Athaona第49章

¹ Chatawhcha Zakaw ta a sawchapawpazy aw ta, he tana heta reih ta, “Noh hnôh lâtazy nama chô liata hmo a vaw tlô awpa cha, ei cha chho nawpa ta a vaw pakhy teh u,

² Nâmo, Zakaw sawchapawpazy saih u, a vaw pakhy ula, nahthlie teh u, nama paw Izarel bie he nahthlie teh u.

³ Rubena y, nâ he ei saw tuapa, ei hmotaotheina, ei thatlôna thei hmiatua chaipa na châ, a sâh chaina nata bie hnei chaina cha, nâ eih a châ.

⁴ Ti hawhta â i leipa na châ, chônôchaina cha hnei aw va chi, na paw rakhô na kiahpa vâta; cha nona chata cha cha papuapalei chi ta, ei ziana liata na kiapa kha!

⁵ Simeôna nata Livai he unawh châ ei ta; ama zaozizy cha thisaih palona chaihrai a châ.

⁶ Ei thlahpa cha ama chhosiena liata a hlao leipa aw ta, ei palôhrupa chhao amâ pakhyna liana chata a hlao hra aw vei; ama pathi-iapa ta chyhsa thie ei ta, ama chhorupa ta viahchao tôhpa thari chhie ei ta.

⁷ Ama pathi-iana chata chhiesana to mawh y, ahrâh ngaitapa châ tlôh ta; ama hiehâhna chhao chata chhiesana to mawh sy, nôchhie ngaitapa châ tlôh ta! Zakaw sahlao liana chata âmo cha pachhaih aw na ta, Izarel sahlao liana chata ei papai hra aw.

⁸ Zudah y, nâ cha, na unawhpazy ta ama cha reithai aw ei; na ku cha na khakhaipazy rao liata pahnieh aw chi ta; na paw sawchapawpazy cha na hmiakô liata amâ bôh aw.

⁹ Zudah he chkeibarôhneipa taw a châ; ei sawchapawpa y, na sa taipa cha kua sai haw chi ta a bôh ta, chakeibarôhneipa hawhta a byu ta, chakeibarôhneipa chanôhpa lyu hra tlôh ta; ahye a pathyu ngâh aw?

¹⁰ Ryureina chôhchahrei cha Zudah tawhtapa lei leihpa aw ta, ryureituhpa chôhcharei cha a pathlazy tawhta lei hra aw vei, a hneituhpa a vy hlâ lei ta cha; pho to ta ano bie ama zyh aw.

¹¹ A arâ taw cha krezôh liata hraih ta, A lâ taw cha krezôh phapa liata hraih hra ta, a chysia kresawti liata pasu ta, apo cha kre-thisai liata pasu hra ta;

¹² a mokhaohzy cha kresawti ta pasaipa ta y aw ta, a hâhzy cha sâhpiti ta pangyuhpa ta a y hra aw.

¹³ Zebulawna heta tilaipi kiah liata a pahrâ aw, balyh pahâna ngiakâh a châ aw, a râhri cha Sidawna liata a châ aw.

¹⁴ Iskara he alâ chahra ngaitapa, mietahkupa sahdô likawhta a byupa a châ;

¹⁵ a pahapa cha a phapa ta pahno ta, râh cha a phapa ta pahno hra ta; chatanachata khâpaleipa a pu awpa ta, a ngiatlâh cha pahnai ta raihriapa ta hrua raruahpa ta, sei ta vaw y haw ta.

¹⁶ Dana heta a chyhsazy cha Izarel pho hry liata pho miakha châ hrapa ta ryu a reipa aw.

¹⁷ Dana he lâlai liata parih, lâpi liata vâzi, a chô liata a kiahpa a di lâta a tlâhna taihta arâ phei liata a pachu tyhtuhpa he a châ aw.

¹⁸ Hy ABEIPA y, na pachhana cha ei hâ thlâh ha na,

¹⁹ Kada he, chariah ta a dyuh aw ei ta, Châhrasala ano chata ama phei ngavâhmaothy lâta tlao a tei aw.

²⁰ Asera he a niepa cha pha aw ta, abei niepa pahâh ngaitapazy a papua aw.

²¹ Nathalai he sasu pathliepa a châ, bie pha ngaitapazy a reih tyh.

²² Zawsi he tho pathei khoh ngaitapa a châ, tikhaoh kiapâh liata tho pathei khoh ngaitapa cha; a pachia pachhuahpazy châta alô pâchhô â zaw pakhô ta.

²³ Châtai a kapa sahlao chata ano cha thata riepatheisa ei ta, kâ ei ta, taola ei ta;

²⁴ châhrasala ano libaw cha a pachyu ngaitapa ta y thlâh ha ta, a ku thazy cha thapatlôpa ta y ta, Zakaw chyhsa Thatlôpa ku ta,(Mietahkuvaihtuhpa, Izarel lôpanô moh ta),

²⁵ na paw Khazohpa nâma châbao tuh awpa ta, Atotaotheipa chô lâ, a vâ byhnâzy,a ry lâta a byuh thlâh hapa, ti thu ngaitapa byhnâzy, sâhpi nata chhi byhnâzy ta, nama byhnâ cha aw patupa tlaita, tha patlôpa ta y ta.

²⁶ Na paw byhnâzy heta na pathlatuhpazy byhnâ cha, chhâzaw tlâh chhâna taihta a khô haw; chazy cha Zawsi ku liata y aw ta, a unawhpazy tawhta pananopa ta a ypa luh liana chata a y aw.

²⁷ Benzami he changie zohpa châ ta, myta cha sa taipa nie aw ta, Zâlâ ta a hraona cha a raih aw,” tah ta.

²⁸ Cha zydua cha Izarel pho hrawhleinozy châ ei ta; cha bie chhao cha âmo byhnâ awpa ta ama hnohta ama paw bie reipa a châ, byhnâ awpa ta ama y awpa kyh lymâ hawhta, byhnâ aw pa chyu ta.

²⁹ Zakaw cha âmo cha ryu a hi ta, ama hnohta, “Ei chieheihzy hnohta chhihthapa ta y ha aw na ta; Hiti chyhsa Ephraw lyu liata lôpu,

³⁰ Kana râh liata Mamre dady ta, Makapela lyu liata lôpu Abaraha ta pabuna su châta Hiti chyhsa Ephraw liata a lyu chhaota a chaleipa liana khata na pathlatuhpazy hnohta na pabu hra muh vy.

³¹ Cha liana chata Abaraha nata a lahpinô Sara cha pabu ei ta; cha liana chata Aisika nata a lahpinô Rebeka cha pabu ei ta; cha liana hra chata Liah pabu na ta,

³² lyu nata a chô liata a ypa cha, Hiti pathlazy liata ei chalei,” tah ta.

³³ Zakaw chata a sawchapawpazy hnohta, ryu a hi khai nahta, a pheizy cha rakhô liata khaih ta, a thlahpa pathlie haw ta, a chieheihzy hnohna chata pahlyhpa ta y haw ta.