Luka 10

¹ Cha hnôh lâna chata Abeipa ta chyhsa hropa sysari nata panorao ta, a sie nawpa khih to liata nata su to liata a hmia lâta pano lymâ ta tuah ta."

² Ama hnohta, “Sâh hria awpa hluh kaw ta, châhrasala a hriatuh awpazy ama chyh; chatanachata a sâh hria awpa ta a hriatuhpazy tuah awpa ta sâh hria Beipa liana chata a haw teh u.

³ Sie ula, moh teh u, changie hry liata mietahkupa taw hawhta ei cha tuah ei hih.

⁴ Tâkâ sahria zy, sahria zy, pheikyzy a chei leipa ula; lâthlôh liata ahyrai anaoh khah u.

⁵ O namâ ngiana maihta a hmiatua chai ta, ‘He o liana heta thlahlôhna vaw tlô se!’ tah muh vy.

⁶ Cha liana chata thlahlôhna chyhsa a y khiahtala, nama thlahlôhna bie cha a chô liata a y thlâh ha aw; a y vei khiahta deikua cha nama chô liata a vaw kua heih aw.

⁷ Cha o liana chata y thlâh ha ula, ama cha piepa maih cha niepa ta bawh teh u, raihriatuhpa cha hlao a hmô tlâh châ ta; o to maihta kiah chakhy ngâ khah u.

⁸ Khih namâ ngiana maihta ama châ ly khiahtala, ama cha tôpa maih cha nie teh u;

⁹ ama khih liata tlâh leipa a ypazy chhao patlâhsa ula, ama hnohta, ‘Khazohpa Khihnarâh nama kiapa liata a tlô haw,’ tah teh u.

¹⁰ Khih namâ ngiana maihta ama châ ly leipa khiahtala, ama ngiathliah liata zy sie ula, ‘Nama khih buhchado eima pheipazah liata a baipazy chhao he, nama chô liata eima chatho thlu hih; châhrasala Khazohpa Khihnarâh nama kiapâh liata a tlô haw, tahpa pahno muh vy,’ tahpa ta.

¹² Ei cha tah ei chuh, cha noh liana chata, cha khihzy pasa tao awpa hlâna chata Sawdawma khih pasa tao awpa cha a zi tlao a y via aw.

¹³ “Kôrazi na hu a po na! Besaida na hu a po na! Nâmo liata hmonoâhpa taopazy kha Tyre nata Sidaw khih liata taopa châ sala, lathopoh a bupa ta buhchâ hry liata atyuhpa ta amâ rôh ha bâ aw.

¹⁴ Châhrasala pachiana noh liana chata nama pasa tao awpa hlâna chata Tyre nata Sidaw khih pasa tao awpa a zie tlao a y via aw.

¹⁵ Nâ Kapynia, avâ taihta chalopa na châ aw tlyma? Athihpa khih taihta châti pathlapa ta na y aw mâ tâh.

¹⁶ “Ahyrai nâmo bie a theipa cha, keima bie a theipa na a châ, ahyrai cha khoh leipa cha, keima nâ khoh leipa na a châ, ahyrai kei na khoh leipa cha, nâ tuahtuhpa a khoh leipa na a châ,” tah ta.

¹⁷ Sysari nata panozy cha aly ngaitapa ta vaw kua ei ta, “Abeipa, ahripazy chhao nâma moh vâta eima reisai ta ama y!” tah ei ta.

¹⁸ Ano chata ama hnohta, “Dôhla pathliepa hawhta Sâtâ avâ tawhta a za tlapa ei hmô.

¹⁹ Nahthlie teh u, parihzy, râhcha-iazy tly theina nata khakhaipa hmotaotheina zydua chô liata bie ei cha pie ei; khâpa hmahta cha pasasa aw veih ei.

²⁰ Châhrasala ahripazy nâma bie ta ama ypa vâna heta aly khah u; avâ liata nama mohzy ropa a châpa vâta tlao aly teh u,” tah ta.

²¹ Cha dawh liana tlai chata Zisu ta Thlahpa Pathaihpa liata aly ngaitapa ta, “Hy ei Paw, alei nata avâ Beipa, nâma ta chyhsa sopa nata chyhsa novâhpazy hnohta he bie he phih chi ta, hawsaihzy hnohta na phuahpa vâna heta ei cha palyupalih na, ei Paw, cha hawhta tao awpa cha na pachâna liata a phapa ta a châ.

²² Ei Paw ta ato zydua eina pie haw; Sawchapawpa cha ahyma a châ, Paw leipa ta cha ahyhmah ta pahno veih ei, Paw chhao cha ahyma a châ Sawchapawpa nata ama hnohta Sawchapawpa ta a phuah khonazy dei leipa ta cha ahyhmah ta pahno veih ei,” tah ta.

²³ Pachupazy lâta a vaw heih ta, a ru lâta, “Nama hmo hmôpazy he a hmôna mozy cha a vâhnei kaw na!

²⁴ Ei cha tah ei chuh, hrohsopa hluhpizy nata abei hluhpizy chhaota nama hmo hmôpazy he hmô khoh kaw tyh ei ta, châhrasala hmô tlôh leipa ei ta, nahkhao ta nama theipazy chhao he thei khoh kaw tyh ei ta; châhrasala thei tlôh leipa ei ta,” tah ta.

²⁵ Chatawhcha Ryhpa pachutuhpa ahy tlyma a duah ta, ano pasia nawpa ta, “Pachutuhpa, chhâzaw hrona hnei nawpa ta kheihta e ei tao aw?” tah ta.

²⁶ Ano chata a hnohta, “Ryhpa châbu liata khâpa ropa e a y? Cha liana chata khâpa e na reih tyh?” tah ta.

²⁷ Ano chata, “Abeipa na Khazohpa cha na pathipalôh tlokhuh ta, na thlahhmipa tlokhu ta, na thatlôna tlokhu ta, na palôhrupa tlokhuh ta kyh na pachâ awpa a châ; nâma kyh nâ pachâpa hawhta na vaihzy chhao kyh na pachâ awpa a châ tahpa hih,” tah ta a chhy ta.

²⁸ Ano chata a hnohta, “Nâ chhyna a su kaw na; cha hawhna chata tao la, na hroh aw,” tah ta.

²⁹ Ano deikua chata thai a pachâsa a chhuah ta, Zisu hnohta, “Cha khiahtala ei vaihzy cha ahyma a châ?” tah ta.

³⁰ Zisu ta a chhy ta, “Ahy tlyma Zerusale khih tawhta Zerikô khih lâta zu ta, phihmâhpazy a tyh ta, cha chyhsazy chata a chysiazy pahluhpa ei ta, thata tu ei ta, thi daihmâpa ta siesai haw ei ta.

³¹ Theihthaipa ahy tlyma cha lâthlôh lâna chata phie zu ta; a hmopa ta nahta lâkiah lâta chahri ha ta-

³² Cha hawhna hra chata Livai chi chyhsa pakha chhao cha su cha za tlô ta, a hmôpa ta nata lâkiah hiakha lâta chahrih hra ta.

³³ Anodeikuacha Samari chyhsa ahy tlyma khitly a siena liata a yna cha za tlô ta; a hmopa ta nahta ngiachhie ngaita ta,

³⁴ a hnohta vawh ta, a hmahzy cha sathaw nata kresawti bao ta, chahry ta; ano sa kiapa chô liata pakiasa ta, khichhai bu lâta pangaikhei ta, mohôh ta.

³⁵ A mylâ chata tâkâ miano pachhi ta, khichhai bu vaihtuhpa liata pie ta. “Vaw mohôh la; he leipa chhao heta na hryunazie hawhta ei vy heih tita ei cha thô heih aw,” tah ta.

³⁶ Cha chyhsa pathôh hry liana chata, phihmâhpa sahlao a tyhpa a vaihzy cha ahy e a châ nahta na pangiasa?” tah ta.

³⁷ Chatawhcha ano chata, “A ngiachhietuhpa chuh,” tah ta. Zisu ta a hnohta, “Nâma chhao cha hawhna hra chata kei tao teh,” tah ta.

³⁸ Ama khitlyna liata khih kheihawhpa tlyma a ngia ei ta; chanô pakha a moh Martha ta ano o liata vaw patlôsa ta.

³⁹ Cha chyhsa cha narô pakha hnei ta, a moh cha Mari a châ, ano cha Abeipa phei thaby liata a tyuh ta, a bie nahthlie ta.

⁴⁰ Martha deikua cha a chakaona kyh ta tymâ kawpa ta y ta; chatanachata a hnohta vawh ta, “Abeipa, ei narônô ta keima deita chakao awpa ta eina paysapa he a pei tah va chi ma? Eina bao awpa ta bie pie teh,” tah ta.

⁴¹ Abeipa ta, Martha, Martha, hmo hluhpi pachâ chi ta, patypamâpa ta na y hih;

⁴² hmo miakha deita a byuh pachai, Mari ta tovyuh phapa cha a tlyh ta, cha cha lapa awpa châ vei,” tahpa ta a chhy ta.;