1
Cha râh liata chyhsa zy chata Zôsiah sawchapawpa Zehôahaza cha a chhi ei ta, Zerusale liata a paw vyuhpa ta abei ta tao haw ei ta.
2
Zehôahaza cha a bei tua nota kô syno nata kô thôh châ ta; Zerusale liata thla thôh a bei ta.
3
Izi beipa ta Zerusale liata a beina pabâsa ta, ama râh cha tâkâri talent za kha nata ngôh talent miakha pacheisa ta.
4
Izi beipa chata a unawhpa Eliakima cha Zudah nata Zerusale liata abei ta tao ta, âmo cha Zehôiki tahpa ta thlapa ta. Chatawhcha Nekô chata a unawhpa Zehôahaza cha Izi râh lâta a chhi ta.
5
Zehôiki cha abei tua nota kô syno nata kô pangawhpa châ ta, Zerusale liata kô hrawhleikha a bei ta. ABEIPA a Khazohpa mohmô liata hmo pha leipa tao tyh ta.
6
Babylaw beipa Nebukaneza cha ano dyuh awpa ta vaw thyu ta, Babylaw lâ a chhi awpa ta keihrai padaisa ta.
7
Nebukaneza chata ABEIPA o hmobaoh zy chhao la ta, Babylaw liata a khazoh achhyna-o liata soh ta.
8
Zehôiki thâtih hropa zy, a hmo pasichhihpa taopa zy nata a yzie zy cha Izarel nata Zudah Beizy Châbu liata ropa ta y ta; a sawchapawpa Zehôiakina cha ano vyuhpa ta a bei haw ta.
9
Zehôiakina cha a bei tua nota kô chariepa châ ta, Zerusale liata thla thôh nata noh hrawh a bei ta, ABEIPA mohmô liata hmo pha leipa tao tyh ta.
10
Kô a lei nata Abei Nebukaneza chata chyhsa tuah ta, ABEIPA o liata hmobao pha ngaitapa zy chhaota Babylaw lâta pachhithasa ta, a unawhpa Zedekiah cha Zudah râh nata Zerusale liata a bei ta tao ta.
11
Zedekiah cha a bei tua nota kô syno nata kô khapa châ ta, Zerusale liata kô hrawhleikha a bei ta.
12
ABEIPA a Khazohpa mohmô liata hmo pha leipa tao tyh ta. ABEIPA pakah tawhtapa bie a reituhpa hrohsopa Zeremiah liana chata a panawh khoh leipa ta.
13
Khazohpa moh ta chhie pasasatuhpa Abei Nebukaneza chô liata aty hra ta; chhoruna zie ta y ta, ABEIPA Izarel zy Khazohpa lâ a heih lei awpa ta a palôh pachyusa ta.
14
Theihthaipa zy nata zawpizy chhaota Khazohpa a pahno leipa chyhsa zy taona zie hawh hra ta hmo pasichhih ngaitapa zy tao ei ta; Zerusale liata a pathaisapa ABEIPA ozy chhao cha papuapalei ei ta.
15
ABEIPA ama mahpaw zy Khazohpa chata ama hnohta phahnai a ngiah chaimâhpa ta chyhsa tuah ta, a chyhsa zy nata a yna su cha a tha a pasapa vâta;
16
châhrasala Khazohpa chyhsa tuapa zy cha mohnao ei ta, a biezy khâpasaw ta reih leipa ei ta, a chyhsa zy chô liata ABEIPA pathi-iana cha vaw tlô ta, palôh patlâhsana rai a y leina taihta a hrohsopa zy cha taochhie ei ta.
17
Chavâta Kaldia beipa ama chô liata pathyusa ta, ano chata ama satliapa zy cha ama su pathaihpa liata zaozi ta thie ta, laihsa nata satlia chhao, machâ chhao, pawpi chhiepa chhao ngiachhiena rai hnei leipa ta a ku liata pie khai haw ta.
18
Khazohpa o liata hmobaoh zydua, a laipa rai, a chyhpa rai, ABEIPA o liata sôh so pakhypa zydua zy, abei sôh nata a molaipa zy sôh so pakhypa zy taihta Babylaw lâta la khai ta.
19
Chatawhcha Khazohpa o zy mei ta rao ei ta, Zerusale zy pacho ei ta, cha liata o rôhnahpa zydua nata hmobaoh phapa zydua cha parao khai ei ta.
20
Zaozi ta thie bâhpa zydua cha Babylaw lâta a chhi ei ta, Persia sahlao ama vaw beina taihta ano nata a sawchapawpa zy chakaotuhpa ta y ei ta,
21
Zeremiah pakah ta ABEIPA bieta roryhrapa ta ama y chhôh, ama pahânoh hmâpa ta kô sysari ama hmâh awpa kyh a vaw reipa cha a tlô paki nawpa ta a châ.
22
Chatanachata Persia beipa Kôrasa a bei tua kô ta Zeremiah pakah ta ABEIPA bie cha a tlô paki thei nawpa ta a khihnarâh zydua liata pathâh khai awpa nata a râh ta ro awpa chhaota ABEIPA ta Persia beipa Kôrasa pathipalôh cha pathyu ta,
23
“Persia beipa Kôrasa chata he tana heta a tah, ‘Khizaw khihnarâh zydua cha ABEIPA avâ Khazohpa chata na pie haw ta; Zudah râh liata Zerusale liana chata a o sapa awpa ta bie eina pie. Nama hry liata ano chyhsa maih hnohna chata ABEIPA a Khazohpa cha y sala, khy mawh sy,’ tahpa ta,” tah ta.
