1 Abeizy 8

¹ Chatanachata Sawlawmaw chata Izarel machâ sahlao zy ama pho pawhrâhpa zydua zy, Izarel pathla sahlao chhôhkha pawhrâhpa zydua cha Zerusale khih liata abeipa Sawlawmaw lâna cha Davi khihpi Zaio tawhta ABEIPA Biehraina Byh a kaw sy awpa ta pakhy chaimâh ta.

² Izarel mo zydua cha Ethani thla, thla sarina liana chata kyhchhina liata Abei Sawlawmaw lâta a pakhy chaimâh ei ta.

³ Chatawhcha Izarel machâ sahlao zydua cha a vy ei ta, theihthaipa zy chata Byh cha a sy ei ta.

⁴ ABEIPA Byh nata achhyna poh-o nata poh-o liata hmobaoh pathaihpa zydua a sy ei ta; chazy cha theihthaipa zy nata Livai chizy chata a kaw sy ei ta.

⁵ Chatawhcha Abei Sawlawmaw nata Izarel sahlao ahmaohpakhypa zydua, ano lâta a vaw pakhypa zy cha Byh hmiakô liata hmaohkha ta y ei ta, mietahkupa nata viahchao tôhpa a hluhna rei tiah leipa ta atheih ei ta.

⁶ Chatanachata, theihthaipa zy chata ABEIPA Biehraina Byh cha a yna awpa lâta a ngiakhei ei ta, o chhôh lâta supathaihpa, su pathaih chaipa liata cherubi zy mathlaw ry liana chata.

⁷ Cherubi zy chata Byh yna chô dady liana chata ama mathlaw pakai thlâh ha tlôh ei ta, cherubi zy chata Byh nata alâ zy cha khu khai ei ta.

⁸ Chatawhcha a lâzy cha seih kaw ta, a lâ pawhmao zy cha achhyna su hmiakô supathaihpa tawhna chata hmô theipa châ ta; anodeikuacha khôtho lâta cha a lâ vei; atahmâ taihta cha liana chata a y thlâh haw.

⁹ Izi râh tawhtapa puapa ta ABEIPA ta Izarel pathla zy hnohta bie a hraih no ta, Mawsi ta Hawriba liata alôphiapa miano a sopa dei leipa khata cha cha Byh chhôh liana chata khâpa hmah a hropa y vei

¹⁰ Chatawhcha theihthaipa sahlao zy cha su pathaihpa tawhta ama vaw pua pata nahta ABEIPA o cha ameih chata bie khai haw ta,

¹¹ chatanachata ameih vâna chata theihthaipa zy cha chakaotuhpa ta y thei khao leipa ei ta; ABEIPA rôhnahna ta ABEIPA o cha pabie khai ha tlôh ta.

¹² Chatanachata Sawlawmaw ta bie reih ta,“Hy ABEIPA avâ liata noh a paysatuhpa, châhrasala zohna chhakalupa cha na pahrâna châta a tlyh chi ta.

¹³ Na pahrâna awpa o chhâzaw ta na pahrâna awpa cha ei cha sapa haw,”tah ta.

¹⁴ Chatawhcha abeipa cha a vaw heih ta, Izarel sahlao ahmaohpakhypa zydua cha byhnâ awpa ta, chatanachata Izarel sahlao ahmaopakhypa zydua cha aduah ei ta.

¹⁵ Chatawhcha ano chata, “ABEIPA Izarel zy Khazohpa, ei paw Davi hnohta, ano pakah tlaita,

¹⁶ ‘Izi râh tawhtapa ei chyhsa Izarel zy ei chhihtha no tawhta, Izarel sahlao pho hry liata kheihawhpa khih he hmahta ei moh yna awpa o sa nawpa ta atlyh beih leipa na ta; anodeikuacha ei chyhsa Izarel zy hyutuhpa chata Davi he ei tlyh,’ tahpa ta a vaw reih tuhpa, ano ku tlai ta a vaw deichhytuhpa he reithaipa ta y mawh sy.

¹⁷ Ei paw Davi khata Izarel zy Khazohpa ABEIPA moh châta o sa a palôhrupa ta a chhuah tyh ta.

¹⁸ Châhrasala ABEIPA ta ei paw Davi hnohta, ‘Na palôhrupa ta ei moh châta o sa nâ chhuahpa tyh chi ta, he hawhpa palôhrupa na phaopa he a pha na;

¹⁹ châhrasala nâ ta la o cha sa aw va chi, na sawchapawpa na sa awpa chata ei moh châta o cha tlao a sa aw,’ vaw tah haw chi ta.

²⁰ Atahmâ ABEIPA ta a bie reipa cha pa-i haw ta; ABEIPA bie â vaw taih hawpa hawh tlaita, ei paw Davi su cha vaw pahrâ haw na ta, Izarel abeidyuchhai liana chata atyuh haw na ta, Izarel zy Khazohpa ABEIPA moh chata o cha vaw sa haw tlai na ta.

²¹ Cha liana chata Byh yna awpa su cha vaw rao haw na ta, cha liana chata Izi râh tawhtapa a chhihtha nota eima mahpaw zy hnohta bie a vaw hraipa ABEIPA biehrai cha y ta,” tah ta.

²² Chatawhcha Sawlawmaw cha ABEIPA maisâh hmiakô Izarel ahmaohpakhypa sahlao zydua hmiakô liata a duah ta, avâ lâ pazapa ta a ku pazawh ta;

²³ “Hy ABEIPA Izarel zy Khazohpa y, na chakaotuhpa ama pathipalôh zydua ta na mohmô liata a phapa ta a ypa zy hnohta biehrai patlôpa ta ngiachhiena a palâsa tyhpa;

²⁴ na chakaotuhpa ei paw Davi hnohta bietai a patlôtuhpa; a chô lâ avâ liata nata ary lâ alei liana heta nâma hawhpa he Khazohpa hropa rai y veih ei; chatatlyh, nâ ta na pakah ta bie reih chi ta, na ku ta patlôsa chi ta, atanoh ta a vaw y hawpa hawhna tlai heta.

²⁵ Chavâta hy ABEIPA Izarel zy Khazohpa y, na chakaotuhpa ei paw Davi hnohta, ‘Na pathlazy cha ei mohmô liata na ypa hawhta ei mohmô liata y hra awpa ta ama yzie liata amâ chado khiahtala ei mohmô liata Izarel zy abeidyuchhai liata atyuh awpa chi aw veih ei,’ tahpa ta bie nâ vaw taih hawpa kha patlô mah y.

²⁶ Chatanachata hy Izarel zy Khazohpa y, nâma ta na chakaotuhpa ei paw Davi hnohta bie na vaw rei hawpa kha ngiachhiepa ta patlôsa tlai mah y.

²⁷ “Châhrasala Khazohpa cha alei liana heta a pahrâ hmeihseih tlai aw ma? Avâ nata avâzy, avâ liata chhao nâ tlôh leipa châ ta; he o ei sapa liana heta nâ tlôh lei pachaih aw dia!

²⁸ Chatana chôta hy ABEIPA ei Khazohpa y, atanoh na chakaotuhpa ta a cha awna nata thlah a chhâpa he nahthliepa ta, na chakaotuhpa thlahchhâna nata hiana he vaw pachâ mah y;

²⁹ he su lâ heipa ta na chakaotuhpa heta thlah a chhâ awpa cha nahthliepa ta, nâma ta, ‘Cha liana chata ei moh cha a y aw,’ na tahna su tlai o lâna heta chhô nata zâ ta na mo na khaih thlâh ha tyh thei nawpa ta.

³⁰ Chatawhcha na chakaotuhpa nata na chyhsa Izarel zy heta he su lâ a heipa ta thlah ama chhâ tita ama hiana zy vaw nahthliepa tyh mah y; na pahrâna su avâ tawhta vaw nahthlie la, vaw nahthliepa ta a ngiathaih mah y.

³¹ “Chyhsa ahyrai ta a vaihzy chô liata hmoparaopa ta chhie pasasana taihta vaw byuh sala, he o liata na maisâh hmiakô liata vaw reih sala,

³² nâma ta avâ tawhta vaw nahthlie la, thyu la, moleipa cha ano luh chô lia tlaita a yzie pahniehpa ta thai lei pachâsapa ta, chyhsa siapa cha a siana hawhta pahlaosapa ta thai pachâsapa ta na chakaotuhpa zy ryurei pa mah y.

³³ “Na chyhsa Izarel zy heta na chô liata hmo ama paraopa vâta khakhaipa zy liata pahniepa ta ypa ta, nâ lâ a vaw heihpa ta, na moh reithaipa ta, he o liata thlahchhâpa ta ama vaw hiah khiahtala;

³⁴ nâma ta vâ tawhta vaw nahthliepa la, na chyhsa Izarel zy moleina cha a ngiahthai la, ama mahpaw zy râh na piepa lâna chata chhihtha heih mah y.

³⁵ “Na chô liata hmo ama paraopa vâta avâ popa ta vâsua zy a vaw suah vei tina chata he su lâ a heihpa ta, thlahchhâpa ta na moh reithaipa ta âmo rie na patheipa vâta ama moleina zy amâ rôh khiahtala,

³⁶ nâma ta avâ tawhta vaw nahthlie la, na chakaotuhpa zy nata na chyhsa Izarel zy moleina he a ngiahthai la, ama siena awpa lâpi phapa pahno tlôh aw chi ta; na chyhsa zy ama ryuto châta na piepa râh liana heta avâ pasuasa mah y.

³⁷ “Eima râh liana heta chakâhna zy vaw tlôpa ta, hri zy chareipa ta, chawhkaraina tlyma, khawsu tlyma, chângyu tlyma vaw ypa ta; ama khakhaipa zy ta ama khihpi chheipâh zy liata vaw chadôpa ta, hri kheihawhpa rai, pasana kheihawhpa rai a vaw tlô khiahtala;

³⁸ na chyhsa Izarel zydua hry liata âmo pathipalâh ta hri a ypa ta pahnopa ta, he o lâ a heihpa ta ku a vaw pazawhpa maih ta, thlahchhâna nata hiana ama vaw hlâpa maih cha,

³⁹ na pahrâna avâ tawhta nahthlie la, a ngiahthai la, na ama pathipalôh a pahnotuhpa, chyhsa to ama yzie lymâ hawhta pahmôsa mah y, (nâ la, nâ deita he chyhsa saw zydua pathipalôh a pahnotuhpa châ tlôh chi ta)

⁴⁰ eima mahpaw zy na piepa râh liata ama y chhôh zydua heta ama cha chi thei nawpa ta.

⁴¹ Na chyhsa Izarel zy a châ leipa pho hropa chyhsa na moh vâta, râh hlapapi tawhta a vypa chyhsa zy kyh chhao he

⁴² (na moh rôhnah ngaitapa zy, na ku thatlô ngaitapa zy, na bâh na pazawhna kyh zy he thei chyu tlôh aw ei ta), chazy chata he o lâ a heihpa ta thlah ama chhâ tita,

⁴³ nâ ta na pahrâna avâ tawhta vaw nahthlie la, pho hropa chyhsa chata a cha hiapa maih cha vaw taopa mah y; na chyhsa Izarel zy hawh hra ta khizaw liata pho to ta na moh pahnopa ta cha chipa ta, he ei o sâhpa heta na moh a phaoh tahpa ama pahno thei nawpa ta.

⁴⁴ “Na chyhsa zy ta ama khakhaipa zy cha na tuana lâ maih liata a vaw dyuh ei sala, na khihpi a tlypa lâ a heihpa nata na o châta o ei sapa lâ a heihpa ta ABEIPA lâta thlah ama chhâ khiahtala,

⁴⁵ ama thlahchhâna nata ama hiana cha nâma ta avâ tawhta vaw nahthlie la, ama bie liata y mah y.

⁴⁶ “Na chô liata hmoparaopa ta, (ahyhmah ta hmo a parao leipa y tlôh lei khâh ei ta) ama chô liata na pathi-iapa ta, khakhaipa ku liata piepa ta, khakhaipa râh hlapapi lâta tlyma, a hniapa lâta tlyma rai, sei ta a chhipa ta;

⁴⁷ seichâna ta amâ chhina râh liata a pahnopa ta, angiapachhipa ta, ‘Hmoparao pi ta, a do lei ngaitapa nata molei ngaitapa ta eima tao haw,’ tahpa ta seichâna ta a chhituhpa zy râh liata ama cha hiah khiahta cha;

⁴⁸ ama khakhaipa seichâna ta a chhituhpa zy râh liata ama pathipalôh hmeihseihpa nata ama palôhrupa hmeihseihpa ta nâ lâ a vaw heipa ta, ama mahpaw zy na piepa râh lâ nata na khihpi a tlypa lâ nata na moh châta ei o sâhpa lâ a heipa ta nâ lâ a heipa ta, na lâta thlah ama chhâ khiahtala;

⁴⁹ ama thlahchhâna nata ama hiana cha nâma ta na pahrana avâ tawhta nahthlie la, ama bie liata y mah y,

⁵⁰ chatawhcha na chyhsa na chô liata hmo a paraotuhpa zy nata nâ liata ama parao hapa kyh liata ama paraona zydua cha a ngiahthai la, seichâna ta a chhituhpa zy chata ama ngiachhie thei nawpa ta ngiachhiena pahneisa mah y,

⁵¹ na chyhsa, na ryuto, Izi râh tawhtapa thua patisana chhôh tawhtapa na chhithapa zy châ tlôh ei ta.

⁵² Ama cha padona maihta na vaw nahthlie awpa ta na chakaotuhpa hiana nata na chyhsa Izarel hiana lâta na mo na padeih thei nawpa ta.

⁵³ Hy Abeipa KHAZOHPA y, eima mahpaw zy Izi râh tawhta na chhitha nota, na chakaotuhpa Mawsi hmâpa ta na reipa hawhta na ryuto châta khizaw pho to hry tawhtapa na pananopa châ tlôh ta,” tah ta.

⁵⁴ Sawlawmaw ta ABEIPA lâta thlahchhâna nata hiana zydua a rei khai nahta, ABEIPA maisâh hmiakô liata pakhu paneihpa ta avâ lâ pazapa ta, ku pazawhpa ta a ypa cha thyu ta;

⁵⁵ a duah ta, ao paro ngaitapa ta,

⁵⁶ “A bietaipa zydua lymâ hawhta a chyhsa Izarel zy pahâna a pietuhpa ABEIPA cha reithaipa ta y mawh sy; a chakaotuhpa Mawsi hmâpa ta a bietaipa phapa zydua kha bie miakha hmah khâpa hrao leipa ta y vei.

⁵⁷ ABEIPA eima Khazohpa cha eima mahpaw zy hnohta a ypa hawhna khata eima hnohta y sala; maniah siesaipa ta maniah pathlua kha se;

⁵⁸ chatanachata a lâpi zydua a chhih awpa nata eima mahpaw zy bie a vaw pie hawpa hawhta a biepiepa zy, a bieraopa zy, a pachiapa zy a pyh awpa ta eima pathipalôh zy ano lâta a paheisa thei nawpa ta.

⁵⁹ ABEIPA he Khazohpa châ ta, ahy hropa hmah y veih ei, tahpa khizaw pho to ta ama pahno thei nawpa ta a chakaotuhpa kyh liata nata a chyhsa Izarel zy kyh liata a châna zie awpa lymâ hawhta a tao thei nawpa ta;

⁶⁰ he ei bie reipa zy ABEIPA hmiakô liata hiana ei tlôkheipa zy he, chhô nata zâ ABEIPA eima Khazohpa hmiakô liana heta y thlâh ha mawh sy.

⁶¹ A bieraopa hawhta y awpa nata a biepiepa zy zyh awpa ta ABEIPA eima Khazohpa lâna chata nama pathipalôh zy pha paki mawh sy, atanoh hawhna heta,” tahpa ta Izarel zy ahmaohpakhypa sahlao zydua cha byhnâ aw pata.

⁶² Chatawhcha abeipa nata Izarel sahlao zydua chata ABEIPA hmiakô liana chata hmaokha ta atheihna hlâ ei ta.

⁶³ Sawlawmaw ta ABEIPA châta a hlâpa adyhna hiana atheih nawpa ta viahchao tôhpa thy no nata sâh no, mietahkupa thy sykha nata thy no hlâ ta. Cha hawhna chata abeipa nata Izarel pathla zydua chata ABEIPA o hlâ ei ta.

⁶⁴ Cha noh ualua liana chata abeipa ta ABEIPA hmiakô liata dawh maisâh cha raopa hiana zy, niepa hiana zy, adyhna hiana sathaw zy so nawpa ta a chyh tupa vâta raopa hiana zy, niepa hiana zy, adyhna hiana sathaw zy hlâ tlôh ta.

⁶⁵ Cha nona chata Sawlawmaw nata Izarel sahlao zydua zawpi ahmaohpakhypa hluh ngaitapa Hama khih a ngiana tawhta Izi chavah taihta chyhsa zy cha ABEIPA eima Khazohpa hmiakô liana chata noh sari chhôh tlai, kyhchhi ei ta.

⁶⁶ A noh charie noh liana chata zawpi sahlao cha papaisa ta; abeipa cha byhnâ aw pa ei ta, chatanachata ABEIPA ta a chakaotuhpa Davi nata a chyhsa Izarel zy chô liata cha tluta a phana palâsapa vâna chata palôhrupa thaphapa nata aly ngaitapa ta ama o lâta a di haw ei ta.