Malureina 15

¹ ABEIPA ta Mawsi chho ta.

² “Izarei pathlazy chho la, ama hnohta, nama pahrâ nawpa râh ei cha piepa nama tlô tita.

³ ABEIPA lâta mei ta hmohlâpa raopa hlâna tlyma, bietai patlô awpa ta atheihna tlyma, âmo lôhthai ta hlâpa tlyma, nama kyhchhi raopa liata tlyma, sahroh zaw hry liatahpa tlyma. mietahkupa zaw hry liatahpa tlyma ta, ABEIPA châta rohpahâhpa tao awpa tlyma ta, nama hlâ tita cha.

⁴ ABEIPA lâta a hmohlâpa a hlâtuhpa maihta niepa hlâna viahdie di ngaitapa liatahpa ephah su hrawh ta pachhaih ta su kha, sathaw hin su palih ta pachhaih ta su kha ta nypa a hlâ awpa a châ.

⁵ chatawhcha dopa hlâna ta kresawti hin su palih ta pachhaih ta su kha raopa hlâna tlyma, atheihna tlyma ta, mietahkupa taw maihta nâ chhuahdy awpa a châ.

⁶ Mietahkupa tôhpa liana chata niepa hlâna viahdie di ngaitapa ephah su hrawh ta pachhaih ta su no, sathaw hin su thôh ta pachhaih ta su kha ta nypa nama chhuahdy awpa a châ.

⁷ chatawhcha dopa hlâna ta ABEIPA châta rohpahâhpa ta kresawti hin su thôh ta pachhaih ta su kha nama hlâ awpa a châ.

⁸ Raopa hlâna tlyma, bietai patlô awpa ta atheihna ta tlyma, ABEIPA lâta adyhna hlâna ta tlyma ta viahchao tôhpa namâ chhuahdy tita cha.

⁹ viahchao tôhpa hlâ nona chata niepa hlâna viahdie di ngaitapa ephah su hrawh ta pachhaih ta su thôh, sathaw hin khophie ta nypa nama hlâ awpa a châ.

¹⁰ dopa hlâna ta kresawti hin khophie ABEIPA châta rohpahâhpa mei ta hmohlâpa nama hlâ awpa a châ.

¹¹ Cha hawhna chata viahchao tôhpa zy, mietahkupa tôhpa zy, mie taw zy maihta tao awpa a châ.

¹² Ama hluhnazie lymâ hawhta a chhuahdy aw eichi ta, ama hluhna zie lymâ hawhna chata nama tao awpa a châ.

¹³ Cha râh liata a pihpa zydua chata he hawhna lymâ heta, ABEIPA châta rohpahâhpa mei ta hmohlâpa ama tao awpa a châ.

¹⁴ Pho hropa chyhsa nama hnohta a y tyhpa tlyma, ahyrai nama chhâzy liata nama hnohta a y lymâ awpazy tlyma chata ABEIPA châta rohpahâhpa mei ta hmohlâpa a hlâ khohpa maih chata nama taonazie hawh tlaita ama tao hra awpa a châ.

¹⁵ Nama pathlazy taih chata zawpizy nata pho hropa nama hnohta a ypazy châta chhao ryhpa miakha dei a y awpa a châ; ABEIPA hmiakô liata pho hropazy cha nâmo hawh tlaita ama châ aw.

¹⁶ Nâmo châta nata nama hnohta pho hropa a ypazy châta ryhpa su kha nata taonazie su kha deita a y aw, tah teh,” tahpa ta.

¹⁷ ABEIPA ta Mawsi chho ta.

¹⁸ “Izarel pathlazy chho la, ama hnohta, ei cha chhi nawpa râh nama kei tlô nahta.

¹⁹ cha râh viahchhâ nama nie tina chata ABEIPA lâta chaluahna hlâna nama hlâ awpa a châ.

²⁰ Nama viahchhâ ny tua chaipa hry liatahpa tlâ kha cha chaluahna hlâna ta nama hlâ awpa a châ; sawhri liatahpa chaluahna hlâna ta nama chaluahpa hawhta nama chaluah awpa a châ.

²¹ Nama pathlazy taihta nama viahchhâ ny tua chaipa cha ABEIPA lâta chaluahpa hlâna châta nama hlâ lymâ awpa a châ.

²² “He biepiepa zydua ABEIPA ta Mawsi hnohta a reipa.

²³ ABEIPA bie a pie tua no tawhta nama pathlazy taih chata, Mawsi hmâpa ta bie a cha piepa zydua ei he, a pyh leipa ta nama parao khiahtala.

²⁴ pôhpakhypa sahlao ta pahno leipa ta tao pathleipa a châ khiahtala, pôhpakhypa sahlao zydua châta raopa hlâna ABEIPA châta rohpahâhpa ta viahchao tôh dawpa pô kha hlâ aw ei ta, a yzie tyhpa hawhta, niepa hlâna nata dopa hlâna chhaota, molei atheihna châta mie tôhpa pô kha ama hlâ hra awpa a châ.

²⁵ Chatawhcha theihthaipa ta Izarel pathla pôhpakhypa zydua châta aryhna tao aw ta, angiahthaipa ama châ aw; tao pathleipa a châpa vâta nata ama hmohlâpa ABEIPA châta mei ta hmohlâpa nata ama paraona vyuhpa ta molei atheihna ama hlâ hawpa vâta.

²⁶ Izarel pathla pôhpakhypa zydua cha angiahthaipa châ aw ei ta, ama hryta pho hropa a ypazy chhao, zawpi zydua ta ama tao pathleipa a châpa vâta.

²⁷ “Chyhsa ta pahno leipa ta hmo a a parao khiahtala, molei atheihna châta mie panô pô kha kô khapa, a hlâ awpa a châ.

²⁸ Pahno leipa ta ABEIPA hmiakô liata a paraotuhpa châna châta theihthaipa ta aryhna a tao awpa a châ; chatanachata angiahthaipa a châ aw.

²⁹ Pahno leipa ta a paraotuhpa chata Izarel pathla cha râh liata a pihpazy châta nata pho hropa ama hryta a ypazy châta chhao ryhpa miakha nama hnei awpa a châ.

³⁰ Anodeikuacha a palaipa vâta a taopa a châ khiahtala, cha râh liata a pihpa tlyma, pho hropa tlyma rai châ sala, ABEIPA reipachhiepa châ ta, cha chyhsa cha a chiheihzy hry tawhtapa pathlua awpa a châ.

³¹ ABEIPA bie cha nawhtaw ta, a biepiepa cha a paraopa vâta, cha chyhsa cha pathlua awpa châ ta; a hmoparaona maoh cha a phao aw, tah teh,” tahpa ta.

³² Izarel pathlazy râhpathohpa liata ama y nona chata chyhsa pakha pahânoh ta tho a pakhypa he hmô ei ta.

³³ A tho pakhypa a hmôtuhpazy chata Mawsi nata Arawna nata zawpi sahlao hnohna chata a vaw chhi ei ta.

³⁴ Kheihta tao awpa ma tahpa phuah leipa a châpa vâta patâhna o liata khô ei ta.

³⁵ ABEIPA ta Mawsi hnohta, “Cha chyhsa cha thie thlyu awpa a châ; ariena su khôtho lâ zawpi zydua chata alô ta ama vawh awpa a châ,” tah ta.

³⁶ ABEIPA ta Mawsi bie a piepa hawhna chata zawpi zydua chata ariena su khôtho lâ a chhi ei ta, alô ta vawh sao haw ei ta.

³⁷ ABEIPA ta Mawsi chho ta.

³⁸ “Izarel pathlazy hnohta, ama pathlazy taihta ama poh pawhmao liata a pai pangiapa tao awpa nata a pawhmao to pai pangiapa liata a nohpa soh awpa ta tao teh.

³⁹ cha pai pangiapa cha moh tyhpa ta, ABEIPA biepiepa zydua a theipa ta nama zyh nawpa nata sihrypa ta nama y tyhpa hawhta nama pathipalôh kho viapa nata nama mo pahâh pasapa a chadaipa ta nama y lei nawpa nat.

⁴⁰ ei biepiepa zydua cha a thei thlâhpa ta, zyhpa ta, nama Khazohpa châta nama pathaih thei nawpa ta a châ.

⁴¹ Nama Khazohpa châ awpa ta Izi râh tawhtapa cha chhihthatuhpa ei, ABEIPA nama Khazohpa ei châ: Kei he ABEIPA nama Khazohpa ei châ,” tahpa ta.