Ezekiel 46

Study

          |

1 “He tana heta Abeipa KHAZOHPA chata a tah: Dôhpachhôh viapa chhikao nochhi lâ a heihpa cha, raihria noh charu chhôh cha a khaw aw ta; pahânoh liata pahypa ta y aw ta, thla thiehpa noh liana chhao chata pahypa ta a y hra aw."

2 Abeisaw cha chhikao o aikah liata a ngia aw ta, chhikao o pâhchhô chatipa kiapâh liata a duah aw ta. Theihthaipazy châta a raona hlâna nata adyhna hlânazy cha a chhuahdy aw ei ta, a ngiana chhikao o chhôhpadâhpa liana chata Khazohpa a chhy aw. Chatanachata pua aw ta, ochhi deikua cha zâlâ taihta khawpa ta châ aw vei.

3 A râh chyhsazy deikua chata pahânohzy nata thla thiehpazy liana chata cha chhikao o a ngiana kiapâh liana chata ABEIPA hmiakô liata Khazohpa ama chhy aw.

4 Pahânoh ta abeisaw ta ABEIPA lâta a raona hlâna a hlâ awpa cha mietahkupa taw seina a hnei leipa pô charu nata mietahkupa tôhpa seina a hnei leipa pô kha lymâ liata niepa hlâna ephah hmo kha, mietahkupa taw liana chata a pie theipa hawhta niepa hlâna ephah hmo kha liata sathaw hin hmo kha lymâ a châ aw.

6 Thla thiehpa noh liana chata viahchao tôh dawpa seina a hnei leipa pô kha, mietahkupa taw pô charu nata mietahkupa tôhpa pô kha châ aw ta, seina a hnei leipa sai ama châ awpa a châ;

7 niepa hlâna achhuahdy aw ta, viahchao tôhpa liata ephah hmo kha, mietahkupa tôhpa liata ephah hmo kha, mietahkupa tawzy liata a pie theipa hawhta nata ephah hmo kha liata sathaw hin hmo kha a châ awpa a châ.

8 Chatawhcha abeisaw cha a ngiana lâta chhikao o aikah lâta a ngia aw ta, cha lâna lilaw chata a pua heih awpa a châ.

9 “A râh chyhsazy deikua cha kyhchhi noh liata ABEIPA hmiakô liata amâ vy khiahtala Khazohpa achhy awpa ta maw lâ chhikao o liata a vaw ngiapa cha chho lâ chhikao o lâ pua aw ei ta; chho lâ chhikao liata a vaw ngiapa cha maw lâ chhikao o lâta ama pua aw; amâ ngiana chhikao o lâna chata ama kua awpa châ leipa ta a hmia lâta ama sie lymâ awpa tlao a châ.

10 Amâ ngia nona chata abeisaw cha ama hry liata a ngia hra aw; ama pua nota a pua hra awpa a châ.

11 “Kyhchhi nozy nata kyhchhipipa zy liana chata niepa hlâna cha viahchao tôh dawpa pô kha liata ephah hmo kha, mietahkupa tôhpa pô kha liata ephah hmo kha, mietahkupa tawzy liata a pie theipa hawhta, ephah hmo kha liata sathaw hin kha lymâ a châ awpa a châ.

12 Abeisaw ta lôhthai ta hmohlâpa a hlâ awpa khiahtala, raona hlâna tlyma, adyhna hlâna tlyma, ABEIPA lâta lôhthai ta hmohlâpa hawhta a hlâ khiahtala, nochhi lâ hei ochhi cha pahypa aw ta; pahânoh ta taopa hawh hra ta raona hlânazy, adyhna hlânazy a chhuahdy aw. Chatanachata pua aw ta, a pua tawhta ochhi cha ama khaw aw.

13 “Noh tato ta ABEIPA lâta raona hlâna châta mietahkupa taw kô khapa seina a hnei leipa hmâh aw chi ta; my tato ta na hmâh awpa a châ.

14 Chatawhcha my tato niepa hlâna a chhuahdy aw chi ta, ephah su charu ta pachhaih ta su kha nata sathaw hin hmo kha su thôh ta pachhaih ta su kha viahdie di ngaitapa padâna châta; cha cha chhâzaw ta ABEIPA lâta niepa hlâna yzie awpa a châ.

15 He hawhna heta raona hlâ tyh awpa ta mietahkupa taw niepa hlânazy, sathawzy my tato ta amâ chhuahdy awpa a châ,” tahpa ta.

16 “Abeipa KHAZOHPA chata he tana heta a tah: Abeisaw chata a sawchapawpazy ahy hnohta rai ano ryutona tawhta hmosaipa piepazy a pie khiahtala, ano sawchapawpazy eih châ aw ta, ama ryutona hneina a châ.

17 Châhrasala a ryutona liatahpa cha a chakaotuhpa ahy tlyma hnohta hmosaipa piepa a pie khiahtala khotalaina kô taihta hnei aw ta; cha liana chata abeisaw hnohta a pakua heih awpa a châ; ano ryu deikua cha a sawchapawpazy eih a châ aw.

18 Cha leipa chhao abeisaw ta chyhsazy ryuto a chhupa awpa châ leipa ta, ama hneina tawhtapa a papua awpa châ hra vei; ano hneina liatahpa cha a sawchapawpazy hnohta ryuto a pie awpa a châ, a hneina tawhtapa ei chyhsazy papaisapa ta ama y lei nawpa ta,” tah ta.

19 Chatawhcha chhikao o kâ lâ a ngiana theihthaipazy chata chhôhpadâh pathaihpa maw lâ liana chata nâ chhi ta; a chhôchâ notla lâ chhâna chata su vaw y ta.

20 Chatawhcha ano chata ei hnohta, “He he theihthaipazy ta hmo paraona hlâna nata moleina hlâna ama chhona su, niepa hlâna ama pa-una su a châ hih, dôhpachhôh khôtho viapa lâta puakheipa ta chyhsazy cha chyhsa pathaihpa ta ama tao lei nawpa ta,” tah ta.

21 Chatawhcha dôhpachhôh khôtho viapa lâna chata nâ chhi ta, dôhpachhôh ki palih liana chata na pasiesa ta; a dôhpachhôh ki maih liana chata dôhpachhôh y heih ta,

22 dôhpachhôh ki palih liana chata dôhpachhôh a doh dy sypalih, a hâ dy sythôhpa y ta; cha a ki liatahpa miapalihzy cha â khopa sai a châ.

23 Cha su palih chhôh liana chata a chheipâh ta alô parai ei ta, cha tlâh ry liana chata a chheipâh ta chhona awpa lômathuzy y ta.

24 Chatawhcha ano chata ei hnohta, “Hezy he chhona o pipa chakaotuhpazy atheihna sa ama chhona awpa su a châ hih,” tah ta.