Puasaina 34

¹ ABEIPA ta Mawsi hnohta, “Alô phia miano hmia lâ tahpa hawhta khaih teh; alô phia liana chata hmialâta na pakei hawpa alô phia liata bie a chohpa hawhna kha ei roh heih aw na.

² Mylâ my ta ama chhua lâ, chatawhcha mylâ chata Sinai Tlâh liata a khy la, tlah laki liata ei hmiakô liata a vaw duah mah y.

³ Na hnohta ahyhmah ta a khy kha ei se, tlâh liata rai ahyhmah ta â lâ rai ta a kaw lâ cha chei kha ei se; mietahkupa zawzy nata viahchao zawzy chhao, tlâh liana chata a lao bâ hra kha se,” tah ta.

⁴ Chatanachata Mawsi cha alô phia miano, hmialâtahpa hawhta khaih ta; Mawsi cha mydi ta thyu ta, ABEIPA ta bie a piepa hawhta Sinai Tlâh lâna chata khy ta, alô phia miano cheih ta.

⁵ Chatawhcha ABEIPA cha meihdo liana chata a zu ta, a kiahpâh liata a kei duah ta, ABEIPA moh cha phuah haw ta.

⁶ ABEIPA chata a hmiakô lâna chata sie pakhô ta, “ABEIPA cha, ABEIPA cha, Khazohpa kyhpachâna ta a biepa, chyhsa ngiachhie thei ngaitap, pathi nai ngaitapa, nônaipa nata bie hmeiseihpa a hnei hluhpa,

⁷ chyhsa sâh hlhpi chô liata ngiachhiena a palâsa tyhpa, taopasiana nata paraonazy, molei hmo paraonazy a ngiahthai tyhpa, thai leipa ta a raopazy, a papua thlâh ha beih leipa, pawzy hmoparaona vâta sawzy nata chhâ hluhpi chhâ thôhna nata chhâ palihna taih chhao ta a hrie tyhpa cha,” tahpa ta phuah haw ta.

⁸ Chatanachata Mawsi cha, a lei lâ a luh a bôh parah ta, a chhy ta.

⁹ Ano chata, “Atahmâ he, na mo dypa ei châ khiahtala, hy ABEIPA, ABEIPA cha eima hnohta ngiachhiepa ta sie hra mawh sy, phopi chhoru ngaitapa châ tlôh ei ta, chatanachata eima paraona nata eima moleina a ngiahthai la, na ryu to awpa châta maniah hnei mah y,” tah ta.

¹⁰ ABEIPA chata, “Pachâ teh, bie ei hraih hih. Khizaw zydua nata ahy pho hry liata hmahta tao beih leipa, na chyhsa zydua mohmô liata hmonoâhpa ei tao aw; chatanachata na kiapâh liata a ypa sahlao zydua heta, ABEIPA hmo taopa ama hmô aw; na châta ei tao awpa hmo he rarôy ngaitapa châ tlôh aw ta.

¹¹ “Atanoh ta bie ei cha piepa he a pyh teh, na hmiakô liana chata Amawri mo zy, Kana mo zy, Hiti mo zy, Periza mo zy, Hivi mo zy, Zebu mo zy chhao ei papua aw.

¹² A chado teh; chatanachata na siena awpa râh liata a pahrâpazy hnohta bie hrai aw chi ta, nama hry liana heta khohei a vaw châ pathlei aw na.

¹³ Anodeikuacha ama maisâhzy cha nama parao khai awpa châ ta, ama lôbôzy cha pakei khaipa ta, ama Aherahzy cha nama thlu khai awpa a châ,

¹⁴ khazoh hropa rai cha namâ chhy awpa châ leipa ta, ABEIPA cha a moh rai chhao Hiatlia a hmâhpa châ ta, Khazohpa hiatlia a hmâhpa châ tlôh ta,

¹⁵ chata leipa ta cha, cha râh liata chyhsazy hnohna chata bie hrai aw chi ta, ama khazohzy liata a phei aw ei ta, ama khazohzy hnohta a theih aw ei ta, ama cha vaw hrua nahta, amâ theihna cha nama nie pathlei aw na,

¹⁶ chatawhcha ama sawchapawpazy chata ama sawchanôzy hneipa ta, ama sawchanôzy cha ama khazohzy liata a phei aw ei ta, nama sawchapawzy chhao ama khazohzy liata ama papheisa pathlei aw na.

¹⁷ “Nohthla leipa khazohzy cha na tao awpa châ vei.

¹⁸ “Viahchhâ thinô a hlao leipa kyhchhina na tao awpa a châ. Bie ei cha piepa hawhna khata, noh sari chhôh cha viahchhâ thinô pahlao leipa Abi thla liata daihti raopa liana khata na nie awpa a châ; Abi thla liana khata, Izi râh tawhta na vaw puapa châ tlôh ta.

¹⁹ Chhi a pahy tua chaipa maih cha ei châta a châ, chatawhcha na sahroh chapawpa zydua viahchao tôhpa nata mietahkupa tôhpa a patawh tua chaipazy chhao

²⁰ Alâ a patawh tua chaipa cha, mietahkupa taw ta na chatlai awpa a châ, na chatlai khoh vei khiahta cha a rao nâ thli awpa a châ. Na sawchapawpa a pih tuapa zydua cha na chatlai awpa a châ. Chatawhcha ei hmiakô liata ahyrai ku ruapa ta namâ vy awpa châ vei.

²¹ “Noh charu chhôhta rai na hria awpa châ ta, a noh sari noh deikua cha alei palie hai no nata sâh hria nota chhao na pahâ awpa a châ.

²² Noh sari nohzy kyhchhi sa a daih tuapa kyhchhi cha, kô vaw lei ta sâh pakhy khai tawhta peitla kyhchhi chhao nm hnei awpa a châ.

²³ Na chapaw zydua cha kô khata ei thôh ABEIPA KHazohpa, Izarelzy Khazohpa hmiakô liana chata ama vaw la tyh awp a châ.

²⁴ Na hmiakô liata phopi to papuapa ta na râhrizy cha pakawh tlôh na ta, kô khata ei thôh ABEIPA na Khazohpa hmiakô liat a lâ awpa ta nâ khy tina chata, ahyhmah ta na râh he uava aw veih ei.

²⁵ “Kei châta atheihna sa thisaih cha viahchhâ thinô pahlaopa nata na vaw hlâ awpa châ vei; Zawpakhô kyhchhi a theihna chhao cha, a mylâ taihta paysa awp châ hra vei.

²⁶ Na lyu liata chicheipa a daih tua chaipa cha ABEIPA na Khazohpa o liata na vaw soh awpa a châ. Mie taw sa a panô sâhpiti ta na chho awpa châ vei,” tah ta.

²⁷ ABEIPA ta Mawsi hnohta, “He biezy he roh teh; he biezy heta na hnohta nata Izarelzy hnohta bie ei hraihpa cha a châ,” tah ta.

²⁸ Cha liana chata ABEIPA hnohta noh sypalih nata zâ sypalih y ta; pati rai nie leipa ta, ti chhao doh hra vei. Chatawhcha alô phiapa lianazy chata biehraina biehrawh piepazy cha roh hra ta.

²⁹ Mawsi cha bie pahnosana lô phipu mino cha a ku ta chbapa ta Sinai Tlâh tawhtapa cha za chô ta, tlâh tawhtapa a chô nah chata, Mawsi cha, cha hawhta bie mâ chhopa vâna chata, a hmia vo cha a vaw khaih haw tahpa pahno chachei leipa ta.

³⁰ Arawna nata Izarel pathla zydua ta Mawsi ama hmô nahta, a hmia vo cha vaw khaih ta, a hnia ngâh leipa ei ta.

³¹ Châhrasala Mawsi ta âmo sahlao cha aw ta; chatawhcha Arawna nata pahmaohpakhypa sahlao ryureituhpa zydua cha, ano lâta vaw kua heih ei ta, chatawhcha Mawsi ta âmo sahlao cha bie a chho ta.

³² Cha hnôh lâna chata Izarel pathla zydua cha a vaw hnia ei ta, Sinai Tlâh liata ABEIPA nata bie amâ chhopa zydua cha bie piepa ta chho pachhuah ta.

³³ Chatawhcha Mawsi ta âmo cha a chho khai nata a hmia cha hmia khuna ta a khu ha ta;

³⁴ anodeikuacha Mawsi ABEIPA bie a chho awpa ta a hmiakô liata a ngia ti maihna chata, a pua heih hlâ lei ta cha, hmia khuna cha pahluh tyh ta; chatawhcha vaw pua heih ta,

³⁵ Izarel pathlazy chata Mawsi hmia cha moh ei ta, Mawsi hmia vo cha vaw khaih tyh ta, Mawsi cha Khazohpa bie a chho awpa ta a ngia heih hlâta cha hmia khuna khuna chata a hmia khu heih tyh ta.