Nehemia 4

¹ Châhrasala Sanbala ta kuh eima tao tahpa a thei nahta, a pathi-ia ta, thata a hie a pahâh ta, Zuzy pahnei sao ta.

² Chatanachata a unawhzy nata Samari pheisaih zy hmiakô liana chata bie reih ta, “He Zu chyhsa dyutlai leipa sahlao zy heta khâpama ama tao tly? Hmozy cha ama tao pathi aw tlyma? Ama thei bao hra aw tlyma? Noh noh khata zua ama paloh thei aw mâ? Hnaihny tawhtapa alô mei ta a kâ khai hawpa zua ama padua pathi aw mâ?” tah ta.

³ A kiapâh ta Amawna chyhsa Tôbiah chata, “Vaw padua tua rai ei sa, changie hmahta vaw kiah sala ama alô kuh cha a pacho thlâh ha aw,” tah ta.

⁴ Hy eima Khazohpa, moh teh. Mohnaopa ta eima ypa he; maniah ama reipachhiena cha âmo luh chô lâta paliesa la, âmo chhao khataih râh liata tlyma maophyuh ngaitapa ta sei pachâsa mah y.

⁵ Ama hmoparaona khu leipa la, ama moleina zy cha na hmiakô tawhtapa pahlei khah y; a taotuhpa zy hmiakô liata na pathi ama cha pa-iapa he.

⁶ Chatanachata kuh cha tao pi ta; a sâhna lâ khophie ta kuh zydua pazao khai pi ta. Zawpi zy chata hria khona palôhrupa ama phaoh.

⁷ Anodeikuacha Sanbala zy, Tôbiah zy, Arabia mozy, Amawna mozy nata Asadô mozy ta Zerusale kuh cha tao pathipa a châ lymâ tahpa nata a raonazy eima pamai pathao tahpa ama thei nata, ama pathi-ia ngaita ta;

⁸ Zerusale cha adyuhpa ta tymâna tao awpa a chhuah ei ta.

⁹ Chatanachata âmo vâta eima Khazohpa lâta thlahchhâ pi ta, chhô nata zâ âmo a vaihtuhpa soh pi ta.

¹⁰ Châhrasala Zudah chata, “Raihriatuhpa zy tha chhâ ha ta, hnaihny hra hluh kaw tlôh ta; kuh cha tao thei khao aw ma pi,” tah ta.

¹¹ Chatawhcha eima khakhaipa zy hra chata, “Ama hryta vawpa ta, thiepa ta, raihria cha eima pachhâsa hlâta cha pahno leipa aw ei ta, maniah hmô aw veih ei,” tah tlôh hra ei ta.

¹² Ama kiapâh ta Zu a pahrâpa zy amâ vy tyh nona khata, su hropa liata a ypa zy ta ei hrawh tlai, “Keimo lâ nama vaw kua heih awpana a châ,” maniah vaw tah bailai ei ta.

¹³ Chatanachata kuh pahliepa a hnai chaina su pavâpa zy cha chhôhkha chyu ta ama zaozi zy, ama asei zy, ama libaw zy a chabâhpa ta yna su paryhsa na ta.

¹⁴ Chatawhcha mohmia pasaih na ta, thyu na ta, chyhsa phapa zy nata ryureituhpa zy nata zawpi hropa zy hnohna chata, “Âmo sahlao cha chi khah u, Abeipa rôhnah ngaitapa nata chichhi ngaitapa cha a thei thlâh hapa ta nama unawhpa zy, nama sawchapaw zy, nama sawchanô zy, nama lahpinô zy, nama ozy hrôhbie awpa ta adyuh teh u,” tah na ta.

¹⁵ Eima khakhaipa zy eima pahno tahpa nata ama hmo tao a chhuahpa cha Khazohpa ta khâpa leipa ta a tao tahpa ama thei nata kuh lâta eima raihriana chyu lâta sie khai heih pi ta.

¹⁶ Cha rakha tawhna cha eima satlia sahlao khophie zy chata raihria ei ta, a khophie zy chata asei zy, vyhphao zy, libaw zy chachôhna vyhphao zy cha a vao ei ta; ryureituhpa zy cha Zudah chhôhkhapa zydua hnôh lâta y ei ta.

¹⁷ Kuh a taotuhpa zy nata a phaotuhpa zy cha a ryh kawhpa ta a tobi ei ta, ama ku râ kha ta raihria ei ta, râ kha lâta chaihrai chaba ei ta.

¹⁸ A taotuhpa zy chata ama zaozi a vao chyu ei ta, cha chôna chata ama tao. Chiahmie a tôtuhpa cha ei kiapâh liata y ta.

¹⁹ Chatawhcha chyhsa phapa zy nata ryureituhpa nata zawpizy hmiakô liana chata, “Raihria cha hluhpa ta, kawh ngaita ta, kuh liana heta pailyupa ta a hla kaw tlôh pi ta.

²⁰ Chiahmie pyu nama theina lâ maih liana chata cha liana chata keimo lâta a vaw râ ula. Eima Khazohpa ta maniah adyupa aw,” tah na ta.

²¹ Cha hawhna chata rai cha hria pi ta, a khophie chata my a pavâh hiehupa tawhta awhsi a lâna taihta aseizy cha a vao ei ta.

²² Cha hawhna hra chata cha noh lilaw chata zawpizy hnohta, “Zâ ta maniah vaipa ta, nohchhô ta raihria chata ahyrai ama chakaotuhpa zy chhaota Zerusale chhôh liata a rie khai mawh sy,” ei tah.

²³ Chatanachata kei chhao, ei unawhpa zy chhao, ei satliazy chhao, vaihtuhpa na zi tyhpa zy chhao, ahyhmah ta eima chysia pahluh leipa pi ta; chaihrai a chaba chyuna chôta ti lâna cha vawh tyh pi ta.