Hakai 1

¹ Abei Daria kô nona, a thla charuna, cha thla noh hmia tua chaipa liana chata hrohsopa Hakai hnohta ABEIPA bietapa cha, Shaltiel sawchapawpa Zudah râh avaotuhpa Zerubabel lâta nata Zehôzada sawchapawpa theihthaipa beichaipa Zawsua lâta vaw tlô ta,

² “Pheisaihzy ABEIPA chata he tana heta a tah: ‘He chyhsazy heta ABEIPA o sana daihti awpa cha vaw tlô mah vei,’ ama tahna,” tahpa ta.

³ Chatawhcha hrohsopa Hakai hnohta ABEIPA bietapa vaw tlô ta,

⁴ “He o he roryhrapa ta a y nota nâmo o chô pathôhpa liata pahrâpa he a daihti a châ ma? tahpa ta.

⁵ Atahmâ Pheisaihzy ABEIPA ta he tana heta a tah: Nama lâpizy cha pakhâta ta moh teh u.

⁶ Ahluhpi tu eichi ta, achyhta hria tlôh eichi; nie eichi ta, lôhrâtlôpa ta y tlôh eichi va; doh eichi ta, cha khi tlôh ei va; a bu eichi ta, lalôh hlei tlôh eichi va; a hlaopa chata sahria pyupa liata khô awpa ta a hlao.

⁷ “Pheisaihzy ABEIPA chata he tana heta a tah: Nama lâpizy cha pakhâta ta moh teh u.

⁸ Tlâh lâ kiah ula, tho la ula, o cha sa teh u; châ ly aw na ta, palyupalihpa ta ei y aw, ABEIPA ta a tah.

⁹ Ahluhpi hmo hnabeisei eichi ta, pachâ teh u, achyhta a vaw châ; o vaw tlôkhei eichi ta, hmô pathlah khai na ta. Khâpa vâta a châ? Pheisaihzy ABEIPA ta a tah. Nâmo nama o lâ pangaipa ta thlai a di tyh eichi ta, ei o cha roryhrapa ta a ypa vâta a châ.

¹⁰ Chavâta avâ ta diati a tla awpa a cha pakhâpa ei châ ta, alei ta a thei a cha pakhâpa hra ei.

¹¹ Alei chô liata zy, tlâh chô liata zy, sa chô liata zy, thaw chô liata zy, sahroh chô liata zy, ku ta hriapa zydua chô liata zy noh ei pakâhsa,” tah ta.

¹² Chatanachata Shaltiel sawchapawpa Zerubabel nata Zehôzada sawchapawpa theihthaipa beichaipa Zawsua nata chyhsa a laibâhpa zydua chata ABEIPA ama Khazohpa ao nata ABEIPA ama Khazohpa ta a tuapa hawhta a vypa hrohsopa Hakai bie cha ama nah tla haw ta; chyhsazy chata ABEIPA cha a hmiakô liana chata chi haw ei ta.

¹³ Chatanachata chyhsazy hnohta ABEIPA bietapa hmâpa ta ABEIPA lyuhchâpa Hakai chata reih ta, “Nama hnohta ei y, ABEIPA ta a tah,” tahpa ta.

¹⁴ ABEIPA chata Shaltiel sawchapawpa, Zudah râh avaotuhpa Zerubabel palôhrupa nata Zehôzada sawchapawpa, theihthaipa beichaipa Zawsua palôhrupa nata chyhsa laibâhpa zydua palôhrupa cha pathyu haw ta; chatanachata a vy ei ta, Pheisaihzy ABEIPA ama Khazohpa o liana chata raihria haw ei ta,

¹⁵ cha thla noh syno nata noh palihna liana chata.