Zawhana 2

¹ Noh thôh noh ta Kalili râh liata Kena khih liana cha ahneina y ta, cha liana chata Zisu nô a y;

² Zisu nata a pachupazy chhao ahneina a hlao awpa ta hrua ei ta.

³ Chatawhcha kresawti cha a daih khao leipa ta, Zisu nô chata a hnohta, “Kresawti amâ phahla ha na,” tah ta.

⁴ Zisu ta a hnohta, “Ei nâ, nama pachâpa cha, keima pachâpa châ vei? Ei daihti tlô mâh vei,” tah ta.

⁵ A nô ta chakaotuhpazy hnohta, “Nama hnohta a reipa maih cha tao lymâ muh vy,” tah ta.

⁶ Zuzy pasi pathaina yzie hawhta lô beirai miacharu, khô sypalih su no tlyma, su thôh tlyma a tlôh chyupa cha liana chata patyu ei ta.

⁷ Zisu ta ama hnohta, “Lô beiraizy ti pabie teh u,” tah ta. Chatawhcha a kiah â chipa ta pabie chyu ei ta.

⁸ Ama hnohta, “Atahmâ thaih ula, chôtlapa hyutuhpa lâta vawkhei teh u,” tah ta. Chatawhcha vawkhei ei ta.

⁹ Chôtlapa hyutuhpa chata ti kresawti lâta a liepa cha pachâ ta, a puanazie pahno leipa ta, ti a thaituhpa chakaotuhpazy deikua chata pahno ei ta, lahpinô a hnei awpa cha aw ta,

¹⁰ a hnohta, “Chyhsa to ta hmiatua ta kresawti phapa ama papua tyh; a hluh via ama doh tawhta a pha lei viapa ama papua tyh; nâ cha atahmâ taihta kresawti phapa na khai thlâh hapa he,” tah ta.

¹¹ Zisu ta he a hmonoâhpa tao pathao tuana he Kalili râh Kena khih liata tao ta, a rônahzie palâsa haw ta; a pachupazy chata ano cha a ngiapâ ei ta.

¹² Cha tawhna chata Kapynia khih lâta zu ta, ano nata a nô nata a unawhzy nata a pachupazy chhaota; cha liana chata noh chyhta y ei ta.

¹³ Zuzy Zawpakhô kyhchhi a hnia ha ta, Zisu Zerusale khih lâ khy ta.

¹⁴ Khazohpa achhyna-o liata viahchaozy, mietahkupa zy, vachhuh zy a zuahtuhpa sahlao nata tâkâ a rituhpa sahlao atyupa hmô ta.

¹⁵ Chatawhcha khawhri charipa ta chheina tao ta, mietahkupa nata viahchao, a zydua ta Khazohpa achhyna-o tawhta papua ta; tâkâ rituhpazy tâkâ cha leitha ta, ama tlâhkhaizy chati pa thlah hra ta.

¹⁶ Chatawhcha vachhuh a zuahtuhpazy hnohna chata, “He hmozy he he tawhna heta siekhei teh u’ ei Paw o sôhdaona o ta tao khah u,” tah ta.

¹⁷ “Na o liata ei phahnaikhôna ta eina nie khai aw,” tahpa ropa a châ tahpa a pachupazy chata thei ei ta.

¹⁸ Zuzy ta a hnohta, “He hmozy na taopa he pahnona khâpa maniah na pahmôsa thei,” tah ei ta.

¹⁹ Zisu ta ama hnohta, “He o he parao ula, noh thôh chhôhta ei padua aw,” tah ta a chhy ta.

²⁰ Zuzy chata, “He o he kô sypalih nata kô charu sapa a châ, nâ ta noh thôh chhôhta na padua aw ma?” tah ei ta.

²¹ Châhrasala ano pôhpa achhyna-o kyh a reipa tlao a châ.

²² Chavâta athihpa hry tawhta a thyu nahta cha kyh cha a rei haw tahpa a pachupazy ta a thei ei ta; Khazohpa châ bie nata Zisu bie reipa cha ama ngiapâ haw.

²³ Zawpakhô kyhchhi liata Zerusale khih liata a y nona chata, a hmonoâhpa taopazy hmô ei ta, chyhsa hluhpi ta ano a ngiapâ ei ta.

²⁴ Châhrasala Zisu cha âmo liata a nopei vei,

²⁵ chyhsa zydua pahno ta, chyhsapa kyh ahyhmah chhopasia a byuh leipa vâta; ano ta chyhsapa pathipalôh liata a ypa maih cha pahno tlôh ta.;