Nuevo Estudio Bíblico Cristiano

La Biblia

 

Exodus 31

Estudio

   

1 Locutusque est Dominus ad Moysen, dicens :

2 Ecce, vocavi ex nomine Beseleel filium Uri filii Hur de tribu Juda,

3 et implevi spiritu Dei, sapientia, et intelligentia et scientia in omni opere,

4 ad excogitandum quidquid fabrefieri potest ex auro, et argento, et ære,

5 marmore, et gemmis, et diversitate lignorum.

6 Dedique ei socium Ooliab filium Achisamech de tribu Dan. Et in corde omnis eruditi posui sapientiam : ut faciant cuncta quæ præcepi tibi,

7 tabernaculum fœderis, et arcam testimonii, et propitiatorium, quod super eam est, et cuncta vasa tabernaculi,

8 mensamque et vasa ejus, candelabrum purissimum cum vasis suis, et altaris thymiamatis,

9 et holocausti, et omnia vasa eorum, labrum cum basi sua,

10 vestes sanctas in ministerio Aaron sacerdoti, et filiis ejus, ut fungantur officio suo in sacris :

11 oleum unctionis, et thymiama aromatum in sanctuario, omnia quæ præcepi tibi, facient.

12 Et locutus est Dominus ad Moysen, dicens :

13 Loquere filiis Israël, et dices ad eos : Videte ut sabbatum meum custodiatis : quia signum est inter me et vos in generationibus vestris : ut sciatis quia ego Dominus, qui sanctifico vos.

14 Custodite sabbatum meum, sanctum est enim vobis : qui polluerit illud, morte morietur ; qui fecerit in eo opus, peribit anima illius de medio populi sui.

15 Sex diebus facietis opus : in die septimo sabbatum est, requies sancta Domino ; omnis qui fecerit opus in hac die, morietur.

16 Custodiant filii Israël sabbatum, et celebrent illud in generationibus suis. Pactum est sempiternum

17 inter me et filios Israël, signumque perpetuum ; sex enim diebus fecit Dominus cælum et terram, et in septimo ab opere cessavit.

18 Deditque Dominus Moysi, completis hujuscemodi sermonibus in monte Sinai, duas tabulas testimonii lapideas, scriptas digito Dei.

   

De obras de Swedenborg

 

Arcana Coelestia #10335

Estudiar este pasaje

  
/ 10837  
  

10335. ‘Et Ego ecce dedi cum illo Aholiabum filium Achisamachi tribui Dan’: quod significet illos qui in bono et vero fidei apud quos Ecclesia instauranda, constat ex repraesentatione ‘Aholiabi’ quod sint illi qui in bono et vero fidei; quod illi per Aholiabum repraesententur, est quia e tribu Danis erat, et per illam tribum significantur illi qui in bono et vero fidei sunt, videatur n. 3923, 6396. Quod hi duo, nempe Bezaleel e tribu Jehudae, et Aholiabus e tribu Danis, 1 electi sint ad faciendum opera, per quae repraesentarentur Divina caelestia et spiritualia, erat quia per Bezaleelem intelliguntur omnes qui in bono amoris 2 sunt, et per Aholiabum omnes qui in bono et vero fidei, ita per Bezaleelem illi qui in intimis caeli et Ecclesiae, et per Aholiabum illi qui in ultimis eorum sunt; et cum intimi et ultimi nominantur, intelliguntur omnes qui in universo caelo et in universa Ecclesia, 3 de qua re videatur supra n. 10329, et quod cum primum et ultimum dicuntur, intelligantur 4 omnia, n. 10044. 5 Tribus Jehudae etiam actualiter erat prima tribuum, et tribus Dan ultima earum; quod tribus Jehudae actualiter esset prima tribuum, constat ex benedictione filiorum ab Israele patre, Gen. xlix, ibi Reuben, Schimeon, et Levi, qui primogeniti 6 , maledicuntur, ac Jehudah benedicitur; videatur de Reubene ibi, vers. 3, 4, 4, de Schimeone et Levi, vers. 5-7, et de Jehudah, vers. 8-12;

et quod Dan 7 sit ultima tribuum, videatur n. 1710, 8 3923, 6396; in 9 intimo 10 caelo etiam sunt qui in bono amoris in Dominum, et in ultimo qui in vero fidei ex bono. In vero fidei ex bono dicitur quoniam verum fidei non est verum fidei apud aliquem nisi sit ex bono, nascitur enim verum ex bono; quapropter nisi bonum in vero sit, non est anima in illo, ita non vita; 11 qui in veris fidei 12 sunt ex bono, sunt 13 in ultimis caeli, non autem qui in veris fidei absque bono 14 sunt, hi non in caelo sunt. Quoniam verum fidei ministrat bono amoris, sicut 15 ultimum primo, ideo dicitur de Aholiabo quod Jehovah dederit illum cum Bezaleele, quod est ad serviendum illi; ac de Bezaleele dicitur quod Jehovah impleverit illum spiritu Dei in sapientia, et in intelligentia, et in scientia, et in omni opere, vers. 3

Notas a pie de página:

1. designati

2. ita qui in intimis coeli et Ecclesiae sunt, et per Aholiabum omnes qui in bono et vero fidei, ita qui in ultimis coeli et Ecclesiae

3. quod per Bezaleelem quia ex tribu Jehudae, intelliguntur illi qui in bono amoris sunt, ita qui in intimo coeli et Ecclesiae, et per Aholiabum quia ex tribu Dani, intelliguntur illi qui in vero fidei, ita qui in ultimo coeli et Ecclesiae, consequenter omnes, videatur etiam supra Arcana Coelestia 10329

4. The Manuscript inserts omnes seu.

5. et quoque tribus Jehudae

6. The Manuscript inserts fuerunt.

7. fuerit

8. The editors of the third Latin edition made a minor correction here. For details, see the end of the appropriate volume of that edition.

9. The Manuscript inserts primo seu.

10. coeli

11. The Manuscript inserts tales.

12. habent vitam

13. The Manuscript inserts qui.

14. The following word or phrase is crossed out in the Manuscript, but it does appear in the first edition.

15. ultima

  
/ 10837  
  

This is the Third Latin Edition, published by the Swedenborg Society, in London, between 1949 and 1973.

©2024 New Christian Bible Study Corporation. All rights reserved. Printed from newchristianbiblestudy.org