Malakhai第3章

¹ “Nahthlie teh u, ei lyuhchâpa vaw tuah na ta, ei hmiakô liata lâthlôh a chhuahdy aw: Nama tluapa ABEIPA cha achhyna-o liata sôkha ta a vy aw; nahthlie teh u, biehrai lyuhchâpa namâ ly ngaitapa cha; a vy na, Pheisaihzy ABEIPA ta a tah."

² Anodeikuacha a vaw tlô no cha ahy e a tao thei aw, ano a vaw luah tina chata ahy e a duah thei aw? Ano cha patina mei hawhta nata poh pasutuhpazy sâhbaw hawhta châ tlôh ta,

³ tâkâri a patituhpa nata a pathaituhpa hawhta atyuh aw ta, Livai sawzy pathai aw ta, ngôh nata tâkâri hawhta âmo pasia aw ta, ABEIPA chata siana ta hmohlâtuhpazy ama châ aw.

⁴ Chatanachata hlâno nohzy nata hlâno kôzy hawhta Zudah râh nata Zerusale hmohlâpa cha ABEIPA châta khochhihpa a châ heih aw.

⁵ “Pachia awpa ta ei cha vaw hnia aw ei; dyuthaipazy, a pheihmâhpazy, haipa ta chhie a satuhpazy chô liata nata nôhmei nata hâra nata a hlaopa hlao khâpa hrao leipa pachâsapa ta pasaipa-ituhpazy nata pho hropa a thy pathlatuhpazy nata na chi leipazy chô liana chata bie pahnotuhpa pha ngaitapa ei châ aw. Pheisaihzy ABEIPA ta a tah.

⁶ “Kei ABEIPA he a nano tlôh lei khâh na ta; chavâta hy Zakaw sawzy saih u, pahleipadiapa châ veih ei chi.

⁷ Nama mahpawzy daihti tawhta ei bieraopazy tleisai eichi ta, zyh beih veih ei chi. Kei lâta vaw kua ula, chatanachata nâmo lâta ei vaw kua aw, Pheisaihzy ABEIPA ta a tah. Nâmo deikua chata, ‘Khâpazy liana he ma eima kua aw?’ tah eichi ta.

⁸ Chyhsapa ta Khazohpa eih a parupa awpa ma a châ? Châhrasala nâmo chata eina parupa tyh eichi. Nâmo deikua chata, ‘Khâpazy liana heta ma eima cha parupa?’ tah eichi ta. Su hrawh liata su khapa nata hmohlâpazy liana heta.

⁹ Chhiesapa nama châ; nâmo he phopi ualuana heta kei he na parupa tyh tlôh eichi ta.

¹⁰ Ei o liata niepa a y thei nawpa ta su hrawh liata su kha zydua cha thyupakhyna o liata vaw cheih teh u, avâ opyzy cha nama chata pahypa ta byhnâ mohôh thei leina taihta ei cha vaohei ei ma vao heih vei ma, na pasia tua rai teh u, Pheisaihzy ABEIPA chata a tah.

¹¹ A niebawhtuhpa cha pakhâpa aw ei na ta, chatanachata nama chhaolei patheipazy cha cha paraopa leipa aw ei ta; sahdô liata nama kre patheipa cha patah leipa ta y khao aw vei, Pheisaihzy ABEIPA ta a tah.

¹² Chatawhcha pho zydua ta nohhlaopa cha tah aw ei ta, râh khochhih ngaitapa nama châ awpa vâta Pheisaihzy ABEIPA ta a tah.

¹³ “Ei chôta nama biezy cha a pachyu kaw, ABEIPA ta a tah. Nâmo deikua chata, ‘Khâpa liana khata ma na chô liata cha hawhpa bie cha eima reih,’ tah eichi ta.

¹⁴ Khazohpa chakaopa he khâpa hrao leipa a châ: a bietapa eima zyhpa nata Pheisaihzy ABEIPA hmiakô liata mâchhiesapa hawhta eima charei tyhpa he phahnaina khâpa a y?

¹⁵ Chatawhcha chyhsa apalaipazy cha a nohhlao na, hmo moleipa a taotuhpazy cha thlao a chhi hra ei ta, Khazohpa pasia ei ta, pachhapa ama châ tyh hra,’ nama tah,” tah ta.

¹⁶ Chatanachata ABEIPA a chituhpazy cha a chhohia ei ta: ABEIPA chata vaw nahthlie ta, vaw thei ta, ABEIPA a chituhpazy nata a moh a papeisatuhpazy chata a thei thlâhna châbu cha a hmiakô liata ropa châ ta.

¹⁷ “Ryubyh sôh ngaitapa ei paki nota kei eih ama châ aw. Pheisaihzy ABEIPA chata a tah; chatawhcha chyhsa ta a sawchapaw, a chakaotuhpa cha hrôbieh a khohpa hawhta âmo cha ei hrôbieh aw.

¹⁸ Chatanachata vaw kua aw eichi ta, chyhsa siapa nata hmoparaopa, Khazohpa chakaotuhpa nata a chakaoleituhpa cha nama panano thei ha aw.