Zoel 2

¹ Zaio liana chata chiahmie tô ula, ei tlâh pathaihpa liana chata zikyurâna phuah teh u! He râh chhôh liatahpa zydua cha a chalyu ei se, ABEIPA noh cha vaw tlô hai ta, a hnia haw tlôh ta,"

² zohna nata ati kaluna noh, meihdo a chhohna nata zohkaluna noh! Tlâh chô liata khih pavâpa khaihpa hawhta zawpi hluh ngaitapa nata thatlô ngaitapa; cha hawhta a y beih leipa, cha hnôh lâta chhâ hluhpi taih chhaota a y beih khao lei awpa cha.

³ Ama hmialâ cha mei ta kâ patlô ta, ama hnôh lâ cha meipaleih ta a palie. Ama hmiakô liata lyurâh cha Idâh sahdô hawhta a châ, ama hnôh lâ cha râhpathohpa râh chawhkaraipa châ ta, khâpa ta hmahta chazy cha khôkhâh veih ei.

⁴ Amâ lânazie cha arâ a lânazie hawhta châ ta, arâ a kiahpa hawhta a râ ei ta.

⁵ Adyuhna talaili pyu hawhta, tlâh chô liata a zaw ngâ ei ta, sawphaoh meipaleih a duah ngâpa hawhta nata, adyuhna liata zawpi thatlô ngaitapa ama chipa hawhta.

⁶ Ama hmiakô liata zawpizy cha thlahzopa ta y ei ta, ama hmiazy cha hlâh khai ha ta.

⁷ Chyhsa thatlô ngaitapa hawhta a râ ei ta, adyuhpa hawhta pâhchhô lâta kiah ei ta. Amo dady chyuta sie ei ta, ama patlâhnazie patypamâ veih ei.

⁸ A chatichahnao leipa ei ta, âmo lâpi liata sie chyu ei ta; chaihraizy chatôh pathla ei ta, tlei veih ei.

⁹ Khihpi chô lâta a zaw ei ta, kuh chô liata a râ ei ta; o chhôh lâta zy kiah ei ta; parutuhpa hawhta opy lâta a ngia ei ta.

¹⁰ Ama hmiakô liata alei a chatho ta, avâzy a chalyu ta. Noh nata thlâpâ cha zoh ta, awhsizy ta ama khaihna nyu ei ta.

¹¹ ABEIPA chata a pheisaih hlao hmiakô liata a ao papua ta, a riena suzy cha rôhnah kaw tlôh ta; a bie a patlôtuhpa thatlôpa châ tlôh ta. ABEIPA noh cha rôhnahpa ta a rarôh y ngaita tlôh ta; ahy e a tao thei aw?

¹² ABEIPA chata, “Cha chôna chhaota, atahmâ nama pathipalôh tlokhu ta, leipa ta, chapa ta, pachârôhpa ta kei lâ a vaw heih ula;

¹³ nama poh châ leipa ta, nama pathipalôh hrie ula,” tah ta. ABEIPA nama Khazohpa lâna cha a heihh teh u, ano cha ngiachhiena a hnei ngaitapa nata thapasana ta a biepa, nônaipa nata nôphana a hnei thlupa, hmopha leipa tawhta a heisai tyhpa a châ.

¹⁴ ABEIPA eima Khazohpa cha a palôh a vaw tlâh thei ngyu ta, eima chicheipazy byhnâ a hluhpi pie aw ta, ano lâta niepa nata dopa hlâna zy chhao eima hlâ thei aw.

¹⁵ Zaio liana chata chiahmie tô ula; nie leipa daihti pathaisa ula; pakhypi pathaihpa tao teh u;

¹⁶ zawpi pakhy ula, Apakhypa sahlao cha pathai ula; pawpipazy, hawtizy sâhpi a ngiehpazy pakhy ula. Myuthieh hneituhpa cha a chhôhpadâhpa tawhta vaw pua sala, myuthieh chhao a chhôhpadâhpa liah liah tawhtapa vaw pua mawh sy.

¹⁷ Theihthaipa, ABEIPA chakaotuhpazy cha, aikah nata maisâh likawh liana chata cha ei sala, “Hy ABEIPA, na chyhsazy pahlôh la, na ryutozy he reipachhiepa ta ypa ta, phozy ta ama chô liata ryu ama reipa awpa ta pie khâ. ‘Ama Khazohpa cha khataih liata a y haw,’ tahpa ta, ama zawpizy hry liana chata khazia e ama tah aw?” tah mawh sy.

¹⁸ ABEIPA chata a lyurâh cha a hiatlia ta, a chyhsazy ngiachhie ta.

¹⁹ ABEIPA chata a chyhsazy hnohta, “Nahthlie ula, nama hnohta sa zy, kresawti zy, thawzy vaw tlôkhei aw na ta, chazy chata rihbiepa ta y aw eichi ta; phopizy hry liana chata reipachhiepa ta cha paysa chachei aw veih ei na.

²⁰ “Nâmo tawhtapa maw lâ pheisaih cha pasie syulyu aw na ta, râh chawhkaraipa nata roryhrana liata ei pasiesa aw, a hmia tuapa sahlao nochhi lâ tilaipi lâta, a hnôh lâtahpa sahlao notla lâ tilaipi lâta; thu aw ei ta roh chhie ngaitapa ta a pahnâh aw, hmo thata a tao hawpa vâta, tahpa ta a chhy ta.

²¹ “Hy râh, chi khâ; thaphapa ta awh teh; ABEIPA chata hmo rôhnah ngaitapa zy tao haw tlôh ta!

²² Sahroh saih u, chi kha y, râhpathohpa sibiepa su kaw thao ta; tho cha pathei ta, theiku kô nata krezô zy cha pathei ngaita tlôh ta.

²³ “Nâmo Zaio sawzy saih u, aly teh u, ABEIPA nama Khazohpa liana chata thapha teh u; vâsua hmiatuapa cha hmialâ tahpa hawh tlaita cha pie tlôh ei ta, nama châta avâ pasuasa ta, thla khana liata vâsua hmiatuapa nata vâsua hnôhpa cha.

²⁴ “Siphiahzy cha sa ta bie aw ta, kresawti nata thaw cha beizy liana chata khô ngâ aw ta.

²⁵ Nama hry liata ei pheisaih hlao a hluhpi ei tuapa, tyka zy, kuri zy, khawthlôhraipa zy, chângyu zy ama nie khai kôzy kha ei cha thô heih aw ei.

²⁶ “A hluhpi nie aw eichi ta, nama rihbie aw ta, noâh ngaitapa ta cha pachâ tyhtuhpa ABEIPA nama Khazohpa moh cha reithai aw eichi ta. Ei chyhsazy cha maohphyu chachei aw veih ei.

²⁷ Izarelzy hry liata ei y tahpa nata ABEIPA nama Khazohpa châ na ta, ahyhmah a hrohpa y veih ei tahpa nama pahno aw. Ei chyhsazy cha maohphyu beih aw veih ei.

²⁸ “Cha hnôh lâna chata he tana heta châ aw ta, chyhsa zydua chô liata ei thlahpa hry aw na ta; nama sawchapawpazy, nama sawchanônôzy ta ei bie chho aw ei ta, nama pawpipazy ta mâ lâta sa aw ei ta, nama satliapazy ta aluahnazy hmô aw ei ta.

²⁹ Cha nohzy liana chata seichapawzy, seichanôzy chô liata chhao ei thlahpa hry aw na ta.

³⁰ “Avâ liata nata alei liata hmonoâhpazy pahmôsa aw na ta, thisaih zy, mei meikhu a duahpa zy chhaota.

³¹ Noh, zohna lâta a lie aw ta, thlâpâ, thisaih lâta a lie aw ta, ABEIPA noh rôhnah ngaitapa nata rarôh y ngaitapa cha a vaw tlô hlâta.

³² Chatawhcha ahyrai ABEIPA moh a padopa maih cha pachhapa ta ama y aw; ABEIPA ta a reipa hawhna khata chatlaipazy cha Zaio Tlâh liata nata Zerusale liata y tlôh aw ei ta, alaibâhpazy hry liana chata ABEIPA ta a awpazy cha ama y aw.