Hlazy第31章

¹ Hy ABEIPA, nâma liana cha abohna ei tlua tyh; maophyuhpa ta na paysa beih kha y; na siana vâta tlao na pachha mah y!

² Keima lâta na nah pachôh la, thlai na pachha mah y! Kei châta abohna lôpanô, eina pachha nawpa ta abohna o vaw châ mah y!

³ Nâ cha ei lôpanô nata ei kuh na châ; na moh vâna chata na chhihtha la, na cha-ao mah y,

⁴ ei aona awpa ta sao anyupa ta ama paraipa tawhtapa na thao la, nâ cha ei bohna châ tlôh chi.

⁵ Na ku liata ei thlahpa ei cha pavaisa; hy ABEIPA, hmeihseihna Khazohpa, nâ ta eina chatlai haw chi.

⁶ Nohthlahpa hrao leipa a pachâpazy a hao tlôh chi ta; kei la ABEIPA ei ngâ.

⁷ Na zawngiahna vâta aly aw na ta, ei thapha aw, ei pachârôhna he hmô ha tyh tlôh chi ta, ei rietheina noh liata khâ eina pachâ tyh chi,

⁸ ei khakhaipa ku liata na pie leipa chi ta; ei pheizy he su tlypa liata na paduasa tyh.

⁹ Hy ABEIPA, na ngiachhie la, nôpopa ta y tlôh na ta; ei mo he pachârôhna vâta rao khai ha ta, ei thlahpa nata ei pôhpa zydua chhao heta.

¹⁰ Ei hrona he pachârôhna ta lei tlô ta, ei kôzy chhao he a rôhna ta a lei haw hra; ei hmoparaona vâta ei tha chhâ ta, ei ruzy chhao pua a tlô khai haw.

¹¹ a dyuhtuhpa zy vâta mohnaopa ta vaw châ ha na ta, ei vaihzy ota ei moh thata a chhie, ei hmia pahnopazy châta chhao chi chhihpa ei châ haw; othlia liata na hmôpa zy chhaota einâ râsai ei.

¹² Athipa ama mypa hawhta mypa ta ei châ thlâh haw; beih keichheipa hawhta ei châ haw.

¹³ Chyhsa hluhpi eina leih na pahno tlôh na ta, chichhihpa ta eina dôhkhâh khai! Eina tei ngâ nona ei kha ta, ei hrona he na lapa amâ chhuah.

¹⁴ Châhrasala hy ABEIPA, nâ ei cha ngâ, “Nâ cha ei Khazohpa na châ,” tahna ta.

¹⁵ Ei daihti zy cha na ku liata y ta; na khakhaipa zy tawhta nata na taolatuhpa zy tawhtapa na pachha mah y!

¹⁶ Na hmia ta na chakaotuhpa he vaw pakhaisa la; na zawngiahna vâ heta na pachha mah y!

¹⁷ Hy ABEIPA, maophyuhpa ta na paysa kha y, cha pado tlôh na ta; moleipa zy cha maoh paphyusa la. Sheôl liana cha reih pathlie leipa ta sie ei se.

¹⁸ Hmao haiphiahpa zy cha reih pathlie thei leipa ta y ei sala, chazy chata a palaina nata mohnaona chôta sala ngâsâpa ta chyhsa siapa ama reipachhie tyh.

¹⁹ Nâma cha chituhpa zy châta na phana, na sopa hluh zie rimâ cha, chyhsa sawzy mohmô ta nâ liata ngâna a pahnietuhpa zy chata na taopa cha.

²⁰ Âmo cha chyhsa zy teina tawhtapa na pabohsana liana chata nyu chi ta; bie ei chahrapa paleih tawhna chata na pabohna liata na pabohsa ei.

²¹ ABEIPA cha reithaipa ta y mawh sy, a zawngiahna noâhchhi ngaitapa cha na pamosa ta, khihpi liata dôhpa ta ei y nona khata.

²² Keima hra chata ei rawrôhpa ta, Na mohmô tawhta pachhaipa ta ei châ haw,” tah na ta. Châhrasala nâma lâta baona ei cha hiapa kha, na châta ei hiana vaw thei thlâh ha tlôh chi ta.

²³ Hy mopathaihpa zydua saih u, ABEIPA cha kyhpachâ teh u! ABEIPA chata ngâchhihpa cha pabohsa ta, a palai ngaitapazy deikua cha thata viari a thô.

²⁴ ABEIPA a hâtuhpa zydua saih u, thatlô ngaitapa ta y ula, nama palôh riah papha teh u.