhao cha thy leipa ei ta, Izi râh khazoh nohthlahpazy cha a heisai hra veih ei. “Cha liana chata ama chô liata ei hiehâhna patlô awpa ta Izi râh chhôh liana tlai chata ama chô liata ei pathi-iana lei thlu aw khiahna maw tahpa ta pachâ na ta.

⁹ Châhrasala keima moh vâta tao na ta, ama yna phopizy mohmô liata Izi râh tawhta chhihthapa ta ama hnohta a pahnosa na ta, cha phopizy mohmô liana chata ei moh reipachhiepa ta a y lei nawpa ta

¹⁰ Chatanachata Izi râh puasai awpa ta tah haw na ta, râhpathohpa liata vaw chhihtha haw na ta.

¹¹ Ei bieraopazy cha âmo pie na ta, ei pachiana biezy cha pamosa na ta, cha cha chyhsa ta ama ngia khiahtala ama hro nawpa a châ.

¹² Cha leipa chhaota keima nata âmo likawhta pahnosana châ ta, ei pahânohzy cha âmo pie na ta, kei he ABEIPA âmo a pananotuhpa ei châ tahpa ama pahno thei nawpa ta.

¹³ Châhrasala Izarel chhôhkhazy cha râhpathohpa liana khata ei chô liata aty ei ta; ei bieraopazy cha a chhi leipa ei ta, ei pachiana biezy chyhsa ta taopa ta a hrona awpa cha thy ei ta; ei pahânohzy chhao thata parao ei ta. “Chatanachata râhpathohpa liata âmo pahleipadia awpa ta ei hiehâhna cha ama chô liata leithlu aw khiahna maw tah na ta.

¹⁴ Ei chhihtha nota a pahnotuhpazy phopi tlai mohmô liata paraopa ta a y lei nawpa ta ei moh vâta tlao ei tao haw.

¹⁵ Cha leipa chhaota râhpathohpa liana khata ei râh piepa, sâhpiti nata kheihti ta a lohpa râh, râh zydua liata a ngia chaipa liana chata chhihtha aw va na, ku pazawhpa tlaita tah na ta,

¹⁶ ei pachianazy khoh leipa ta, ei bieraopazy achhi leipa ta, ei pahâhnohzy ama paraopa vâta; ama pathipalôh chata ama khazoh nohthlahzy lâta khâchâ a heih tlôh ta.

¹⁷ Châhrasala pahleipadia lei awpa ta ei mokhaoh ta pahlôh ta, râhpathohpa liana khata ei pahleipadia khai leipa a châ.

¹⁸ “Chatawhcha râhpathohpa liana chata ama sawzy hnohta, nama pawzy bieraopa cha zyh leipa ula, ama pachianazy zyh leipa ula, ama khazoh nohthlahpazy chata a papuapalei hra khah u.

¹⁹ Kei he ABEIPA nama Khazohpa cha ei châ; ei bieraopazy zyh ula, ei pachiana biezy a vao ula, zyh hra teh u,

²⁰ ei pahânohzy za pachhihsa ula, kei nata nâmo likawh ta pahnosana châ aw ta, ABEIPA nama Khazohpa cha ei châ tahpa nama pahno theina a châ aw tah na ta.

²¹ Châhrasala ama sawzy cha ei chô liata aty ei ta; ei bieraopazy cha a chhih leipa ei ta, ei pachianazy chyhsa ta taopa ta a hrona awpa cha zyh awpa ta a vao hra veih ei, ei pahânohzy cha papuapalei haw ei ta. “Râhpathohpa liana khata ei hiehâhna patlô awpa ta âmo chô liata ei pathi-iana leithlu aw khiahna maw tah na ta.

²² Châhrasala ei ku a sohsi na ta, ei chhihtha nota a pahnotuhpazy phopi tlai mohmô liata papuapaleipa ta a y lei nawpa ta ei moh vâta tlao ei tao haw.

²³ Cha leipa chhao cha phopizy hry liata âmo papai na ta, râh to liata ei papai aw, râhpathohpa liana khata ku pazawhpa tlaita vaw tah na ta,

²⁴ ei pachianazy zyh leipa ei ta, ei bieraopazy khoh leipa ei ta, ei pahânohzy papuapalei ei ta, ama pawzy khazoh nohthlahpa lâta tlao amâ heihpa vâta.

²⁵ Cha leipa chhao cha bieraopa pha leipa cha pie na ta, ama hro lei nawpa ta bie pachiapazy chhaota;

²⁶ ama hmo topa chhi a pahytuapa maih mei liata ama thyna liana chata âmo papuapalei na ta, roryhrapa ta paysa na ta; a chhâna lâta ABEIPA cha ei châ tahpa ama pahno thei nawpa ta.

²⁷ “Chavâta chyhsa y, Izarel chhôhkhazy hnohta reih la, ama hnohta, Abeipa KHAZOHPA chata he tana heta a tah: Nama pawzy chata hezy liana heta eina reipachhie ei, ei chô liata paraona hmo ama taopazy liana heta.

²⁸ Ku pazawhpa tlaita âmo ei taipa râh liana heta ei vaw chhihtha nata, tlâh sâhpa nata thobuh laipa ama hmôpa maih liata, ama atheihnazy hlâ ei ta, ama hmohlâpa hiehâh chhih ngaitapazy cha pie ei ta; cha liana chhao chata ama rohpahâhpazy tao ei ta, ama dopa hmohlânazy cha patlai tlôh ei ta.

²⁹ Kei ta ama hnohta, asâhpa su nama siena tyhpazy he khâpa nama tahna a châ? tah na ta. Chatanachata â mo chata atanoh taihna heta Bamah* bipa ta a châ haw).

³⁰ Chatanachata Izarel chhôhkhazy hnohna chata reih la, Abeipa KHAZOHPA chata he tana heta a tah: Nama pawzy yzie lymâ hawhta nâmosasyh ta a papuapaleipa ta, ama pasichhihna lâpizy liana chata sihrypa ta nama y ma?

³¹ Nâmo hmo topa nama hlâ nata nama sawzy mei liata thy eichi ta, atanoh taihna heta nama khazoh nohthlahpa zyduazy chata a papuapalei vei eichi ma. Nâmo a chhohia awpa ma ei châ, hy Izarel chhôhkhazy saih u? Nâmo a chhohiapa ta y aw va na, ei hro na Abeipa KHAZOHPA ta a tah.

³² “Phopizy râh hropa chhôhkhazy hawhta tho nata alô a chhy awpa eima châ,’ nama pathipalôh ta nama tah tarawpa ta, cha chacheita aw veih eichi.

³³ Ku thatlôpa ta bâh pazawhpa chôta nata hiehâhna papuapa ta nâmo chô liata ei bei tlai aw, ei hro na Abeipa KHAZOHPA ta a tah.

³⁴ Phopizy hry tawhta cha chhihtha aw ei na ta, papaipa ta nama yna râhzy tawhtapa cha ku thatlôpa nata bâh pazawhpa nata hiehâhna papuapa ta ei cha pakhy aw ei;

³⁵ chyhsa hropazy râhpathohpa liata cha chhihtha aw ei na ta, cha liana chata hmia chhypa ta eima chho aw.

³⁶ Izi râh râhpathohpa liata nama pawzy ei chhopa hawh tlaita nâmo chhao ei cha chho aw ei, Abeipa KHAZOHPA ta a tah.

³⁷ Chôhchahrei ry liata cha pasia aw ei na ta, biehraina liata ei châ chhi aw ei.

³⁸ Nama hry tawhta atypazy nata ei chô liata a taopasituhpazy cha pathaisa aw na ta; ama yna râh tawhta chhihtha aw na ta, châhrasala Izarel râh liana chata angia chacheita aw veih ei. Chatanachata ABEIPA cha ei châ tahpa nama pahno aw.

³⁹ “Nâmo chhaota, hy Izarel chhôhkhapa saih u, Abeipa KHAZOHPA chata he tana heta a tah: Ei bie nama nahthlie vei khiahtala, atahmâ tawhta chhao nama khazoh nohthlahpa cha chakao chyu teh u; châhrasala ei moh pathaihpa cha nama hmopiepazy nata nama khazoh nohthlahpazy ta papuapalei chachei khao aw veih ei.

⁴⁰ “Ei tlâh pathaihpa, Izarel tlâh sâhpa liata, cha liana chata Izarel chhôhkhapa zydua chata ama zydua ta cha râh liana chata eina chakao aw ei; cha liana chata âmo ei ly aw, cha liana chata nama hmohlapazy, nama atheihna thei hmiatuapazy, nama hmopiepa zydua ei khoh aw.

⁴¹ Phopizy hry tawhta ei cha chhihtha tita nata, râh to ta namâ paihna tawhta ei cha pahmaohpakhy ti ei ta cha, rohpahâhpa chata châ py aw ei na ta; phopizy mohmô liana chata nâmo liana heta ei pathaihzie a lâ aw, Abeipa KHAZOHPA chata a tah.

⁴² Chatawhcha Izarel râh ku pazawhpa tlaita nama pawzy piepa ei taipa râh liana chata ei cha chhihtha ti ei ta cha, ABEIPA cha ei châ tahpa nama pahno aw.

⁴³ Cha liana chata nama yzie zy nata nama hmotaopa nama papuapaleipa zydua cha nama pahno aw; chatanachata nama hmopha leipa taopa zydua vâna khata nama mohmô tlai liata nama pasi aw.

⁴⁴ Chatawhcha nama yzie pha leipazy hawhta châ hra leipa ta, nama hmotao pualeipazy hawhta châ hra leipa ta, keima moh ta nama chôta ei tao tita cha, Hy Izarel chhôhkhapa saih u, ABEIPA cha ei châ tahpa nama pahno aw, Abeipa KHAZOHPA ta a tah,” tahpa ta.

⁴⁵ Chatawhcha ABEIPA bie cha ei hnohta vaw tlô ta:

⁴⁶ “Chyhsa y, chho la hmia chhypa ta, chho la aheihpa ta, na bie chho la, Neke râhhmâhpa liata chhochhielie teh;

⁴⁷ Neke râhhmâhpa liana chata ABEIPA bie he nahthlie teh: Abeipa KHAZOHPA chata he tana heta a tah: Nâma liata mei patih aw na ta, nâma liata tho hrohpa zydua cha kâ khai aw ta, tho raohpa maih chhao; mei paleih a duah ngâpa liata pachhai aw vei, chho lâ tawhta maw lâ taihta hmia zydua cha kâpa ta a y aw.

⁴⁸ Chyhsa zydua ta kei ABEIPA he mei a papuatuhpa ei châ tahpa hmô aw ei ta; pachhai aw veih ei, a tah na, tah teh,” tah ta.

⁴⁹ Chatanachata keima chata, “Hy Abeipa KHAZOHPA y! Âmo ta ei hnohta, ‘Khazohpa bie ta vei ma a reih?’ tah tlôh aw ei ta,” tah na ta.