1
ABEIPA bie cha ei hnohta vaw tlô ta;
2
“Chyhsa y, krezô cha tho hropa hlâta khâpa ma a châ via, a chiahzy râhhmâhpa tho hry liata kre chhao cha?
3
A thopa hmotaona châta hmâpa a châ ma? Hmodâh bangiena châta chhao ahy e a hmâh beih tly?
4
Pachâ tua, mei pakâhna châta mei liata thypa châ tyh ta, mei ta a pawhmao rairieh ta a kâ patlô, a liahliah liana chata a kâ tyh, phahnaina a hnei rai ma?
5
Pachâ tua, a bo no hmahta phahnai vei, a kâ tawhta khatluta a phahnai lei viapa a châ aw tly?
6
Chavâta Abeipa KHAZOHPA chata he tana heta a tah: Râhhmâhpa tho hry liata krezôzy mei patina chata ei piepa hawhna tlai chata Zerusale a pahrâtuhpazy cha ei tao aw.
7
Âmo cha a hei hnao aw ei na ta, mei tawhtapa cha pua hra ei sala, mei liana chata a kâ khai thlyu aw na, âmo ei hei hnao tina chata ABEIPA cha ei châ tahpa nama pahno aw.
8
Hmoparaona ama tao hawpa vâta ama râh cha roryhrapa ta ei paysa aw na, Abeipa KHAZOHPA ta a tah na,” tahpa ta.
