154. CAPUT III.

1. ET Angelo in Sardibus Ecclesiae scribe: Haec dicit habens septem spiritus Dei, et septem stellas: novi tua opera, quod nomen habeas quod vivas, et mortuus es.

2. Esto vigilans, et confirma reliqua quae moritura; non enim inveni tua opera plena coram Deo.

3. Memento igitur quomodo acceperis et audiveris, et observa et resipisce; si ergo non vigilaveris, venam super te tanquam fur, et nescies qua hora Veniam super te.

4. Habes pauca nomina etiam in Sardibus, quae non inquinaverunt Vestimenta sua, et ambulabunt Mecum in albis, quia digni sunt.

5. Vincens induetur vestimentis albis; et non delebo nomen ejus e libro vitae; et confitebor nomen ejus coram Patre Meo et coram angelis Ejus.

6. Habens aurem audiat quid Spiritus dicit Ecclesiis.

7. Et Angelo in Philadelphia Ecclesiae scribe: Haec dicit Sanctus Verus, habens clavem Davidis, aperiens et nemo claudit, ac claudens et nemo aperit.

8. Novi tua opera; ecce dedi coram te ostium apertum, et nemo potest claudere illud, quia parvam habes potentiam, et observasti Meum Verbum, et non negasti Nomen Meum.

9. Ecce dabo ex synagoga satanae, dicentes se ipsos Judaeos esse, et non Sunt, sed mentiuntur; ecce faciam ut illi veniant et adorent ad pedes tuos, et Sciant quod Ego dilexi te.

10. Quia servasti verbum tolerantiae Meae, et Ego te servabo ab hora tentationis futurae venire super Orbem universum, explorare habitantes super terra.

11. Ecce Venio cito; retine quod habes, ut nemo accipiat coronam tuam.

12. Vincentem faciam columnam in Templo Dei Mei, et foras non egredietur amplius, et scribam Super illum Nomen Dei Mei, et nomen urbis Dei Mei. Novae Hierosolymae, quae descendit e Caelo a Deo Meo, et Nomen Meum novum.

13. Habens aurem audiat quid Spiritus dicit Ecclesiis.

14. Et Angelo Ecclesiae Laodicensium scribe: Haec dicit Amen, Testis fidelis et Verus, Principium opificii Dei.

15. Novi tua opera, quod nec frigidus (sis) nec calidus; utinam frigidus esses aut calidus.

16. Itaque quia tepidus es, et nec frigidus nec calidus, futurum est ut te evomam ex Ore Meo.

17. Quod dicas quod dives sim, et locupletatus, et nullius opus habeam, et non scis quod tu sis aerumnosus et miser et pauper et caecus et nudus.

18. Suadeo tibi emere a Me aurum exploratum igne, ut ditatus sis, et vestimenta alba ut induaris, ne appareat pudor nuditatis tuae, et collyrio inungas oculos tuos, ut Videas.

19. Ego quoscunque amo, arguo et castigo; zelo age ergo, et resipisce.

20. Ecce sto ad januam et pulso; si quis audiverit vocem Meam, et aperuerit ostium, intrabo ad illum, et caenabo cum illo et ille Mecum.

21. Vincenti dabo sedere Mecum in Throno Meo, sicut Ego vici, et sedeo cum Patre in Throno Ejus.

22. Habens aurem audiat quid Spiritus dicit Ecclesiis.

SENSUS SPIRITUALIS.

CONTENTUM TOTIUS CAPITIS.

AGITUR DE ILLIS IN CHRISTIANO ORBE,

QUI SUNT IN CULTU MORTUO, QUI EST ABSQUE CHARITATE ET FIDE, QUI DESCRIBUNTUR PER ECCLESIAM IN SARDIBUS (154-171);

DE ILLIS QUI IN VERIS EX BONO A DOMINO SUNT, QUI DESCRIBUNTUR PER ECCLESIAM IN PHILADELPHIA (172-197);

DE ILLIS QUI ALTERNATIM CREDUNT EX SE, ET ALTERNATIM EX VERBO, ET SIC SANCTA PROPHANANT, QUI DESCRIBUNTUR PER ECCLESIAM IN LAODICEA (198-223).

ETIAM HI ET ILLI VOCANTUR AD NOVAM DOMINI ECCLESIAM.

CONTENTA SINGULORUM VERSUUM.

1. "Angelo in Sardibus Ecclesiae scribe," significat ad illos et de illis, qui in cultu mortuo sunt, seu in cultu qui (est) absque bonis quae charitatis sunt et absque veris quae fidei (154); "Haec dicit habens septem spiritus Dei, et septem stellas," significat Dominum a Quo omnes veritates, et omnes cognitiones boni et veri (155); "novi tua opera," significat Quod Dominus videat omnia interiora et exteriora illorum simul (156); "quod nomen habeas quod vivas, et mortuus es," significat quod videatur et credatur ab ipsis et ab aliis, quod spiritualiter vivi sint, cum tamen spiritualiter mortui sunt (157).

2. "Esto vigilans," significat ut in veris (sint,) et in vita secundum illa (158); "confirma reliqua quae moritura," significat illa quae cultus eorum sunt, vitam accipiant (159); "non enim inveni tua opera plena coram Deo," significat quod interiora cultus eorum non conjuncta sint Domino (160).

3. "Memento igitur quomodo acceperis et audiveris," significat ut cogitent quod omnis cultus in principio sit naturalis, et postea per vera fiat spiritualis, praeter plura (161); "et observa et resipisce," significat ut attendant ad illa, et cultum suum mortuum vivificent (162); "si ergo non vigilaveris," significat hic ut supra (163); "veniam super te ut fur, et nescies qua hora veniam super te," significat quod auferentur illa quae cultus sunt, et quod hoc nescietur quando et quomodo (164).

4. "Habes pauca nomina etiam in Sardibus," significat quod inter illos etiam sint qui in cultu suo vitam habent (165); "quae ¹ non inquinaverunt vestimenta sua." significat qui in veris sunt, et non per mala vitae et inde falsa, conspurcaverunt cultum (166); "et ambulabunt Mecum in albis, (quia digni sunt,)" significat quod victuri sint cum Domino, quia in veris sunt ab Ipso (167).

5. "Vincens induetur vestimentis albis," significat quod qui reformatur fiat spiritualis (168); "et non delebo nomen ejus e ¹ libro vitae," significat quod salvabitur (169); "et confitebor nomen ejus coram Patre et coram angelis Ejus," significat quod recipiendi sint qui in Divino Bono et in Divinis veris a Domino sunt (170).

6. "Habens aurem audiat quid Spiritus dicit Ecclesiis," significat hic ut prius (171).

7. "Et Angelo in Philadelphia Ecclesiae scribe," significat ad illos et de illis, qui in veris ex bono a Domino sunt (172); "Haec dicit Sanctus Verus," significat Dominum quoad Divinum Verum (173); "habens clavem Davidis, et aperiens et nemo claudit, et claudens et nemo aperit," significat Cui soli est Omnipotentia salvandi (174).

8. "Novi tua opera," significat hic ut supra (175); "ecce dedi coram te ostium apertum," significat quod illis qui in veris ex bono a Domino sunt, Caelum apertum sit (176); "et nemo potest claudere illud," significat quod Infernum non praevaleat contra illos (177); "quia parvam habes potentiam," significat quia sciunt quod nihil valeant ex se ipsis (178); "et observasti Meum verbum," significat quia vivunt secundum praecepta Domini in Ipsius Verbo (179); "et non negasti Nomen Meum," significat quod sint in cultu Domini (180).

9. "Et dabo ex synagoga satanae," significat illos qui in falsis quoad doctrinam sunt (181); "dicentium se ipsos Judaeos esse, et non sunt, sed mentiuntur," significat qui dicunt quod apud illos Ecclesia sit, et tamen non est (182); "ecce faciam ut illi veniant et adorent ad pedes tuos," significat quod multi qui in falsis quoad doctrinam sunt, recepturi sint vera Novae Ecclesiae (183); "et sciant quod Ego delexi te," significat quod visuri quod amentur et recipiantur in Caelum a Domino (184).

10. "Quia servasti verbum tolerantiae Meae," significat quia pugnaverunt contra mala (185); "et Ego te servabo ab hora tentationis futurae venire super Orbem universum, explorare habitantes super terra," significat quoad tutandi et servandi dic ultimi judicii (186).

11. "Ecce venio cito," significat Adventum Domini (187); "retine ¹ quod habes," significat ut in veris et bonis suis interea permaneant (188); "ut ² nemo accipiat coronam tuam," significat ne pereat sapientia, ex qua felicitas aeterna (289).

12. "Vincens," significat qui in veris ex bono persistunt (190); faciam illum columnam in templo Dei Mei," significat quod vera ex bono a Domino, apud quos sunt, sustentent Ecclesiam (191); "et foras non egredietur amplius," significat quod ibi mansuri sint in aeternum (192); "et scribam super illum Nomen Dei Mei," significat quod cordibus illorum inscriptum erit Divinum Verum (193); "et nomen urbis Dei Mei, Novae Hierosolymae," significat quod cordibus inscripta erit doctrina Novae Ecclesiae (194); "quae descendit e Caelo a Deo Meo," significat quae erit ex Divino vero Domini quale est in Caelo (195); "et Nomen Meum novum," significat cultum solius Domini, cum novis quae in priore Ecclesia non fuerunt (196).

13. "Habens aurem audiat quid Spiritus dicit Ecclesiis," significat hic ut prius (197).

14. "Et Angelo Ecclesiae Laodicensium scribe," significat ad illos et de illis in Ecclesia, qui alternatim credunt ex se et alternatim ex Verbo, et sic sancta prophanant (198); "Haec dicit Amen, Testis fidelis et verus," significat Dominum quoad Verbum, quod est Divinum Verum ab ipso (199); "principium opificii Dei," significat Verbum (200).

15. "Novi opera tua," significat hic ut prius (201); "quod nec frigidus sis nec calidus," significat quod qui tales sunt, nunc negent quod Verbum Divinum et Sanctum sit, et nunc agnoscant (202); "utinam frigidus esses aut calidus," significat quod praestet ut vel ex corde negent sancta Verbi et Ecclesiae, vel ex corde agnoscant illa (203).

16. "Itaque quia tepidus es, et non frigidus nec calidus, futurum est ut te evomam ex ore Meo," significat prophanationem et separationem a Domino (204).

17. "Quod dicas quod dives et locupletatus sim," significat quod credant se cognitiones boni et veri, quae Caeli et Ecclesiae sunt, possidere in omni copia (206); "et nullius opus habeam,"

significat quod non plug sapere opus habeant (207); "et non scis, quod tu sis aerumnosus," significat quod omnia quae de illis sciunt, ne hilum cohaereant (208); "et miser et pauper," significat quod absque intellectu veri et voluntate boni sint (209)(; "et caecus et nudus," significat quod sint absque intellectu veri et voluntate boni) (210).

18. "Suadeo tibi emere a Me aurum exploratum igne ut ditatus sis," significat admonitionem ut comparent sibi a Domino per Verbum bonum amoris ut sapiant (221); "et vestimenta alba ut induaris," significat ut comparent sibi genuina vera sapientiae (212); "ne appareat pudor nudatis tuae," significat ne prophanetur et adulteretur bonum amoris caelestis (223); "et collyrio inunge oculos ut videas," significat ut sanetur intellectus (214).

19. "Ego quoscunque amo, arguo et castigo." significat quod quia tunc amantur, non possunt aliter quam immitti in tentationes (215); "zelo ergo age et resipisce," significat ut fiat hoc ex affectione veri (216).

20. "Ecce sto ad januam et pulso," significat quod Dominus unicuique praesens sit in Verbo, ac ibi instet quod recipiendus (sit), ac doceat quomodo (217); "si quis audiverit vocem Meam et aperuerit (ostium)," significat qui credit Verbo et vivit secundum illud (218); "intrabo ad illum, et caenabo cum illo et ille Mecum," significat quod Dominus conjungat Se illis et illos Sibi (219).

21. "Vincenti[," significat qui in conjunctione cum Domino sunt per vitam secundum praecepta Ipsius in Verbo (220); "dabo sedere Mecum in throno Meo," significat quod illis erit conjunctio Domini in Caelo (222); "sicut Ego vici et sedeo cum Patre in Throno Ipsius," significat sicut Ipse et Pater unum sunt et Caelum sunt (222).

22. "Habens aurem audiat quid Spiritus dicit Ecclesiis," significat hic ut prius (223).

EXPLICATIO. (Vers. 1.) "Et Angelo in Sardibus Ecclesiae scribe," significat ad illos et de illis, qui in cultu mortuo sunt, seu in cultu qui est absque bonis quae charitatis sunt et absque veris quae fidei. - Quod illi qui in eo cultu sunt, per "Ecclesiam in Sardibus" intelligantur, patet a scriptis ad illam in Sensu spirituali intellectis. Per cultum mortuum intelligitur solus cultus, qui est, quod frequentent templa, audiant praedicationes, obeant sacram Caenam, legant Verbum et libros pietatis, loquantur de Deo, de Caelo et Inferno, de vita post mortem, imprimis de pietate, orent mane et vesperi, et usque non desiderant scire vera fidei, nec volunt facere bona charitatis, credentes quod illis per solum cultum sit salus; cum tamen cultus absque veris, et absque vita secundum illa, est modo externum signum charitatis et fidei, intra quod possunt latere omnis generis mala et falsa, si non charitas et fides insunt: harum est genuinus cultus; alioquin est cultus sicut cutis aut superficies alicujus fructus, intra quam latet caro putris et vermicularis, qui fructus est mortuus. Quod talis cultus hodie in Ecclesia sit regnans, notum est.

Сноски: