Athaona 12

¹ ABEIPA ta Abara hnohta, “Na râh tawhta nata na heih nawh tawhta nata na paw o tawhtapa pua la, râh ei cha pamosa awpa lâna chata sie teh.

² Chatanachata phopi rôhnah ngaitapa ta cha tao aw na ta, byhnâ cha pie aw na ta, na moh ei parôhnahsa hra aw, chatawhcha nâ cha byhnâ na châ aw.

³ Byhnâ châ awpatuhpa maih cha byhnâ awpa aw na ta, chhie châ sapatuhpa maih cha chhie ei sapa hra aw; nâma liata khizaw photo huhiehpa ta ama y aw,” tah ta.

⁴ Chatanachata Abara cha, ABEIPA ta a reipa hawhta sie ha ta; Lawta cha a hnohta sie hra ta. Abara cha Harana khih tawhta a pua nona chata kô sysari nata kô pangawh châ ta.

⁵ Chatawhcha Abara cha a lahpinô Sarai nata a nawhtapa sawchapawpa Lawta nata ama hneina zydua nata Harana khih liata ama hneipa chyhsazy chhao a chhi ta; Kana râh liata â ngia awpa ta sie ei ta, Kana râh ama tlô nona chata Abara cha, cha râh liata Sekhe su taihta Môreh aoka taihta sie lymâ ta. Cha nona chata Kana mozy cha, cha râh liana cha y ei ta.

⁷ Chatawhcha ABEIPA cha Abara hnohta a vaw luah ta, “He râh he na chi pathlazy hnohta ei cha pie aw,” tah ta. Cha liana chata a hnohta a vaw luahpa ABEIPA châna chata maisâh tao ta.

⁸ Cha tawhna chata Bethel nochhi lâta tlâh liana chata a pasie ta, cha liana chata a poh-o rai ta, notla lâna chata Bethel cha y ta, nochhi lâta Ai khih y ta; cha liana chata ABEIPA châta maisâh tao heih ta, ABEIPA moh cha pado ta.

⁹ Chatawhcha Abara cha Neke râh lâta pangai lymâ ta.

¹⁰ Cha râh liana chata chakâhna vaw y ta. Cha râh liata chakâhna cha pasa ngâsâpa vâta Abara cha Izi râh liata y chy awpa ta pua ha ta.

¹¹ Izi râh liata a vaw ngia chy ta, a lahpinô Sarai hnohta, “Nahthlie teh, chanô chhithai kawpa na châ tahpa ei pahno.

¹² Izi mozy ta ama cha hmô tina chata, ‘He he a lahpinô a châ he tah aw ei ta’’ chatawhcha kei cha eina thie aw ei, nâ deikua cha a cha pahlôh aw ei.

¹³ Nâma vâta a phapa ta ei y theina awpa nata nâma vâta ei hro theina awpa ta, ngiachhiepa ta, ‘A sietanô na ei châ’ tah mah y,” tah ta.

¹⁴ Abara cha Izi râh liata a vaw ngia nona chata, Izi mozy chata chanô hmô ei ta, chhithai ngaitapa ta pahno ei ta.

¹⁵ Chatanachata Phirao abei sawzy chhao chata hmô ei ta, Phirao liata chho ei ta. Chatanachata chanô cha Phirao o liata a ngiakhei ei ta.

¹⁶ Chatawhcha ano chata chanô vâta Abara cha dao kaw ta; ano cha mietahkupazy, viachaozy, alâ tôhpa zy, seichapawzy, seichanôzy, alâ chanôhpazy, râraoseihpazy hnei ta.

¹⁷ ABEIPA chata Abara lahpinô Sarai vâna chata Phirao nata a chhôhkha cha hri thata patlô thlu sa ta.

¹⁸ Chatawhcha Phirao ta Abara cha aw ta, “Ei chôta hmo na taopa he kheihtazie ta e a châ? Ano cha na lahpinô a châ tahpa khazia e eina chho vei chi?

¹⁹ Khazia e, ano cha, ‘Ei sietanô na a châ’ eina tah chi, cha vâna chata ma-â ei lahpinô ta ei vaw hnei haw tâh? Atahmâ na lahpinô he a chhi la, sie teh,” tah ta.

²⁰ Chatawhcha Phirao chata ano thâtih liana cha chyhsa hnohta bie pie ta; chatawhcha âmo châta ano nata a lahpinô, a hneina zydua chhaota pasiesa haw ei ta.