2 Samuel 9

¹ Davi chata, “Zawnatha vâta ngiachhiena ei palâsa thei nawpa ta Sawla chhôhkha zy hry liata chyhsa ama y vâ ma i?” tah ta.

² Sawla chhôhkha zy chakaotuhpa pakha a moh Ziba y ta, Davi lâta vawh awpa ta aw ei ta; abeipa chata a hnohta, “Ziba na châ ma?” tah ta. Ano chata, “Ei châ na, kei na chakaotuhpa he,” tah ta.

³ Abeipa chata, “Khazohpa ngiachhiena ei palâsa thei nawpa ta Sawla chhôhkha zy hry liata chyhsa y veih ei tlyma?” tah ta. Ziba chata abeipa hnohta, “Zawnatha sawchapawpa pakha y ta; a phei chhao a sy pâ ngyu,” tah ta.

⁴ Abeipa chata a hnohta, “Khataih liata e a y?” tah ta. Ziba chata abeipa hnohta, “Lôdeba liata Amiel sawchapawpa Makhia o liata a y,” tah ta.

⁵ Cha tanachata Abei Davi chata chyhsa tua ta, Lôdeba tawhta Amiel sawchapawpa Makhia o liatahpa cha kei palasa ta.

⁶ Sawla saw Zawnatha sawchapawpa Mephibôse cha Davi lâta a vy ta, a hmia lâta pao ta, a naoh ta. Davi chata, “Mephibôse!” tah ta. Ano chata, “Moh tua, na chakaotuhpa hih,” tah ta a chhy ta.

⁷ Chatawhcha Davi chata a hnohta, “Chi khâ; na paw Zawnatha vâta cha ngiachhie tlai aw na ta, na mahpaw Sawla râh zydua cha pahneisa heih aw na ta; ei tlâhkhai liata pati na dôh tyh aw,” tah ta.

⁸ Chatawhcha a naoh ta, “Kei a thi ruapa hawhpa, na chakaotuhpa he, khâpa châta ma na pachâ tly?” tah ta.

⁹ Chatanachata abeipa chata Sawla chakaotuhpa Ziba cha aw ta, a hnohta, “Sawla hmo zydua nata a chhôhkha zydua hmozy cha na zibeipa sawchapawpa he ei pie khai haw.

¹⁰ Chatawhcha ano châta alei palie aw chi ta, nâma nata na sawchapawpa zy nata na chakaotuhpa zy chhaota, na zibeipa sawchapawpa châta nipa zy a hnei thei nawpa ta na hria chiehpa zy cha vaw cheih aw chi ta; na zibeipa sawchapawpa Mephibôse deikua chata ei tlâhkhai liata pati a dôh tyh aw,” tah ta. Ziba chata sawchapawpa pahrawhleipangawh nata chakaotuhpa syno hnei ta.

¹¹ Chatanachata Ziba chata abeipa hnohta, “Ei beipa, ei zibeipa ta a chakaotuhpa bie a piepa lymâ hawhta na chakaotuhpa heta a tao aw,” tah ta. Chavâta Mephibôse cha Davi tlâhkhai liata abeipa sawchapawpa hawh hra ta pati a dôh tyh.

¹² Mephibôse chata sawchapawpa hawtipa hnei ta, a moh cha Mikha a châ. Chatawhcha Ziba o liata a pahrâpa zydua cha Mephibôse chakaotuhpa châ ei ta.

¹³ Chatanachata Mephibôse cha abeipa tlâhkhai liata pati a dôh tyhpa vâta Zerusale liata pahrâ ta. A phei karâ no a zypa a châ.