Theihthaina 17

¹ ABEIPA ta Mawsi hnohta.

² Arawna nata a sawchapawpazy nata Izarel pathla zydua chho la, ama hnohta, he he ABEIPA biepiepa cha a châ,

³ Izarel chhôhkha hry liata chyhsa ahyrai viahchao tôhpa tlyma, mietahkupa taw tlyma, mie tlyma, ariena su tlyma, ariena su khôtho lâ tlyma liata thiepata.

⁴ ABEIPA achhyna byureih hmiakô liata ABEIPA châta hmohlâpa ta, ahmaohpakhyna poh-o chhikao liata a vaw cheih leipa maih, cha chyhsa cha thisaih palopa ta pachâpa a châ aw; thisaih a palopa tlai châ ta; cha chyhsa cha a chiheizy hry tawhta pathluapa ta a y awpa a châ.

⁵ Cha cha Izarel pathlazy ta ama atheihnazy, lyurâhpa liata ama atheihnazy cha vaw cheipa ta, ABEIPA châta tlaita ahmaohpakhyna poh-o chhikao liata theihthaipa lâta vaw cheipa ta ABEIPA châta adyhna hlâna atheihna ta amâ theih nawpa ta a châ.

⁶ theihthaipa ta ahmaohpakhyna poh-o chhikao liata maisâh cha thisaih chata hie aw ta, a thaw cha ABEIPA châta rohpahâh ngaitapa ta a rao awpa châ ta.

⁷ Amâ phei tyhnapa mie tôhpa lâna chata amâ theihnazy amâ theig awpa châ vei tahpa he, he he ama pathlazy taihta, ama chhâzaw ryhpa awpa a châ.

⁸ Chatawhcha ama hnohta, Izarel chhôhkha hryta chyhsa rai tlyma, râh hropa chyhsa ama hry liata a ypazy ta tlyma, raopa hlâna tlyma, atheihna tlyma hlâpata.

⁹ ABEIPA lâta a theih awpa ta ahmaohpakhyna poh-o chhikao liata a vaw cheih leipa ama y khiahtala, cha chyhsa cha a chiheizy hry tawhtapa pathluapa ta a y awpa a châ.

¹⁰ Ahyrai Izarel chhôhkha hry liatahpa chyhsa tlyma, râh hropa chyhsa ama hryta a ypa tlyma, khâpa thisaih rai a niepa maih cha, cha thisaih a nietuhpa chô liana chata ei hiehâh aw ta, a chiheizy hry tawhtapa pathluapa ta ei paysa aw.

¹¹ Sapa hrona cha thisaih liana chata y tlôh ta; nama hrona châta aryhna taona awpa ta maisâh chô liata ei cha pie ei; hrona châta aryhna taona cha thisaih tlai châ tlôh ta.

¹² Chavâta Izarel pathlazy hnohta, ahyhmah ta thisaih nama nie awpa châ leipa ta, râh hropa chyhsa nama hryta a ypazy chhaota, thisaih ama nie awpa châ hra vei, ei tah.

¹³ Izarel pathlazy hry tahpa chyhsa tlyma, râh hropa chyhsa ama hryta a ypa tlyma, râh a khiepa ta sa tlyma, pavaw tlyma nie theipa chi a vaw phaoh khiahtala, a thisaih cha palo aw ta, doh lei ta a khu awpa a châ.

¹⁴ Sapa zydua hrona kyh liata a thisaih nata a hrona cha miakhasai a châ; chavâta Izarel pathlazy hnohta khâpa sa thisaih hmahta nama nie awpa châ vei, sapa zydua hrona cha a thisaih cha châ tlôh ta; ahyrai a niepa maih cha pathluapa ta a y awpa a châ.

¹⁵ Chatawhcha ano kho ta a thipa tlyma, sa taipa tlyma a niepa maih cha, cha râh liatahpa chyhsa tlyma, râh hropa chyhsa tlyma rai châ sala, ama pohzy pasu aw ei ta, ti liata ama ngai amâ si awpa châ ta, zâlâ taihta pathaih leipa châ aw ei ta; cha khai tawhna chata ama pathaih aw.

¹⁶ Pasu leipa ta, ama ngai amâ si vei chhochhi khiahtala ama paraona maoh cha ama phaoh aw, ei tah, tah teh,” tahpa ta chho ta.