Hakai 2

¹ Abei Daria kô nona, ‘thla sarina, cha noh syno nata noh khana liata hrohsopa Hakai hnohta ABEIPA bietapa vaw tlô ta;

² “Shaltiel sawchapawpa, Zudah râh avaotuhpa Zerubabel lâta nata Zahôzada sawchapawpa, theihthaipa beichaipa Zawsua lâta nata chyhsa laibâhpazy lâta he tana heta reih teh,” tah ta.

³ He o he cha hlâta a rôhnah nota a hmôpa nama hry liata ahy e a y? Atahmâ kheih hawhta e nama hmô? Nama mohmô liata khâpa ma a châ rai ma?

⁴ Hy Zerubabel y, atahmâ thatlô ngaitapa ta y teh, ABEIPA ta a tah, hy theihthaipa beichaipa Zawsua Zehôzada sawchapawpa y, nâ chhao thatlô ngaitapa ta y teh; nâmo he rah liata chyhsa zydua saih u, thatlô ngaitapa ta y hra teh u, ABEIPA ta a tah, thyu teh u, nama hnohta y tlôh na ta, Pheisaihzy ABEIPA ta a tah.

⁵ Izi tawhta nama vaw pua nota bie ei cha hraipa hawhna khata, nama hry liata ei Thlahpa a pahrâ thlâh haw, chi khah u.

⁶ Pheisaihzy ABEIPA chata he tana heta tah tlôh ta: Ei kha cha, bohpi leipa ta avâzy nata alei zy nata tilaipizy nata tlâh zy ei chalyu aw,

⁷ pho to chalyu aw na ta, pho to hmo kho viapazy cha vaw tlô aw ta, he o he rôhnahna ta ei pabie aw, Pheisaihzy ABEIPA ta a tah.

⁸ Tâkâri he kei eih châ ta, ngôh he kei eih a châ, Pheisaihzy ABEIPA ta a tah.

⁹ He o rôhnahna hnôh lâtahpa he hmialâ tahpa hlâna khata a rôhnah via syulyu aw, Pheisaihzy ABEIPA ta a tah; he su liana heta adyuhna ei tlôkhei aw, Pheisaihzy ABEIPA ta a tah,” tahpa ta.

¹⁰ Daria a bei kô nona, a thla chakina, noh syno nata noh palihna liana chata hrohsopa Hakai hnohta ABEIPA bie he hawhna heta vaw tlô ta,

¹¹ “Pheisaihzy ABEIPA chata he tana heta a tah: Theihthaipazy cha ryhpa he tana heta hiahri tua,

¹² Ahy tlyma a viahpakao pasihpa, pai liata sa pathaihpa pabyuh sala, a viahpakao pasihpa pai chata viahchhâ tlyma, hmo khâpa leipa chhopa tlyma, kresawti tlyma, niepa rai tlyma vaw hria haw sala a pathaih aw ma?’ tahpa ta.” Theihthaipazy chata, “Pathaih aw vei,” tahpa ta a chhy ei ta.

¹³ Hakai chata, “Athihpa ri hriapa vâta chyhsa pathaih leipa ta he hmozy a kheihawhpa rai he hria sala, pathaih leipa a châ aw ma?” tahpa ta. Theihthaipazy chata, “Pathaih leipa a châ aw,” tahpa ta a chhy ei ta.

¹⁴ Chatawhcha Hakai chata, “He chyhsazy he cha hawhna tlai cha châ ei ta, he pho he cha hawhna tlai chata ei hmiakô liata ama y, ABEIPA ta a tah; ama hmotaopa to chhao cha hawhna hra cha châ ta, cha liata ama hmohiapa chhao pathaih vei.

¹⁵ Atahmâ tawhta nohhro taihta ABEIPA achhyna-o liata alô nama pacho hlâ, kha hlâna kha pachâ teh u,

¹⁶ Kha daihti zydua khata sâh panuana syno a tloh awpa pahmaona liata chyhsa a vy nata miahrawh deita vaw tlô ta; kresawti saona su liata ôh sypangawh thai a chhuahpa ta a vy na ta, syno deita a vaw tloh tyh.

¹⁷ Nama hriapa zydua liata chawhkaraina zy, hmyna zy nata pareih zy nata cha hrie eina ta; châhrasala keima lâ a heih hlei veih eichi, ABEIPA ta a tah.

¹⁸ He thla chakina, noh syno nata noh palihna, atanoh tawhna heta nohhro taihta, hmia lâ kha pachâ teh u.

¹⁹ A chi cha sawvâ liata a y ma? Krezô zy, theiku kô zy, pawmikranat zy nata ôli tho zy cha pathei vei; atanoh tawhna heta byhnâ ei cha aw pa aw ei,” tahpa ta.

²⁰ ABEIPA bie cha cha thla, noh syno nata noh palihna liana chata Hakai lâta vaw tlô heih ta;

²¹ “He hawhna heta Zudah râh avaotuhpa Zerubabel hnohna chata reih teh: Kei chata alei nata avâ ei chalyu tyh. Khihnarâh beidyuchhaizy cha thy aw na ta,

²² phozy khihnarâh thatlôna cha ei parao aw; talailizy a chô liata a kiahtuhpazy cha papao aw na ta, arâzy nata a kiahtuhpa zy cha chyhsa to âmo unawhpa zy zaozi ta ama pao aw.

²³ Cha noh liana chata, hy Zerubabel ei chakaotuhpa, Shaltiel sawchapawpa y, ei cha patu aw, Pheisaihzy ABEIPA ta a tah; chatawhcha moh chahnaona kusadi hawhta ei cha tao hra aw, ABEIPA ta a tah; nâma châ vaw tly ha tlôh na ta, Pheisaihzy ABEIPA chata a tah,” tahpa ta.