Zawsua第1章

¹ ABEIPA chakaotuhpa Mawsi a thi tawhna chata Mawsi chakaotuhpa Nuna sawchapawpa Zawsua hnohta ABEIPA ta,

² Ei chakaotuhpa Mawsi cha thi haw ta; thyu la, nâma nata he zawpi sahlao zydua chhao heta Zawdâh he chaka ula, âmo Izarel pathlazy ei piepa râh liana chata sie teh u.

³ Mawsi hnohta ei rei hawpa hawhna khata nama phei ta nama tlypa maih cha ei cha pie khai ei.

⁴ Râhpathohpa tawhta nata he Lebanaw tawhta chavah laipa Euphrate chavah taihta, Hiti mo râh zydua, notlana lâ Tilaipi Rôhnahpa taihta nama râhri a châ aw.

⁵ Na hro chhôhta la ahyhmah ta cha pahnie aw veih ei; Mawsi hnohta ei ypa hawhna khata, na hnohta chhao ei y hra aw na; cha pathlua leipa aw na ta, cha siesai chachei aw va na.

⁶ Thatlô ngaitapa nata riahpha ngaitapa ta y teh; ama pathlatuhpa zy chhiesapa ta pie bie ei taih hawpa râh kha he sahlao he patosa tlôh aw chi ta.

⁷ Na chakaotuhpa Mawsi ta ryhpa zydua zyh awpa ta bie a cha piepa kha khâchâ zyh awpa ta thatlô ngaitapa nata riahpha ngaitapa ta y thlâh ha teh; na siena maihta thlaochhipa ta na y lymâ thei nawpa ta na chachâh lâ tlyma, na chavei lâ tlyma tlei sai chachei khâ.

⁸ He ryhpa châbu heta na pakah cha puasai chachei khah se, cha bie ropa zydua cha khâchâ na zyh thei nawpa ta chhô nata zâ ta tlao na pachâ awpa a châ; chatanachata na lâpi zy cha patlâh lymâ aw ta, thlaochhipa ta na y aw.

⁹ Bie cha pie va na mâ? Thatlô ngaitapa nata riahpha ngaitapa ta y teh; chi khâ, riahchhiepa ta y hra khâ; ABEIPA na Khazohpa cha na siena maihta na hnohta a y lymâ aw mâ tâh,” tahpa ta reih ta.

¹⁰ Chatanachata Zawsua ta zawpi hyutuhpa zy hnohta.

¹¹ A riena su lâ vawh ula, zawpi zy hnohta, ‘Nie awpa zy a chhuahdy teh u; noh thôh chhôhta ABEIPA nama Khazohpa ta râh hnei awpa ta a cha piepa he, hnei awpa ta Zawdâh he nama chakah aw na,’ tahpa ta bie pie teh u,” tahpa ta bie pie ta.

¹² Chatawhcha Rubena mozy, Kada mozy nata Manase pho khophie zy hnohna chata Zawsua ta.

¹³ ABEIPA nama Khazohpa ta pahâna cha pie ei ta he râh he a cha pie aw ei,’ tahpa ta ABEIPA chakaotuhpa Mawsi ta bie a cha piepa ei he a thei thlâh ha teh u.

¹⁴ Nama lahpinô zy, nama sawnawh chyjpa ta zy nata nama sahroh zawzy he cha Zawdâh haosâ lâ Mawsi ta râh a cha piepa liana chata y aw ei ta; nâmo chyhsa thatlôpa riahphapa sahlao deikua cha chariah chhaichhi a tobipa ta vaw chakah tua aw eichi ta, nama unawhpa zy bao aw eichi ta.

¹⁵ ABEIPA ta nama unawhpa zy cha nâmo hawh hra ta pahâna piepa ta, ABEIPA nama Khazohpa ta râh a piepa cha âmo chhaota ama to hlâ lei cha; chatanachata ABEIPA chakaotuhpa Mawsi ta Zawdâh haosâ, noh chhina lâ râh nama châta a cha piepa lâna chata kua aw eichi ta, nama to aw,” tahpa ta reih ta.

¹⁶ Chatawhcha âmo chata, “Tao awpa ta bie maniah na piepa zydua cha eima tao lymâ aw na, maniah na tuana maihta chhao eima sie lymâ aw.

¹⁷ Kyh to liata Mawsi bie eima zyh lymâ tyhpa hawhna khata, na bie chhao eima zyh lymâ aw na; ABEIPA na Khazohpa cha Mawsi hnohta a y tyhpa hawhna khata na hnohta y mawh sy.

¹⁸ Ahyrai na biepiepa chôta a typa ta bie na piepa maih a zyh khoh leipa cha thie awpa ama châ aw. Thatlô ngaitapa nahta riahpha ngaitapa ta y teh,” tahpa ta Zawsua cha a chhy ei ta.