Hosia 7

¹ Ei chyhsazy seichâna tawhtapa ei chhihtha tina chata, Izarel patla a chhuah na ta, Ephrai hmoparaona a vaw lâ, Samari moleina chhao; dô hmâh ei ta, chho lâta paruna a vaw ngia ta, khôtho lâta phihmâhpa sahlao ta tlô ei ta.

² Ama hmoparaona zydua ei thei thlâh haw tahpa ama palôh ta pachâ veih ei. Atahmâ cha ama hmotaopazy tlaita padô haw ta, Ei hmiakô liata ama y.

³ Ama hmoparaona ta beichaipa palysa hra ei ta, ama haipa bie ta molaipazy palysa hra ei ta.

⁴ Ama zydua ta a pheipa châ ei ta; viahchhâ taotuhpa ta lômathu a pasâh, viahdie a nypa thyu hlâta, pathyusapa hlâta a chalihsai chypa hawhpa ama châ.

⁵ Eima beichaipa noh liana chata molaipazy cha kresawti pachâpahia ngaitapa ta a parisa ei ta; ano chata eilawtuhpazy hnohta a ku pazawh ta.

⁶ Aru lâta amâ byh nota ama pathipalôh cha lômathu hawh tlaita tao haw tlôh ei ta; ama pathi-iapa cha zâkhidei a daih tyh; my ta mei paleih hawhta ia ta.

⁷ Lômathu hawh tlaita sa khai ei ta, ama pachiatuhpazy pahleipadia ei ta. Ama beichaipa maih pao ei ta; ama hry liata ahy hmah na padopa y veih ei.

⁸ Ephrai hra cha pho hropa hryta a pahlao ta; Ephrai cha viahchhâ palie leipa a châ.

⁹ Khichhaipazy ta a tha niepa ei ta, ano chata pahno vei; sâ pawhpa a lâ hôlô ta, ano chata pahno vei.

¹⁰ Izarel rôhnahna chata a hmiakô liata pahnosa tyh ta; châhrasala he zydua liana chhao heta ABEIPA ama Khazohpa lâ cha aheih leipa ei ta, ano cha tlua hra veih ei.

¹¹ Ephrai cha vachhuh palôh leipa, novâhna a hnei leipa hawhta châ ta, Izi lâ padô ei ta, Asuria lâta sie ei ta.

¹² Ama siepa cha ama chô liata ei sao parai aw na ta; avâ liata pavaw a zawpa patupa hawhta patu aw na ta; âmo apakhypa sahlao ta ama thei hawpa hawhta âmo ei hrie aw.

¹³ Ama hu a po na, kei tawhta viavi syulyu haw tlôh ei ta! Leidiana ama chôta a tlô na, ei chô liata aty haw tlôh ei ta! Kei chata pachha khoh ei na ta, âmo deikua cha haipa eina rei thlu ei.

¹⁴ Ama palôh hmeiseih ta na pado leipa ei ta, ama rakhô liata amâ chiaburapa tlao a châ; sa nata kresawti chata a pakhy ei ta,ei chô liata aty tlôh ei ta.

¹⁵ Kei chata ama bâhzy pachupa ta thapatlô na ta, châhrasala ei chô liata pha leipa ama pachâpady.

¹⁶ Baal lâta a heih ei ta, Libaw hmâ tlâh leipa hawhta châ ei ta, ama molaipazy cha ama sâlâna vâta zaozi ta ama pao aw. He he Izi râh liata pahneichhipa ama châna a châ aw.