Puasaina 24

¹ Chatawhcha ano chata Mawsi hnohta, “Nâma chhao, Arawna chhao, Nada chhao, Abihu chhao, Izarel machâ sysari chhaota ABEIPA lâta a khy ula, lâhla tawhta a vaw naoh muh vy.

² Mawsi cha ano deitata ABEIPA lâta a vy sala; âmo sahlao deikua ch a vaw hnia kha ei se, zawpizy chhao a hnohta a khy kha ei se,” tah ta.

³ Mawsi cha zu ta, ABEIPA bie zydua nata ryureina yzie awpa zydua cha zawpi hnohta za reih ta; chatawhcha chyhsa zydua chata, “ABEIPA reipa zydua cha, eima tao aw na,” tahpa ta a raopa ta a chhy ei ta.

⁴ Mawsi ta ABEIPA bie zydua cha ro khai ta, a mylâ my ta thyu ta, tlâh thaby liana chata maisâh tao ta, chatawhcha lôbô sâhrawhleino bô ta,

⁵ Izarel pathlazy hry liata satliapazy tuah ta, cha chyhsazy chata ABEIPA châta a raopa hmohlânazy hlâ ei ta, chatawhcha adyhna atheihna ta viahchao tôhpazy ta a theih hra ei ta.

⁶ Mawsi ta cha thisaih khophie a hropa cha maisâh liata hie ta.

⁷ Chatawhcha biehraina châbu cha la ta, zawpizy theina liata reih ta, âmo chata, “ABEIPA ta a reipa zydua cha tao lymâ aw pi ta, chyhsa rei a ngiah ngaitapa eima châ lymâ aw,” tah ei ta.

⁸ Mawsi ta thisaih cha la ta, zawpizy hie ta, “Pachâ teh u, ABEIPA ta he bie zydua kyh liata nama hnohta bie a vaw hraih haw, biehraina thisaih a châ hih,” tah ta.

⁹ Mawsi nata Arawna, Nada nata Abihu nata Izarel machâ sysari cha khy ei ta,

¹⁰ Izarel Khazohpa cha hmô ei ta; chatawhcha a pheipazah ry cha saphai lô paryhpa hawh tlaita a pathaihzie cha avâ pathai khaipa hawhna tlai he châ ta.

¹¹ Izarel pathlazy hry liata, mo laipa sahlaozy chô liana chata a ku pathla vei; Khazohpa cha hmô ei ta, niepa ta doh chyu ei ta.

¹² ABEIPA ta Mawsi hnohta, “Tlâh liana heta ei hnohta a khy la, vaw y teh; chatanachata zawpizy na pachu awpa ta lôphiapa liata ryhpa nata biepiepa ei rop cha ei cha pie aw,” tah ta.

¹³ Chatawhcha Mawsi nata a chakaotuhpa Zawsua cha thyu ei ta, Mawsi cha Khazohpa tlâh lâna chata khy ta.

¹⁴ Ano chata machâzy hnohta, “Nâmo hnohta eimâ vy heih hlâ lei cha, he liana heta maniah vaw hâ thlâh ha muh vy; Arawna nata Hura nama hnohta ama y hih; ahyrai ta biepeipa, khâpa tlyma nama hnei khiahtala âmo hnohna heta namâ vy tyh aw,” tah ta.

¹⁵ Chatanachata Mawsi cha tlâh lâna chata khy ta, chatawhcha meihdo ta tlâh cha pahly khai ha ta.

¹⁶ ABEIPA rôhnahna cha Sinai Tlâh liana chata y thlâh ha ta, meihdo chata noh charu chhôh cha khu ta; a noh sari noh chata meihdo tawhta Mawsi cha vaw aw ta.

¹⁷ Izarel pathlazy mohmô liana chata ABEIPA rôhnahna a luahnazie cha tlâh laki liata hmo a kâpa mei hawh tlaita châ ta.

¹⁸ Mawsi cha meihdo hry liana chata a kei ngia ta, tlâh liana chata kaw kiah ta, chatawhcha Mawsi cha tlâh liana chata noh sypalih nata zâ sypalih y ta.