Ezekiel第27章

¹ ABEIPA bie cha ei hnohta vaw tlô heih ta:

² “Atahmâ, nâ chyhsa y, Tyre chaphôtuna hla phi la,

³ Tyre hnohna chata hy nâ, tilaipi khih liata a pahrâ tyhpa tilaipi ngiakâ râh hluhpizy hnohta sôhdaotuhpa y, Abeipa KHAZOHPA chata he tana heta a cha tah: “Hy na Tyre y, ‘Ei chhithai paki tah chi ta.

⁴ Na râh ta tilaipi liahliah saoh ta; châ taotuhpazy ta ama cha pachhi thaisa pachai tlai na.

⁵ Na tho chhaichhi Seni meisah ta ama tao; Lebanaw tho rih na balyh to ta ama la.

⁶ Basana oaka tho, na balyh hiana ta ama tao; siphiah chôta sianaoh ta pangiapa meisa tho, tilaipi râh Kitima tawhtapa cha.

⁷ Na balyh poh paraipa Izi râh tawhta lini dipachapaipa nama pahnosana chata a cho na; nâ chata nodina paraipa a nohpa nata nohsaihpâpa Elaisha liahpahlôzy tawhtapa.

⁸ Na balyh hiatuhpa Sidaw nata Arvada a pahrâpa ama châ; na balyh chhihthatuhpazy cha hy Tyre, na chyhsa sopazy ama châ na.

⁹ Kebal machâpazy nata chyhsa zôthaipa na balyh a phietuhpa ama châ na; tilaipi balyh zydua nata a chyhsazy ta nâma sôh daohpa ta ama cha pangai.

¹⁰ “Na dyuna chapaw na pheisaih sahlao Persia nata Luda nata Puta ama châ; ama vyhphao nata ama thua lakhu baih ei ta; nâma cha pangiatuhpa ama vaw châ na.

¹¹ Na pheisaih sahlao Arvada mo chhaota na kuh chô liata ama kiah, na o sâhpa Kamada sahlao riahvaipa ta na kuh chheipâh ta ama vyhphao ama baih; nâma cha pangiatuhpa ama vaw châ na.

¹² “Na hneipa vâta sôh nata piah ryu hmo to rai Tasi cha sôh cha daotuhpa vaw châ ta; na hmobaoh chaleipa ta a cha hlâ, tâkâri, thua, râhvâ nata ky zy chhao,

¹³ Zava zy, Tubal nata Mesheka nâma châ daotuhpa heta, chyhsa nata dawh hmobaoh ta ama châ daoh, na hmobaoh hnei nawpa ta.

¹⁴ Betôkamah chhôhkhapa chata arâ, adyuhna arâ nata sabaitu hlâpa ta na hmobaoh ama chalei tyh.

¹⁵ Deda chyhsazy cha daotuhpazy châ ei ta; liahpahlô su to na daona su a châ, sianaoh nata ebôni ama châ hlâ, rina châta.

¹⁶ Hmobaoh na hnei kawpa vâta Edôma cha châ daotuhpa châ ta; emyra lô, poh nohsaipâpa, lini dipa poh, kôral lô nata rubi lô zy ta ama châ daoh.

¹⁷ Zudah nata Izarelzy chhao cha daotuhpa châ ei ta; âmo ta nama daoh liata Minith sâh nata Panak kheihti, sathaw nata tho chathlih ta ama châ daoh.

¹⁸ Na hnei kawpa vâta sôh nata piah ryu hmo to rai Damaska, châ daotuhpa vaw châ ta; Helbô kresawti nata sahmi ngyutuhpa ta ama châ daoh,

¹⁹ na hmobaohzy Uzal kresawti cha vaw cheipa ta ama chalei; thua di ngaitapa lôiasohpa nata basuh zy na sôhdaona.

²⁰ Arâ tyuphaw padiana pohzy ta Deda chata a châ daoh.

²¹ Arabia nata Keda abeisawzy nâma cha daotuhpazy ama châ khai, mietahkupa tawzy, mietahkupa tôhpa zy, mie tôhpa zy ta ama châ dao.

²² Sheba nata Raamah sôhdaopazy cha châ daohtuhpa ama vaw châ; rohpahâhpa pha chaipa zy, alôsôhpa chi to nata ngôh zy ta ama châ dao.

²³ Harana, Kane, Ida, Ashusa nata Kilmada sôhdaopazy cha châ daohtuhpa châ ei ta.

²⁴ Chazy cha châ daohtuhpa ama châ, chyhsa phapa poh nohsaihpa nata poh a ngiapa, siphiah poh angiapa chhaota, khawhri charipa a ipa ta chahrypa ta; hezy heta ama châ daoh.

²⁵ Tasi balyh zy cha na hmo a phaoh ngâtuhpazy chhao cha. “Pabiepa ta y heih chi ta, tilaipi chô liata na vaw rôhnah haw.

²⁶ Na balyh hiatuhpa ta tilapi chalâparâpa liata cha pangia ta. Tilaipi liah liata nochhi thlih ta a cha chanaoh.

²⁷ Na sôh nata piah, na hmobaoh zy, na sôhdaona hmo, na balyh chyhsa zy, balyh hiatuhpa a paphituhpazy, cha hiahtuhpa nata adyuhna chyhsa nâma liata a ypa, na chhôh liata a ypa zydua zy chhaota, na rao nota tilaipi liah liata namâ pamôh aw.

²⁸ Na balyh hiatuhpazy awhpa pyu ta na chheipâh ta chyhsazy amâ chalyuna,

²⁹ Balyh hiana sôh apatutuhpa zydua, Chopa ta balyh hiana ama patu. Balyh chyhsazy nata tilaipi liata a pasiesatuhpa ngiakâh liata amâ duah aw,

³⁰ na kyh liata ao thei theipa ta ama papua aw, palôh chhie ngaitapa ta ama châ aw. Ama luh liata buhchâ zy miapa ta doh-lei hry liata amâ taikalô aw;

³¹ nâma vâta a papôlôpa ta, latho poh ama sai aw, palôh chhie ngaitapa ta chapa ta thata mâchhie a cha sa aw ei.

³² Nâma mâchhiesapa ta chaphô ama tu aw, ahy e Tyre hawhta a y tly? Tilaipi liah liata a leidia hawpa he.

³³ Nâma hmobaohzy tilaipi liata puapa ta, chyhsa hluhpi lôhrâ a patlôsa tyh; alei bei zydua na pahneirôhsana sôh nata piah hlâpa na hmobao ta.

³⁴ Tilaipi thupa liata na rao nona khata; na sôhdaona hmo, na chyhsa zydua nâma chhaota ama leidia haw.

³⁵ Liahpahlô a pahrâpa zydua noâhpa ta ama y aw; ama beizy hra ta chipa ta thlahzopa ta, ama hmia chhao â nano khai haw.

³⁶ Chyhsazy hry liata sôhdaopa zy ta ama hmao ama cha tô chie; chyhsa châta chichhihpa na vaw châ haw, alâ beih khao aw va chi, ’tahpa ta ama cha cha thlu,”tah ta.