Hlazy第40章

¹ ABEIPA cha hâ hualua na ta; na nahthlie ta, ei awna cha a thei haw.

² Khaotlô yruna nata chiatlao hry tawhtapa cha eina thao haw, ei pheizy cha lôpanô chôta soh ta, ei phei tlyna a pa-i haw.

³ Hla thiehpa ei pakah liata soh ta, eima Khazohpa reithaina hla cha. Chyhsa hluhpi ta hmô ei ta, ama chi aw, ABEIPA cha ama ngâ ha aw.

⁴ ABEIPA cha ngâchhâna ta hnei ta, apalaipazy nata haipa lâta a tleipazy a châ leipa chyhsa cha a nohhlao na!

⁵ Hy ABEIPA, ei Khazohpa, na hmotao noâhpa zy nata, keimo lâta maniah na pachâna zy he hluh ngaita ta; nâma nata pakho tlâh y tlâ veih ei! Phuahpa ta chho ei sih la, rei tiahpa châ aw vei.

⁶ Atheihna nata hmohlâpa pasô leipa chi ta; ei nahkhao he tlao eina pahypa chi. Raopa hlâna nata moleina châta hmohlâpa cha a hnaw leipa chi ta.

⁷ Chatawhcha kei chata, “He liata ei y,” châbu chatypa liana chata ropa châ na ta;

⁸ hy ei Khazohpa, na khopa tao he ei lyna zie a châ; na ryhpa cha ei pathipalôh liata y tlôh ta,” tah na ta.

⁹ Apakhyna rôhnah ngaitapa liana cha siana thâtihpha tlâh awhkhei na ta; hy ABEIPA, ei hmao he pakhâ cheita aw va na, tahpa na pahno.

¹⁰ Na pachhana cha ei palôhrupa liata nyu leipa na ta, na ngâchhihna nata na pachhana cha tlao ei phuah; na kyhpachâna nata ngâchhihna cha apakhyna rôhnahpa liana cha nyu va na.

¹¹ Hy ABEIPA, na thaphasana zy cha kei lâta pasai leipa ta y kha la, na kyhpacha ngiachhiena nata ngâchhihna chata na pabohsa tyh mawh sy!

¹² Moleina rei tiah leipazy ta na chadô khai ta; ei moleina zy chata na pha ta, mo awpa ta ua thei khao va na; ei luh liata sâ hlâna heta hluh via ei ta, ei palôhrupa tha a panao haw.

¹³ Hy ABEIPA, ngiachhipa ta, na pachha la! Hy ABEIPA, thlai na bao mah y!

¹⁴ Ei hrona pahlei a chhuahpa ta a tluatuhpa zy cha maophyupa nata noza ngaitapa ta y ei se; ei raona kyh liata alypazy cha hnôh lâ heipa ta nozapa ta y ei se!

¹⁵ “Khaw, Khaw!” na tahtuhpa zy cha, ama maophyuh hapa vâta nôpopa ta y ei se.

¹⁶ Nâ cha tluatuhpa zy maih cha aly ngaitapa nata thaphapa ta y ei sala; na pachhana a pasôtuhpa zy chata.” ABEIPA cha parôhnahsapa ta y mawh sy!” tah lymâ ei se.

¹⁷ Kei la, sipasapa nata rietheipa ei châ; châhrasala ABEIPA ta eina pachâ tyh. Nâ la na baotuhpa nata ei pachhana na châ; hy ei Khazohpa hawh cheita kha y!