2 Samuel 11

¹ Kô a vaw thaona liata, abeizy adyuh awpa ta ama pua tyhna daihti nona chata Davi ta Zôaba cha tuah ta, a chyhsa zy nata Izarel mo zydua chhaota; Amawna pathlazy cha pahleipadia ei ta, Raba khih khô ei ta, Davi deikua cha Zerusale liata y ta.

² Zâ lâta a rakhô tawhtapa Davi cha thyu ta, abei o chô lâta vawh ta, o chô tawhna chata chanô pakha a ngai a sipa kei hmô ta; cha chanô cha chhithai ngaitapa a châ.

³ Davi chata chyhsa tuah ta, cha chanô thâtih cha a siapa ta pahiahrisa ta. Chatawhcha chyhsa ta, “Eliama sawchanônô Basheba, Hiti chyhsa Uriah lahpinô châ vei ma?” tah ei ta.

⁴ Chatawhcha Davi chata chyhsa tuah ta, a vaw chhi haw ei ta; a vaw tlô nahta a ziakhei haw ta. (A thaitly leina tawhta pathaipa châ ta.) Chatawhcha a o lâ a di haw heih ta.

⁵ Chatanachata chanô cha saw phaoh haw ta, “Saw ei phaoh haw,” tahpa ta Davi cha pachhosa ta.

⁶ Chatawhcha Davi chata Zôaba hnohta, “Hiti chyhsa Uriah cha kei lâta pavysa teh,” tahpa ta bie tah ta. Chatawhcha Zôaba chata Uriah cha Davi lâta pavawsa ta.

⁷ Uriah cha Davi kô a kei tlô nahta Zôaba nata chyhsa zy cha khâpa ma ama lyu, adyuhna liata kheihta ma ama chhi châ? tahpa ta hiahri ta.

⁸ Chatawhcha Davi chata Uriah hnohta, “Na o lâ a di la, na pheizy vâ si teh,” tah ta. Chatanachata Uriah cha abei o tawhtapa cha pua ta, chatawhcha abeipa chata niepa zy papiesa ta.

⁹ Châhrasala Uriah cha a zibeipa chakaotuhpa sahlao zy hry liata abei o chhi thaby liana chata a rie thlâh ha hra ta, a o lâna chata a di leipa ta.’

¹⁰ Chatawhcha Davi cha, “Uriah cha a o lâ a di vei,’ tahpa ta ama chho pata nahta, Davi ta Uriah hnohta, ”Khitlyna lâ tawhta vaw tlô va chi ma? Khazia na o lâ nâ di vei?’ tah ta.

¹¹ Chatawhcha Uriah chata Davi hnohta, “Khazohpa Byh zy, Izarel zy nata Zudah zy cha byureih liata y ei ta; ei zibeipa Zôaba nata ei zibeipa chyhsa zy lyurâhpa liata a rie ei ta; khazia ei o lâta a di na ta, dôpa ta ei lahpinô hnohta ei zia aw? Na hrona nata na thlahpa hrona reipa ta ei reih, cha cha tao cheita aw vana,” tah ta.

¹² Chatawhcha Davi chata Uriah hnohta, “Atanoh chhao he liata y la, mylâ sie lavâh chi,” tah ta. Chatanachata Uriah cha Zerusale liata cha noh nata a mylâpa chhao cha y ta.

¹³ Chatawhcha Davi chata aw ta, a hmiakô liata nie ta, doh ta, pariesa haw ta; chatawhcha zâ lâta a o lâ a di leipa ta a zibeipa chakaotuhpa zy hry liata a rie awpa ta pua ta.

¹⁴ A mylâ my chata Davi ta Zôaba châ paphao ta, Uriah châ pacheisa ta.

¹⁵ Chatawhcha cha liana chata, ”Uriah cha chariah chahra chaina liata hmia pasah ula, thiepa ta a thi hana hâh ta, a hnôh lâ a sy sai teh u,” tahpa ta roh ta.

¹⁶ Chatawhcha Zôaba ta khih cha a chadô nona chata, chyhsa riahphapa yna ta a pahnopa liana chata Uriah cha pachhâhsa ta.

¹⁷ Chatawhcha khih liata chyhsa zy cha pua ei ta. Zôaba cha adyuh ei ta, chyhsa thokha Davi chyhsa zy hry liatahpa tlai cha thie ei ta. Chatawhcha Hiti chyhsa Uriah chhao thi ta.

¹⁸ Chatanachata Zôaba chata chyhsa tuah ta, adyuhna kyh lâ zydua cha Davi chho ta;

¹⁹ a chyhsa tuapa hnohna chata, “He THÂTIHZY he na chho khai tawhta abeipa cha hiehâhpa ta,

²⁰ ‘Khazia e a dyuh awpa ta cha hawhta khih kiapâh ta liata nama sie? Kuh tawhta ama cha ka aw tahpa ta pahno veih eichi mâ?

²¹ Zerubese sawchapawpa Abimele kha, ahy e a thie? Sâh charona alô chô lâ tahpa chanô ta kuh tawhta a chô liata za pathla ta, Thebe liana khata thi vei mâ? Khazia e, cha hawhta kuh kiapâh ta lâta nama sie? a tah khiahtala, ‘Na chakaotuhpa Hiti chyhsa Uriah chhao kha a thi haw,’ tah mah y,” tahpa ta chho ta.

²² Chatanachata a chyhsa tuapa cha sie haw ta, kei tlô ta, Zôaba ta a tua chhâna zydua cha Davi chho ta.

²³ Chatawhcha a chyhsa tuapa chata Davi hnohta, “Chyhsa zy chata maniah vaw sie hnao ei ta, sibiepa su liata maniah a vaw dyuh ei ta, keimo ta ama khih angiana ochhi taihta tôh pi ta.

²⁴ Chatawhcha a katuhpa zy chata kuh tawhta na chakaotuhpa zy cha ka ei ta; chatanachata abeipa chakaotuhpa thokha zy thi ei ta; na chakaotuhpa Hiti chyhsa Uriah chhao kha a thi haw,” tah ta.

²⁵ Davi chata a chyhsa tuapa hnohna chata, “Zôaba hnohta he tana heta kei reih teh, ‘Hezy heta na palôhrupa aly leipa ta cha paysa hlei kha se, zaozi chata ahyhmah ta panano tlôh va; thapi ta khih cha adyuh ula, parao teh u,’ tahpa ta pasyu teh,” tah ta.

²⁶ Chatawhcha Uriah lahpinô chata a vahpa Uriah a thi tahpa a thei nahta a vahpa mâchhiesa ta.

²⁷ Chatawhcha a mâchhiesana a pai nahta Davi chata a o lâta palasa ta, a lahpinô ta hnei haw ta, sawchapawpa sapa ta. Châhrasala Davi hmotaopa chata ABEIPA palôh palysa leipa ta.