8092. ‘Et fuit in dimittere Pharao populum’: quod significet cum illi qui infestarunt relinquerent illos qui ab Ecclesia spirituali, constat ex significatione ‘dimittere’ quod sit relinquere; ex ¹ repraesentatione ‘Pharaonis’ quod sint qui per falsa infestarunt, de qua n. 7107, 7110, 7126, 7142, 7220, 7228, 7317; et ex significatione ‘filiorum Israelis’, qui hic sunt ‘populus’, quod sint qui ab Ecclesia spirituali, de qua supra n. 8044.

Notas de rodapé:

340. Quod ‘dixit, Acquisivi virum, ‘Jehovam’ significet quod fides apud eos qui dicti Cain, cognita sit et agnita sicut res per se, constat ab illis quae in praemissis hujus capitis dicta sunt: prius quasi ignorarunt quid fides, quia perceptionem omnium quae erant fidei, habebant; at cum distinctam doctrinam facere incipiebant de fide, tunc depromebant illa de quibus perceptionem habebant, et redigebant in doctrinam, et vocabant illam, ‘Acquisivi virum, Jehovam’, sicut novum quoddam adinvenissent, ita scientificum factum, quod fuit inscriptum cordi. Unumquodvis novum antiquitus nomine vocabant, et quae involvebant nomina, sic explicabant; sicut quid Ismael significet, quod ‘audiret Jehovah miseriam ejus’, Gen. 16:11; quid Reuben, quod ‘vidit Jehovah miseriam meam’, Gen. 29:32; quid Simeon, quod ‘audivit Jehovah, quod minus cara’, ibid. vers. 33; quid Jehudah, ‘hac vice confitebor Jehovae’, ibid. vers. 35. Altare a Mose aedificatum, vocatum ‘Jehovah vexillum, Exod. 17:15; hic ipsa doctrina fidei vocata ‘Acquisivi virum, Jehovam’, seu Cain.