2 Thatihzy Rona 9

¹ Sawlawmaw moh pathâh zie Sheba beinô ta a vaw thei nahta Sawlawmaw cha bie khia ngaitapa ta pasia a chhuahpa ta, zituhpa hluhpi a chhipa ta, râraoseihpa zy ta khâpa leipa rohpahâhpa zy nata ngôh hluhpi nata lôsôhpa zy phaohpa ta Zerusale lâ sie ta. Sawlawmaw lâta a kei tlô nata a palôhrupa liata a ypa zydua papua khaipa ta bie a chho ta.

² Sawlawmaw chata a bie hiahripa zydua cha a chhy khai ta; Sawlawmaw chata a chhy thei leipa rai y leipa ta.

³ Sawlawmaw sozie zy, o sapa zy,

⁴ a tlâhkhai liata niepa zy, a pawhrâhpa sahlao atyunazie zy, a chakaotuhpa sahlao chakaona zie zy, amâ tobinazie zy, a nyu a pietuhpa zy nata ama tobizie zy, ABEIPA o lâta a khyna zy, Sheba beinô ta a hmô nata pachâna pahno khao leipa ta.

⁵ Ano chata abeipa hnohta, “Na hmotaopa zy nata na sozie a pathâhpa ei râh liata ei vaw theipa cha a do chaimâh na,

⁶ châhrasala keima moh tlaita ei cha vaw hmô hlâta cha ama reipa dei cha zo tyh leipa na ta; na sona rôhnah zie khophie chhao na vaw chho veih ei; na moh pathâhpa ei vaw theina zie cha khô syulyu chi ta.

⁷ Na chyhsa zy cha nohhlaopa ta, he na chakaotuhpa zy na kiapâh liata a y tyhpa, na sona bie a nahthlie tyhpa zy he ama nohhlao kaw dia!

⁸ ABEIPA na Khazohpa na chô liata a lypa ano abei chata a abeidyuchhai liata cha patyusatuhpa, ABEIPA na Khazohpa cha reithaipa ta y mawh sy! Na Khazohpa ta Izarel sahlao he chhâzaw ta pa-i awpa ta a kyh pachâ ta, chavâta ryureina nata sona kyh tao awpa ta ano abei ta a cha tao hih,” tah ta.

⁹ Chatanachata abeipa cha ngôh talent za kha nata syno nata khâpa leipa rohpahâhpa hluhpi nata lôsôhpazy pie ta: Sheba beinô ta Abei Sawlawmaw khâpa leipa rohpahâhpa a piepa hawhpa rai y vei.

¹⁰ Sawlawmaw chakaotuhpa zy nata Hura chakaotuhpa Ôphira tawhta ngôh a vaw phaotuhpa zy chhao chata algum tho nata lôsôhpa zy vaw phaoh ei ta.

¹¹ Chatawhcha abeipa chata algum tho cha ABEIPA o nata abei o dôh nawpa nata hla satuhpa zy chata totâ nata tlaipi ta tao ta; cha hawhpa cha Zudah râh liata, cha hlâta cha hmô beih veih ei.

¹² Sheba beinô ta hmo piepa rei leipa ta Abei Sawlawmaw chata a khôpa maih pie hra ta. Chatanachata a râh lâta a sahlaozy chhaota kua haw ei ta.

¹³ Chyhsa a pahlaopa sahlao nata sôhdaopa sahlaozy ama vaw ngiakheipa rei leipa ta, Sawlawmaw liata kô kha chhôhta ngôh a vaw ngiapa a hrina lâ cha ngôh talent za charu nata sycharu nata miacharu a châ,

¹⁴ Arabia bei zydua nata râh a vaotuhpa zy chata Sawlawmaw lâta ngôh zy, tâkâri zy vaw cheih tyh ei ta.

¹⁵ Abei Sawlawmaw chata ngôh paphiapa ta vyhphao laipa za no tao ta, vyhphao laipa miakha ta ngôh sekel za charu khô ta,

¹⁶ Chatawhcha ngôh paphiapa vyhphao za thôh tao ta; vyhphao miakha ta ngôh sekel za thôh khô ta; chazy cha Lebanaw thothi o liata soh ta.

¹⁷ Abeipa chata sianaoh abeidyuchhai rôhnah ngaitapa tao hra ta, ngôhsuapa ta pahu ta.

¹⁸ Abeidyuchhai liana chata a kiana chhâh charu zy, abeidyuchhai nata a pazaopa ngôh phei tlyna zy dyuchhai kâ lâ rairieh liata a tôh pahniehna zy, a tôh pahniehna kiapâh liata a duahpa chakeibarôhneipa nohthlahpa miano zy y ta,

¹⁹ kiana chhâh charu a kâ lâ rairieh chô liata chakeibarôhneipa pô hrawhleino a duah ta. Cha hawhpa cha khataih râh liata hmahta tao beih vei ei.

²⁰ Abei Sawlawmaw nyu zydua cha ngôh sai châ ta, Lebanaw thothi o liata hmobaoh zydua chhao ngôhsuapa sai châ ta; Sawlawmaw hro chhôhta tâkâri cha khâpa ta hmah a ngiah veih ei.

²¹ Abeipa chata balyh zy, Hura chakaotuhpa zy Tasi lâ sie tyhpa a kaolâhpa hnei ta; kô thôh padai lymâ ta Tasi balyh zy chata ngôh zy, tâkâri zy, sianaoh zy, veituh zy, pivaw zy vaw phao tyh ta.

²² Cha hawhna chata Abei Salawmaw chata khizaw abei zydua cha hneirôna liata nata sona liata khô khai ta.

²³ Khazohpa chata a pathipalôh liata a sopa a sona kyh cha nahthlie awpa ta khizaw abei zydua chata Sawlawmaw cha thata vaw pangai tyh ei ta.

²⁴ Kô chareih piena daihti hneipa ta, tâkâri hmobaoh zy, ngôh hmobaoh zy, poh zy, chariah chhaichhi zy, khâpa leipa rohpahâhpa zy, arâ zy, sabaitu zy vaw pie chyu tyh ei ta.

²⁵ Sawlawmaw chata arâ nata talaili sona su sâh palih hnei ta, arâ a kiapa thy kha nata sâh no hnei ta, chazy cha talaili sona khih liata zy, Zerusale liata abei hnohta zy paysa ta.

²⁶ Euphrate tawhta Philistina nata Izi râh taihta abei zydua chô liata a bei ta.

²⁷ Chatawhcha abeipa chata Zerusale liana chata a hluh ngaitapa vâta tâkâri zy cha alô hawhta pachâna taihta paysa ta, sidy tho zy cha bypi liata theiku tho hawh deita ta pachâna taihta pa ysa ta.

²⁸ Sawlawmaw chata arâ zy, Izi râh tawhta zy nata râh to tawhta zy vaw cheih tyh ei ta.

²⁹ Sawlawmaw thâtih hropa zy cha â thaona tawhta a chhâna taihta, hrohsopa Natha châbu liata zy, Shilôh chyhsa Ahizah chhochhieliena châbu liata zy, Neba sawchapawpa Zerôbaw kyh liata hrohsopa Idô aluahna châbu liata zy ropa ta châ vei ma?

³⁰ Sawlawmaw cha Zerusale liata Izarel chyhsa zydua chô liata kô sypalih a bei ta.

³¹ Sawlawmaw cha a mahpaw zy hnohta a mô ta, a paw Davi khih liata pabu ei ta, ano vyuhpa ta a sawchapawpa Rehôbaw a bei haw ta.