Puasaina 40

¹ ABEIPA ta Mawsi hnohta,

² “A thla khana noh kha noh liana chata ahmaopakhyna poh-o achhyna byureih cha na padua awpa a châ.

³ A chhôh liana chata biepahnosana zy na soh awpa châ ta, chatawhcha Byh cha poh-raipa ta na pakhâ awpa a châ.

⁴ Chatawhcha tlâhkhai kha a ngiakheipa ta a chô liata hmo a ypazy cha a siapata na soh awpa a châ; meiôh sona kha a ngiakheipa ta a meiôzy na soh awpa a châ.

⁵ Chatawhcha rao awpa ropahâhpa raona ngôh maisâh kha Biepahnosana Byh hmiakô liata sopa ta achhyna byureih chhikao poh-raipa kha na rai awpa a châ.

⁶ Raopa ta hlâna maisâh kha ahmaopakhyna poh-o achhyna byureih chhikao hmiakô liata na patyu awpa a châ,

⁷ chatawhcha ahmaopakhyna poh-o nata maisâh likawh liana chata rahô patyupata, cha liana chata ti na soh awpa a châ.

⁸ Chatawhcha achhyna byureih padôpa ta a dôhpachhôh tlyhmia taopa ta, a dôhpachhôh tlyhmia chhikao poh-raipa cha na rai awpa a châ.

⁹ Chatawhcha sathaw a thupa lapata achhyna byureih nata a chhôh liata a ypa zydua cha hniapa ta na pathai awpa a châ, a hmobaoh zydua chhaota; chatanachata a vaw pathaih aw.

¹⁰ Raopata hlâna maisâh nata a hmobaoh zydua cha sathaw hniapa ta maisâh cha na pathai awpa a châ; chatanachata maisâh cha a pathaih ngaitapa a châ aw.

¹¹ Rahô nata a patyuna cha sathaw hniapata na pathai awpa a châ.

¹² Chatawhcha Arawna sawchapawpazy cha ahmaopakhyna poh-o chhikao thaby liata a vaw chhipa ta ti ta na pasi awpa a châ,

¹³ Arawna cha chysia pathaihpazy na pakysa awpa a châ, chatanachata theihthaipa rai hriapa ta ei châta a chakao thei nawpata sathaw thupata na panano awpa a châ.

¹⁴ A sawchapawpazy chhao a vaw chhipata, viahpakao na paky awpa a châ,

¹⁵ chatanachata theihthaipa rai hriapa ta ei châta ama chakao thei nawpa ta, ama paw sathaw na thupa hawhna khata âmo cha sathaw na thu awpa a châ; sathaw thupata ama ypa he ama pathlazy taih chhaota chhâzaw ta theihthaipa châta raopa ama châ ha aw tahpa, ama châta pahnona a châ aw,” tahpa ta reih ta.

¹⁶ Cha hawhna chata Mawsi ta tao ta; ABEIPA ta tao awpata bie a piepa zydua hawhna chata tao khai ta.

¹⁷ A kô nona thla hmiatua chaipa thla, noh kha noh liana chata achhyna byureih cha padua haw ei ta.

¹⁸ Mawsi chata achhyna byureih cha padua ta; a patyunazy paryh ta, a thophia paryhpazy cha padua ta, a tlâhzy cha chahrao ta, a tôhzy cha padua ta;

¹⁹ achhyna byureih chô liana chata poh-o rai ta, cha poh-o chô cha a khuna ta khu heih ta, ABEIPA ta Mawsi bie a piepa hawhna khata.

²⁰ Chatawhcha bie pahnosana cha la ta, Byh chhôh liata soh ta, Byh liana chata a lâ zy hrei ta, Byh chô liana chata zawngiana dyuchhai soh ta;

²¹ chatawhcha Byh cha achhyna byureih chhôh liana chata soh ta, a pakhona poh-raipa cha rai ta, Biepahnosana Byh cha pakhâh ta; ABEIPA ta Mawsi bie a piepa hawhna khata.

²² Chatawhcha tlâhkhai cha ahmaopakhyna poh-o chhôh, achhyna byureih maw lâchhâh poh-raipa khôtho lâna chata patyuh ta,

²³ tlâhkhai liana chata ABEIPA hmiakô ta viahchhâ cha a siapata soh ta; ABEIPA ta Mawsi bie a piepa hawhna khata.

²⁴ Chatawhcha meiôh sona cha ahmaopakhyna poh-o chhôh, achhyna byureih chhôh lâchhâh tlâhkhai dady liana chata soh ta,

²⁵ chatawhcha meiôhzy cha Abeipa hmiakô ta soh ta; ABEIPA ta Mawsi bie a piepa hawhna khata.

²⁶ Chatawhcha ngôh maisâh cha ahmaopakhyna poh-o chhôh, poh-raipa hmiakô liata soh ta,

²⁷ a chô liana chata khâpaleipa rohpahâh ngaitapa rao awpa rohpahâhpa rao ta; ABEIPA ta Mawsi bie a piepa hawhna khata.

²⁸ Chatawhcha achhyna byureih chhikao poh­raipa rai ta.

²⁹ Chatawhcha ahmaopakhyna poh-o achhyna byureih chhikao hmiakô liana chata, raopata hlâna maisâh patyu ta, a chô liana chata raopa ta hlâpa nata hlâpa hlâ ta; ABEIPA ta Mawsi bie a piepa hawhna khata.

³⁰ Chatawhcha rahô cha ahmaopakhyna poh-o nata maisâh likawh liana chata patyuh ta, a sina awpata ti patlai ta,

³¹ Mawsi nata Arawna nata a sawchapawpazy chata cha liana chata ama ku nata ama pheizy a si ei ta; ahmaopakhyna poh-o liata amâ ngia chy ta nata maisâh thaby lâta ama vaw chy ta amâ si; ABEIPA ta Mawsi bie a piepa hawhna khata.

³³ Chatawhcha achhyna byureih nata maisâh padôpata dôhpachhôh tlyhmia tao ta, a dôhpachhôh tlyhmia chhikao poh-raipa cha rai ta. Chatanachata Mawsi ta raihria cha paloh ha ta.

³⁴ Chatanachata ahmaopakhyna poh-o cha ameih ta pahly ta achhyna byureih cha ABEIPA rôhnahna ta vaw bie haw ta.

³⁵ Chatawhcha cha hawhta ameih a vaw chhohpa ta ABEIPA rôhnahna ta achhyna byureih cha a vaw bie hawpa vâta Mawsi cha ahmaopakhyna poh-o chhôh liana cha a ngia thei leipata.

³⁶ Ameih chata achhyna byureih cha a paisai patanahta Izarel pathlazy cha a pasie lymâ ei ta, ama siena awpa lâta ama sie chhôh zydua chata;

³⁷ ameih chata a paisai leipa khiahta deikua cha a paisai hlâ lei cha a pasie leipa ta ama y thlâh ha tyh.

³⁸ Nohchhô ta ABEIPA ameih cha achhyna byureih chô liata a chhoh ta, cha liana chata zâ ta mei vaw y tyh ta, Izarel sahlao zydua chata ama siena awpa lâta ama sie chhôh zydua chata, cha cha ama hmô lymâ tyh.