Zephania 3

¹ Tyhmâhpa nata puapa, pasaipa-i hmâhpa khihpi cha a hu a po na!

² Ao cha zo leipa ta, chhoreina a pyh leipa ta. ABEIPA cha ngâ leipa ta, a Khazohpa lâ a hnia khoh vei.

³ A chhôh liata a hyutuhpa cha, chakeibarôhneipa a rôh ngâpa châ ei ta; a pachiatuhpazy cha zâ changie châ ei ta, a mylâ taih cha-eih awpa khâpa hmah pahlôh veih ei.

⁴ A hrohsopazy cha chyhsa leipa, dôhmâhpazy châ ei ta; a theihthaipazy ta su pathaihpa ama papua palei, ryhpa cha thata ama parao.

⁵ A chhôh liata ABEIPA cha a sia na, hrao leina tao aw vei; my chareih ta a ryureina cha palâsa ta, khihdei maihta khoh beih leipa ta, châhrasala chyhsa sia leipa chata zana châh rai pahno vei.

⁶ “Phopizy cha pahleipadia na ta. ama kuhzy roryhrapa ta y ta; âmo othliahzy cha ahy hmah sie pahlie lei nawpa ta a dâh karopa ta tao na ta; ama khihpizy cha ama rao khai haw; ahy hmah y khao leipa ei ta, pahrâtuhpa rai y khao veih ei.

⁷ ‘Nâ ta na chi la, chhoreina he a pyh la; ano kyh liata ei raopa zydua hawhna khata, a yna cha pahlei syulyupa châ aw vei,’ tahna ta. Châhrasala my ta thyu ei ta. ama hmotaopa zydua hrao leipa pachâsa khai ei ta,” tah ta.

⁸ “Chavâta hraona hrao awpa ta ei hria noh taihta na hâ teh u,” ABEIPA ta a tah: “Ei hmo a chhuahpa cha ama chô liata ei hiehâna, ei hiehâna chichhih ngaitapa cha patlai awpa ta. Abeina khihnarâhzy pakhysapa ta phozy aw pakhypa he châ ta, alei zydua he ei hiatliana mei ta kâ pasia khai tlôh aw ta.

⁹ “Cha tina chata zawpizy cha hmao pathaihpa ei pahneisa heih aw, ABEIPA moh cha ama zydua ta padopa ta reihkha tlapa ta ama chakao chyu thei nawpa ta.

¹⁰ Ethiôpia chavah khôlâ tawhta kei lâta a hiatuhpazy, ei chyhsa a paihpazy sawchanô chata ei hmohlâpa a vaw cheih aw.

¹¹ “Cha noh liana chata ei chô liata na paraona hmotaopazy vâna chata na no za aw vei ma? Cha daihti na liana chata na chhôh tawhtapa na chyhsa, palaina thaphakheituhpazy cha pahlei aw na ta, ei tlâh pathaihpa liana heta palaina hmâpa ta y khao aw va chi.

¹² Châhrasala na chhôh tawhtapa sipasapazy nata pasipasaw a taopazy pahlôh aw na ta. ABEIPA moh cha ama ngâ aw.

¹³ Izarel mo laibâhpazy chata hmoparaona tao leipa aw ei ta, haipa reih hra aw veih ei, ama pakah liata chhao dona y hra leipa aw ta. Niepa ta a mô aw ei ta, Ahy hmah ta pachisa khao aw veih ei,” tah ta.

¹⁴ Hy Zaio sawchanô hla sa teh; Izarel, thata awh teh; hy Zerusale sawchanô, na pathipalôh tlokhuh ta aly la, thapha teh!

¹⁵ ABEIPA ta na kyh pachianazy cha la haw ta, na khakhaipa a thy pathlah haw, Izarel Beichaipa ABEIPA cha na chhôh liata a y na; hmopha leipa chi beih khao aw va chi.

¹⁶ Cha noh liana chata Zerusale hnohta: “Chi khâ, hy Zaio; na ku tha chhao zei khah se,” ama tah aw.

¹⁷ ABEIPA na Khazohpa cha na chhôh liata a y na, pachhatuh awpa mo thatlô ngaitapa cha; alypa ta na chô liata thapha aw ta, a kyhpachâna pathieh aw ta, hla sapa ta na chô liata aly aw.

¹⁸ “Nâma liatahpa, a pakhypi liata a hlao pha leipa ta pachârôhpazy cha. ei chhi pakhy aw, nâma vâta reipachhiena phaohri a phaohtuhpazy cha.

¹⁹ Pachâ teh, cha tina chata cha taolatuhpa zydua ei pachâ aw. Chatawhcha pheisypa cha pachha aw na ta; topa ta a ypa ei pakhy aw. A lei chô zydua liata ama vaw maohphyuna cha reithaina nata moh pathâhna ta ei pachâsa aw.

²⁰ Cha tina chata cha pangiasa aw ei na ta, cha tina chata ei cha pakhy aw ei; nama mohmô tlai liata nama seichâna ei palie tina chata alei chô chyhsa zydua hry liata mohpathâhna nata reithaina cha taopa aw ei na ta,” ABEIPA ta a tah.