1
Chatawhcha Zawba chata a chhy ta:
2
“Chyhsa sopa nâma deita he na vaw châ tlai na, sona cha nâma hnohta a thi aw.
3
Nama pahno hawpa cha ei pahno hra; nâmo hlâta nawh via hlei va na. Ahy e hmo he hawhpa he a pahno leipa a y?
4
Viasa zy pahnei parâsaopa ei vaw châ; kei Khazohpa a awpa, ano chhaota â chhypa, chyhsa siapa, phapakipa nata pahnei parâsaopa he.
5
Chyhsa phasapa pachâna liana chata vâchhiepa mopakhôna a y; a hluapa zy a bykhâh thlâh hapa cha.
6
Phihmâhpa poh-ozy cha a dochâh ta, Khazohpa pathipa-iatuhpa zy a boh ei ta, ama ku liata ama khazoh a vaw chabatuhpa zy cha.
7
“Châhrasala sahroh zy hiahri la, ama cha pachu aw; aruapa liata pavawzy chhao, ama cha chho aw;
8
cha leipa ta alei chhao chho la, a cha pachu aw; tilaipi ngazy chata na hnohta ama phuah aw.
9
He hmo zydua liana heta ABEIPA ku ta taopa a châ tahpa ahy e a pahno leipa a y?
10
Ano ku liata hmohrohneipa ta hrona nata, chyhsa zydua husona chhao a y.
11
Pakah ta niepa a pachâpa hawhna heta, nahkhao chhao chata biezy pasia vei ma?
12
Machâpa liata sona y ta, noh khih pasina liata pahnona a y hra.
13
“Khazohpa liata sona nata thatlôna ta; chhosiena nata novâhna hnei hra ta.
14
Phie ta sa heih awpa rimâ châ vei; chyhsa khawhlôh ta, ahy hmah pahy thei aw vei.
15
Tizy cha patu ta, ama kua khai; vaw tuah heih ta aleilô ama pahly.
16
Ano liata thatlôna nata sona y ta; dôpa nata dôtuhpa chhao ano eih ama châ.
17
Chhosietuhpa zy tahruapa ta chhitha pathla ta, Ryureituhpa zy cha a pahrusa.
18
Abeizy ta chahryna he ama piepa cha pathlâ ta, ama chai cha chaisaihna ta saih ta.
19
Theihthaipa zy tahruapa ta a chhitha, thatlô ngaitapa zy a papaosa.
20
Abeisaw zy chôta mohnaona leitha ta, Thahtlôpa zy chaisaihna cha a pahua.
22
Zohna kyh a tawhtapa hmo a thupa hmô ta, thina nohpahli cha khaina liata a papua.
23
Phopizy cha padua ta, a parao hra ei: phopi zy palai ta, a pahlei heih hra ei.
24
Aleilô hyutuhpa zy pathipalôh lapa ta, râhpathohpa lâpi y leina liata a pavia visa ei.
25
Khaihna leipa ta zohna liata pathâh ei ta; paripa hawhta a paviavisa ei.
