Ryureihtuhpazy第19章

¹ Cha nota Izarel râh liata abei ama y vei nona chata Livai chi chyhsa pakha he Ephrai tlâh râh chhâna lâta y ta, Bethlehe Zudah râh liatahpa nôtho ta hnei ta.

² A nôtho chata a chôta a pathi-ia ta, Bethlehe Zudah râh liata a paw o lâta a râsai ta, cha liana chata thla palih tlai y ta.

³ Chatawhcha a vahpa cha thyu ta, a chakaotuhpa nata râraoseihpa pôno a chhi ta, a phapa ta reipasao ta, palôh tlâhpa ta a vaw chhi heih a chhuahpa ta a chadai ta. Ano chata a paw o lâna chata a ngiakhei ta; laihsa paw chata a vaw hmô nahta a ly kaw ta. Chatawhcha a puhpa, laihsa paw chata a hnohta y awpa ta thlyu ta, a hnohta noh thôh y ta; nie nata do khoh ei ta, cha liana chata tlô ei ta.

⁵ Chatawhcha a noh palih noh chata mydi ta thyu ei ta, ano cha pua a chhuahpa ta thyu ta; laihsa paw chata a piahpa hnohta, “Viahchhâ a chyhta chhâ niepa ta na pathipalôh a patlâpazia chy la, cha hnôh lâna chata si lavâh eichi,” tah ta.

⁶ Chatanachata a tyuh ei ta, ama pano ta nie do khoh ei ta; laihsa paw chata cha chyhsa hnohta, “Palôh tlâhpata ta a rie teh, na pathipalôh cha thapha ngaitapa ta y mawh sy,” tah ta.

⁷ Cha chyhsa cha sie a chhuahpa ta thyu ta, châhrasala a puhpa chata reipasao chaimâh ta, a rie haw heih ta.

⁸ Chatawhcha a noh pangawh noh mydi ta sie a chhuahpa ta thyu ta; laihsa paw chata, “Na pathipalôh cha a patlâpazia chy teh, zâlâ noh nai râhsâ taih chhâ ta y chy teh,” tah ta. Chatawhcha ama pano ta pati zy nie khoh heih ei ta.

⁹ Cha chyhsa cha a nôtho nata a chakaotuhpa chhaota sie a chhuahpa ta a thao nahta, a puhpa laihsa paw chata a hnohta, “Moh teh, zâlâ ha ta, atazâ he a rie heih chy tua teh; a zoh daihmâ ha mâ tâh. He liana he a rie heih la, na pathipalôh cha thapha ngaitapa ta a y thei nawpa ta; chatanachata mylâ mydi ta thyu aw chi ta, na sie thlâh ha aw mâ tâh,” tah ta.

¹⁰ Châhrasala cha chyhsa chata cha zâ cha a rie khoh leipa ta; thyu ta pua haw ta, Zebu khih kei tlô ta, (cha cha Zerusale khih a châ). Alâ pô no ky padia chiehpa a chhi ta, a nôtho chhao a hlao hra ta.

¹¹ Zebu khih kiapâh ama tlô nahta zâlâ ha ta, chakaotuhpa chata a zibeipa hnohta, “A vy tua, he Zebu mo khihpi liana heta a ngia thlâh ha ei si, a rie thlâh ha ei suh u,” tah ta.

¹² Chatawhcha a zibeipa chata a hnohta, “Izarel pathlazy châ tlôh leipa ta pho hropa khihzy liana chata a ngia bao va, Kibia khih lâ tlao pangai lymâ ei suh u,” tah ta.

¹³ chatawhcha a chakaotuhpa hnohta, “A vy teh, he su kheihawhpa he ma pangai ei si, Kibia khih liata tlyma, Ramah khih liata tlyma ei rie aw,” tah ta.

¹⁴ Chatanachata sie lymâ ha heih ei ta; Benzami mo Kibia khih kiapâh ama tlô nahta noh tla haw ta,

¹⁵ Kibia khih liata a rie awpa ta a ngia ei ta. Chatawhcha a ngia ta, cha khihpi khih liah liana chata a tyuh ta; ahyhmah a patlôsa khohpa rai y leipa ei ta.

¹⁶ Chatawhcha pawpipa pakha lyu lâ a siepa zâlâ ta vaw tlô ta; cha chyhsa cha Ephrai tlâh râh liatahpa châ ta, Kibia khih liana chata a kei y chypa a châ; cha liata chyhsa zy deikua cha Benzami chizy ama châ.

¹⁷ Chatawhcha a heih ta, khihliah liata khichhaipa cha hmô ta; pawpipa chata, “Khataih lâ na sie aw? Khataih lâ tawhta a vypa e na châ?” tah ta.

¹⁸ Ano chata a hnohta, “Bethlehe Zudah râh tawhta Ephrai tlâh chhâna râh lâta sie a chhuahpa ei cha, cha liata a ypa cha châ na ta. Bethlehe Zudah râh lâ vawh na ta; atahmâ he ABEIPA o lâta sie ei chhuah ahyhmah na patlôsa khohpa y veih ei.

¹⁹ Eima alâ châta cha sâhkô nata sahroh laozy hnei pi ta, kei nata na seichanônô nata na chakaotuhpa zy hnohta a y hrapa satliapa châta zy chhao viahchhâ nata kresawti y hra ta, khâpahmah a phahlapa ta hnei ma pi,” tah ta.

²⁰ Chatawhcha pawpipa chata, “Thlalôh ngaitapa ta y teh; na byuhpa zydua cha keima ta ei tao khai aw na; khihliah liata la a rie chacheita khâ,” tah ta.

²¹ Chatanachata o lâ a chhi ta, alâ zy cha a lao pie ta, ama pheizy a si ei ta, nie dopa ta y ei ta.

²² Cha hawhta thaphapa nata aly ngaitapa ta ama y nona chata, cha khihpi moleipa sawchapawpa zy thokha chata o cha vaw dôh ei ta, ochhi a vaw chô ngâ kaw ei ta; o a hneituhpa pawpipa hnohna chata, “Na o liata a vaw tlôpa kha vaw papua teh, eima y khei aw,” tah ei ta.

²³ Chatawhcha o hneituhpa cha âmo lâta kei pua ta, ama hnohta, “Châ bao va, unawh saih u, cha tlatluta moleipa cha tao chacheita khah u; he chyhsa he ei khichhaipa a châ hih, he hawhpa hmo pasichhipa la tao aw veih eichi.

²⁴ Moh teh u, he liana heta ei sawchanônô laihsapa nata nôtho y ei ta; âmo cha vaw papua aw na ta. Âmo cha hnei ula, a pha nama tahpa hawhta ama chô liata tao teh u; he chyhsa chô liana deikua he cha hawhpa hmo pasichhihpa cha tao khah u,” tah ta.

²⁵ Châhrasala cha chyhsa zy chata a rei a ngiah leipa ei ta. Chatanachata chyhsa chata a nôtho patu ta âmo lâta papua ta; âmo chata vaw y khei ei ta, khihdei hlâ lei cha zâkhihdei ta tao chhie ei ta.

²⁶ Chatawhcha khih a vaw deih pata nahta sie ta, a zibeipa tlônapa chhikao kiapâh liata pao ta, khih pavâna taihta y thlâh ha ta.

²⁷ Chatawhcha a zibeipa cha my ta kaw thyu ta, chhikao zy cha pahy ta, sie a chhuahpa ta pua ta, a nôthonô cha chhikao thaby liana chata a thy thlâh ha ta.

²⁸ Chatawhcha ano chata a hnohta, “Thyu teh, sie ei si,” tah ta. Châhrasala a chhy khao leipa ta. Chatanachata a alâ chô liana chata khaih ta, thyu ta, a su lâna chata sie haw ta.

²⁹ Chatawhcha a o a kei tlô nata chaizôh la ta, a nôtho pôhpa cha suhrawhleino ta pachhaih ta, Izarel râh zydua liata paphao ta.

³⁰ Chatawhcha a vaw hmôpa maih cha, “Izarel pathlazy Izi râh tawhtapa ama vaw pua rakha tawhta he hawhta hmotaopa rai he atahmâ taihta y beih leipa ta hmôpa châ beih hra vei; pachâ ula, a chhohia ula, reih teh u,” tah ei ta.