602. (Vers. 15.) "Et datum ei dare spiritum imagini Bestiae, ut at loquatur imago Bestiae," significat quod permissum illis confirmare doctrinam illam per Verbum, ex quo sicut vivificata docetur. - Per "datum" significatur quod permissum sit; omnia enim falsa doctrinae, sicut mala vitae, fiunt ex permissione, de qua videatur sapientia Angelica de Divina Providentia 234-274, 275-284, 296; ¹ per "imaginem Bestiae" significatur doctrina illa (601); per "dare spiritum imagini Bestiae" significatur confirmare illam ex Verbo, nam non aliunde est spiritus et vita alicui doctrinae Ecclesiae; "ut loquatur imago Bestiae" significat quod ita sicut vivificata doceatur. Quod haec intelligantur per "dare spiritum imagini Bestiae, ut loquatur," est quia in omnibus Verbi est spiritus et vita, Dominus enim locutus est Verbum, inde Ipse est in illo; ac ita locutus est Verbum, ut singula ibi communicationem habeant cum Caelo, et per Caelum cum Ipso; Sensus spiritualis ibi est, per quem datur communicatio; quare Dominus dicit,

"Verba quae Ego loquor vobis, Spiritus et vita sunt," (Johannes 6:63).

V:

275. Quod permittantur mala propter

Finem, qui est salvatio

Si homo in amorem, in quem creatus est, nasceretur, nonn foret in aliquo malo, imo nec sciret quid malum, nam qui non fuit in malo, et inde non est in malo, non scire potest quid malum; si diceretur ei quod hoc et illud sit malum, non crederet quod dabile sit; hic status est status innocentiae, in quo fuerunt Adamus et Chaiva uxor ejus; nuditas, quam non erubuerunt, significabat illum statum. Cognitio mali post lapsum intelligitur per esum ex arbore scientiae boni ¹ et mali. Amor, in quem homo creatus est, est amor proximi, ut ei velit ita bene sicut vult sibi, et magis, et quod in jucundo amoris illius sit, dum ei benefacit, vix aliter quam est parens erga infantes. Hic amor est vere humanus, nam in illo est spirituale, per quod distinguitur ab amore naturali, qui est animalibus brutis: si homo in illum amorem nasceretur, non nasceretur in caliginem ignorantiae, sicut nunc omnis homo, sed in quandam lucem scientiae et inde intelligentiae, ² in quas etiam brevi veniret; et quidem primum reperet sicut quadrupes, sed cum insito conatu erigendi se super pedes; nam quantumvis quadrupes, usque non deorsum ad terram demitteret faciem, sed antrorsum ad coelum, ac erigeret ³ se, ut quoque posset sursum.

V: