2 Abeizy 6

¹ Hrohsopa sahlao sawchapawpa zy chata Elaisa hnohta, “Moh teh, na kiapâh liata eimâ tyuh pahmaohpa he, eima châta a cha-ie tu ha ta.

² Zawdah lâta zu aw pi ta, cha liata tho cha za la chyu aw pi ta, eima tyu pahmaona awpa ta cha liana chata za tao ei sih y,” tah ei ta. Ano chata a chhy ta, “Sie teh u,” tah ta.

³ Chyhsa pakha chata, “Palôhtlâhpa ta y la, na chakaotuhpa zy hnohta sie hra mah y,” tah ta. Ano chata, “Ei sie hra aw na,” tahpa ta a chhy ta,

⁴ ama hnohta sie hra ta. Zawdah ama tlô nahta tho cha thlu ei ta.

⁵ Chyhsa pakha ta tho a thlu nota, ahrei cha ti liata tla haw ta; ano cha, “Cha rimâ cha, ei zibeipa! Eima hlâpa a châ mâ tâh,” tahpa ta aw ta.

⁶ Khazohpa chyhsa chata, “Khataih liata a tla?” tah ta. Ano chata a tlana pamosa ta, thody chhawh ta, cha liana chata za thy ta, thua cha a kaw pho haw ta.

⁷ Ano chata, “A huah teh,” tah ta, kei paza ta a huah haw ta.

⁸ Suria beipa ta Izarel zy adyuh ta, “Cha su, kha su liana khata a byh ei suh u,” tahpa ta a chakaotuhpa zy chhohia ta.

⁹ Khazohpa chyhsa chata Izarel beipa hnohta, “Cha hawhpa su lâ sie lei awpa ta a chado teh, cha liana chata Suria sahlao amâ zu aw,” tahpa ta bie ta ta.

¹⁰ Izarel beipa chata Khazohpa chyhsa ta a vaw chho awpa su cha chyhsa kei pamoh pathlisa tyh ta, cha liana chata ei kha, ei no dei châ leipa ta a vaw paboh tyh ta.

¹¹ Cha kyh liana chata Suriabeipapathipalôh cha a nôpo kaw ta; a chakaotuhpa zy cha aw ta, ama hnohta, “Eima hry liata chyhsa ahy he ma Izarel beipa chhâh a châpa na chho khoh aw veih ei chi mâ?” tah ta.

¹² A chakaotuhpa zy hry liata chyhsa pakha chata, “Ahyhmah ta cha ma pi, hy abeipa ei zibeipa y; Izarel râh liata a ypa hrohsopa Elaisa heta na chhôhpadâhpa chhôh liata na reipa zy he Izarel beipa a chho lymâ tyhpa tlao a châ,” tah ta.

¹³ Ano chata, “Khataih liata ma a y, kei tlua teh u, ei patusa aw,” tah ta. “Dôtha khih liata a y,” tahpa ta chho ei ta.

¹⁴ Chatanachata arâ zy, talaili zy, pheisaih hluhpi zy cha lâna chata tuah ta; zâ ta vawh ei ta, khih cha padô ei ta.

¹⁵ Khazohpa chyhsa chakaotuhpa cha mydi ta thyu ta, a kei pua nahta, pheisaih sahlao chata arâ nata talaili chhaota, khih vaw chadô thlâh ha ta. A chakaotuhpa chata, “Cha rimâ cha, ei zibeipa! Kheihta eima tao aw?” tah ta.

¹⁶ Chatawhcha ano chata, “Chi khâ, âmo chhâh a châpa hlâta cha keimo chhâh a châpa eima hluh via mâ tâh,” tah ta.

¹⁷ Elaisa chata thlahchhâ ta, “ABEIPA y, a hmô thei nawpa ta a mo padeihsa mah y,” tah ta. ABEIPA ta cha satlia mo cha padeisa ta, chatanachata hmô haw hra ta; Elaisa kiapâh liata tlâh cha mei talaili nata arâ ta bie thlâh ha ta.

¹⁸ Ano lâta amâ zu nahta Elaisa ta ABEIPA lâta thlahchhâ ta, “He sahlao ama mo pachaosa mah y,” tah ta. Elaisa ta ama hnohta, “He he cha lâpi châ vei, he he cha khih chhao châ hra vei; na zi teh u, nama tluapa chyhsa lâna chata ei cha chhihtha aw ei,” tah ta. Chatanachata Samari lâta chhi haw ei ta.

²⁰ Samari khih chhôh ama tlô nahta, Elaisa ta, “ABEIPA y, he sahlao heta ama hmô thei nawpa ta ama mo vaw padeisa mah y,” tah ta. ABEIPA ta ama mo cha vaw padeisa ta, hmô haw ei ta Samari khih chhôh chata vaw y thlâh haw ei ta.

²¹ Izarel beipa chata ama sahlao cha a hmô nahta Elaisa hnohta, “Ei pâ ei thie aw ei mâ? Ei thie aw ei mâ?’ tah ta.

²² Ano chata a chhy ta, “Thie bao va, na zaozi nata na libaw ta na sei patupa zy cha na thie aw mâ? Viahchhâ nata ti vaw tôh la, niepa ta doh ei sala, ama zibeipa lâta a di heih ei se,” tah ta.

²³ Chatanachata niepa thata a chhuahnohpa ta; niepa ta ama doh khai nahta pasiesa khai haw ta, ama zibeipa lâta a di haw ei ta. Suria sahlao zy cha Izarel râh lâna chata hra sie khao veih ei.

²⁴ Cha tawhna chata Suria beipa Benhada ta a pheisaih zydua pakhy ta, Samari khih padô ta.

²⁵ Samari liana chata chakâhna ru ngaitapa tlô ta, khâchâ padô ei ta, alâ luh he tâkâ sycharie sekel ta zuah ei ta, vachhuh ie he kab* su palih ta pachhaih ta su kha tâkâ sekel pangawh ta zuah ei ta.

²⁶ Izarel beipa cha kuh tlâh liata a sie hai nota chanô pakha ta. “Hy beipa, ei zibeipa, na bao teh!”tahpa ta vaw awsao ta.

²⁷ Ano chata, “ABEIPA ta a cha bao leipa ta cha keima ta khataih tawhtapa ta ma zua ei cha bao aw? Sawhri tawhtapa ta tlyma, kresaohna khaoh tawhtapa ta tlyma a châ aw mâ?” tah ta.

²⁸ Beipa ta a hnohta, “Khâpa na tah tlyma,” tah heih ta. Ano chata a chhy ta, “He chanô heta eihnohta, ‘Atanoh he na sawchapawpa eima nie awpa ta thyu teh, my lâ kei sawchapawpa he eima nie hra aw,’ tah ta.

²⁹ Chatanachata ei sawchapawpa cha pasyu pi ta, nie pi ta. A mylâ ta cha keima ta a hnohta, ‘Na sawchapawpa cha eima nie awpa ta thyu hra teh,’ tah na ta; a sawchapawpa cha a nyu haw,” tah ta.

³⁰ Beipa ta cha chanô bie reipa cha a thei nahta a poh hrie ta; kuh tlâh liata a sie hai nota châ ta, zawpi zy chata moh ei ta, a sapa a daihpa lâna chata latho poh a vaw bu thlâh ha ta,

³¹ ano chata, “Atanoh he Shapha sawchapawpa Elaisa heta a luh a bô thlâh ha khiahtala Khazohpa ta ano tao ta na tao sala, cha hlâta tha via chhao ta,” tah ta.

³² Elaisa cha ano o liata a tyuh ta, machâ sahlao chhao a tyuh hra ei ta. Beipa chata ano lâta chyhsa pakha tuah ta; châhrasala a chyhsa tuapa chata a kei tlô hlâta machâ sahlao hnohna chata, “He lianycheituhpa sawchapawpa heta ei luh la awpa ta chyhsa a vaw tuah tahpa nama pahno hra ma? Achyhsa tuapa cha a vaw tlô pata nahta ochhi khaw ula, ochhi liana khata khâchâ pakhâ teh u. A hnôh lâna chata a zibeipa phei pyu a thei ngyu vei mâ?” tah ta.

³³ Cha hawhta âmo a chho hai nona chata Abeipa cha vaw tlô ta, beipa chata, “He hmo pha leipa he ABEIPA a vaw tuapa a châ hih! ABEIPA cha khazia e ei hâ khao aw?” tah ta.