Mathai 8

¹ Zisu tlâh tawhtapa cha a zu nahta, zawpi a hluhpi ta ano zi ei ta,

² aphawhpa pakha a hnohta a vy ta, “Pâpuh, na kho khiahta cha eina pathaisa thei chi na,” tahpa ta a naoh ta.

³ Zisu a ku pazawh ta, hria ta, “Ei khoh-na; pathaihpa ta y teh,” tah ta. Chatawhcha sôkhata aphawhpa cha pathaih ha ta.

⁴ Zisu ta a hnohta, “Ahy hmahta chho khâ; anodeikuacha sie la, theihthaipa hnohta a kei pamosa la, Mawsi ta hmo pie awpa a raopa kha hiah teh, ama pahnopasiana awpa ta,” tah ta.

⁵ Zisu Kapynia khih a vaw ngia nahta, pheisaih zakha hyutuhpa a vy ta,

⁶ “Pâpuh, ei sei sypa ta o liata pachârôh ngaitapa ta a zia thlâh haw,” tahpa ta a haw chaimâh ta.

⁷ Zisu chata a hnohta, “A vy aw na ta, ei patlâhsa aw,” tah ta.

⁸ Pheisaih zakha hyutuhpa chata, “Pâpuh, ei o chhôh nâ ngiana tlâh châ vei; châhrasala bie pie la, ei sei cha a tlâh thlâh ha aw na.

⁹ Kei chhao chyhsa ryta ypa châ na ta, ei ry ta pheisaihzy y ei ta; chyhsa hnohta, ‘Sie la’, tah na ta, sie ta, chyhsa hropa hnohta, ‘A vy teh,’ tah na ta, a vy tyh. Ei sei hnohta chhao, ‘He he tao teh,’ tah na ta, a tao tyh,” tahpa ta a chhy ta.

¹⁰ Zisu ta cha bie cha a thei nahta, a noâh ngaita ta, a zituhpazy hnohna chata, “Hmeihseihta ta, ei cha chho ei chuh. Izarel hry liata ahy hmahta he tluta a ngiapâpa he hmô va na.

¹¹ Ei cha chho ei chuh, nochhi nata notla tawhta chyhsa hluhpi a vy aw ei ta, vârâh Khihnarâh liana chata Abaraha zy, Aisika zy, Zakaw zy hnohta atyuh aw ei ta,

¹² Khihnarâh sawzy deikua khôtho lâ zohna liata papuapa ta y aw ei ta; cha liana chata cha nata hârie a y aw,” tah ta.

¹³ Zisu ta pheisaih zakha hyutuhpa hnohna chata, “Sie thlâh ha teh; nâ ngiapâna hawhta na chôta vaw tlô se,” tah ta. Chatanachata a sei cha cha dawh liana tlai chata a vaw tlâ haw.

¹⁴ Zisu Pity o liata a ngia nahta, a pihnô chasipa ta a ziapa hmô ta;

¹⁵ a ku ta hria ta, a chasipa cha pai ta; ano chakaopâ ha ta.

¹⁶ Zâlâ a vaw châ nahta, ahripa ta patupazy a hluhpi a vaw chhi ei ta; bie ta ahripazy cha papua ta, tlâh leipa zydua cha patlâhsa ta.

¹⁷ Hrohsopa Isai ta, “Ano ta eima chiehleinazy la ta, eima pasanazy phaoh ta,” tahpa ta a reipa cha a vaw tlô theina awpa ta.

¹⁸ Zisu ta zawpi hluhpi a kiapâh ta a hmô nahta, haosâ lâ chaka awpa ta biepie ta.

¹⁹ Ryhpa pachutuhpa pakha a hnohta a vy ta, “Pachutuhpa, na siena lâ maih ta ei cha zi aw,” tah ta.

²⁰ Zisu ta a hnohta, “Sihâzy ta khaoh hnei ei ta, pavawzy chhaota bu hnei ei ta, Chyhsa Sawchapawpa deikua cha a luh nyuna hnei vei,” tah ta.

²¹ A pachupazy hryta a hropa ta, “Pâpuh, ei paw pabu tua awpa ta na pasiesa tua teh,” tah ta.

²² Châhrasala Zisu ta a hnohta, “Na zi teh, athihpazy ta âmo athihpazy a pabu ei se,” tah ta.

²³ Zisu balyh liata a kiah nahta, a pachupazy chata ano zi ei ta.

²⁴ Sôkhata tipo liana chata thlihpipa thata vaw pathli ta, ama balyh cha ti chalâparâpa ta thata su ta; ano deikua cha a mô thlâh ha ta.

²⁵ A pachupazy a vy ei ta pahra ei ta, “Abeipa, miah pachha teh, eima leidia hih,” tah ei ta.

²⁶ Ano chata ama hnohta, “Angiapâ chyhpa saih u, khazia nama chi?” tah ta. Cha khai nah chata thyu ta thlihzy nata tipo cha ra ta; si dia ha ta,

²⁷ Chyhsazy cha ama noâh kaw ta, “He chyhsa he kheihawhpa chyhsa e a châ, thlihzy nata tipo chhaota a bie amâ ngiahpa he,” tah ei ta.

²⁸ Zisu haosâ lâ Kadarene mo râh liata a tlô nahta, ahripa patupa pano, thlâ tawhta vaw puapa ta a vaw tyh ei ta, ahrâh ngâsâ ei ta, cha lâthlôh liana cha ahy hmahta sie ngâh veih ei.

²⁹ Âmo chata, “Khazohpa Sawchapawpa, keimo liata khâpa tao awpa ma na khoh? Noh taipa tlô hlâta maniah taola awpa ta nâ vy mâ?” tahpa ta awh ei ta.

³⁰ Âmo yna tawhta a hla kawpa liata vao zaw a hluhpi ama lao chuah ei ta.

³¹ Ahripazy chata, “Maniah na papua khiahtala, vao zaw chhôh liatazy maniah pasiesa mah y.” tahpa ta a haw ei ta.

³² Ano chata ama hnohta, “Sie teh u,” tah ta. Chatawhcha vaw pua ei ta, sie ei ta, vao chhôh liata a ngia ei ta; vao zaw zydua cha tilaipi kiah lâta a râpa ta, ti liata tla sao khai haw ei ta.

³³ A vaihtuhpazy cha a râ ei ta, khihpi lâna chata sie ei ta, ato zydua chho haw ei ta, ahripa patupazy chô liata hmo a vaw tlôpazy chhao cha.

³⁴ Chatawhcha a khihpi ta Zisu dy awpa ta vaw pua ei ta; ano ama hmô pata nahta, ama râhri puasai awpa ta a haw chaimâh ei ta.;