Zoel 3

¹ “Cha nohzy liata nata cha daihti liana chata Zudah nata Zerusale zy sei ta ama ypa cha ei pakua tina chata,

² phopi zydua pakhy aw na ta, âmo cha Zehôsapha saikao lâta chhihtha aw na ta, ei râh pachhaipa ta phopizy hry liata ama papaihpa, ei chyhsazy nata ei ryuto Izarelzy châna chata âmo cha cha liana chata pachia aw na ta,

³ chatawhcha ei chyhsazy chata pachao ei ta, sihrypa mâ chata pachao ei ta, sihrypa ma châta chapaw hawti pie ei ta, kresawti ama doh thei nawpa ta, ama châta chanô hawti zuah ei ta.

⁴ “Hy Tyre, Sidaw nata Philistina râh zydua saih u, kei châta khâpa ma nama châ tly? Viari ma eina thô eichi? Viari eina thô khiah eichi ta la, a chatlie ngaitapa ta a parah ngaitapa ta nama viarithôna cha nama luh chô tlai liata ei chathô hra aw ei.

⁵ Ei tâkâri nata ei ngôh la eichi ta, ei hmopha ngaitapa khochhihpazy nama chhyna-o chhôh lâta zy cheih bao hra eichi ta.

⁶ Zudah sawzy nata Zerusale sawzy chhao ama râhri tawhta lâhlapi ta nama pasie thei nawpa ta, Krika sawchapawpazy lâta zuah tlôh eichi ta.

⁷ Nama zuana su tawhna khata pathyupa ta papua aw na ta, nama viarithôna cha nama luh chô tlai liata ei thô hra aw.

⁸ Nama sawchapawzy nama sawchanôzy cha Zudah sawzy ku liata ei zuah aw, âmo chata phopi lâhlapi lâta Sabia mozy lâta âmo zuah aw ei ta; ABEIPA chata reih haw tlôh ta,” tah ta.

¹⁰ “Nama leipaliena hmao pazaohpazy zaozi lâta daih ula, nama theilâpa kô tainazy cha a sei lâta daih teh u; chyhsa chieh leipa chhaota, “Thatlôpa ei châ,” tah mawh sy.

¹¹ A chheipâh liata phopi zydua saih u, a parah ula, a vy ula pôhpakhy teh u. Hy ABEIPA y, cha liana chata na chyhsa thatlô ngaitapazy pasiesa teh.

¹² Phopizy cha a pathyu ei sala, Zehôsapha saikao liana chata a khy ei se; cha liana chata a chheipâh liata phopi zydua chô liata pachia awpa ta ei tyuh aw.

¹³ Nama savâ phia ula, sâh hria a daih haw tlôh ta. A vy ula, tly teh u; kre saona khaoh cha bie ta. Beihzy cha khô ta; ama moleina cha hluh ngaita tlôh ta.

¹⁴ Zawpi hluhpi kalihpi topa ta ei padiana saikao liata y ei ta! Cha saikao liata ABEIPA pachiana noh cha a hnia haw tlôh ta.

¹⁵ Noh nata thlâpâ zy zoh ei ta, awhsizy ta ama khaihna nyu ei ta.

¹⁶ ABEIPA cha Zaio tawhna chata a rôh ngâ aw ta, Zerusale tawhta a ao papua aw ta, avâzy nata alei a chalyu aw ei ta. Châhrasala ABEIPA chyhsazy chata a pabohna châ aw ta, Izarel pathlazy châta kuh a châ aw.

¹⁷ “Chatanachata ABEIPA nama Khazohpa ei châ tahpa nama pahno aw, ei tlâh pathaihpa Zaio liata ei pahrâ ha aw. Chatanachata Zerusale cha khihpi pathaihpa châ aw ta, khichhaipa ahy hmahta chapia khao aw veih ei.

¹⁸ “Cha noh liana chata tlâh sâhpazy chata krezô ta pahly khai aw ta, tlâhzy liana cha sahrohzy hmô ha aw eichi ta, Zudah râh vatie zydua cha tizy ta loh aw ta; ABEIPA o tawhta tikhaoh vaw palih aw ta, Shiti saikao cha ti a vaw châ aw.

¹⁹ “Zudah sawzy chô liata nôchhie ngaitapa ta taopa ta ama râh liata athaipa thisaih ama palopa vâta, Izi râh cha roryhrapa ta y aw ta, Edôma râh cha râhpathohpa râh chawhkaraipa a châ aw.

²⁰ Zudah râh deikua cha chhâzaw ta pahrâpa ta y thlâh ha aw ta, Zerusale cha chhâ zydua taihta.

²¹ Ama thisaih ei pathai leipa cha pathai aw na ta, ABEIPA cha Zaio liata pahrâ thlâh ha tlôh ta,” tah ta.