2 Abeizy第25章

¹ Zedekia cha Babylaw beipa chô liata a ty haw ta. ‘Abeina kô chaki kô, thla hrawhna, noh hrawh noh tlai ta Babylaw beipa Nebukaneza chata a pheisaih zydua chhaota Zerusale adyuh ta, riehmo tao ei ta, kuh ta padô haw ei ta.

² Beipa Zedekia a beina kô hrawhleikhana taihta khih cha padô ei ta.

³ Thla palihna noh chaki noh liana chata khih cha chakâh ngaita haw ei ta, cha liata chyhsa zy chôta niepa rai y khao leipa ta.

⁴ Chatawhcha khihpi kuh cha papyu ei ta; zâ ta adyuhpa chyhsa zydua cha abei sahdô kiapâh kuh pâchhôh miano likawh liata kuh chhikao lâta a râpai haw ei ta, Kaldia sahlao chata khih cha padô ei ta. Chatawhcha abeipa cha Arabah lâpi lâta sie ta.

⁵ Châhrasala Kaldia pheisaih sahlao zy chata beipa cha a chadai ei ta, Zerikô bypi liata pha ei ta; a pheisaih zydua chata a râpaisai khai ei ta.

⁶ Beipa cha patu ei ta, Babylaw beipa lâta Riblah khih lâta a chhi ei ta. a thâtih pachia ei ta.

⁷ Zedekia sawchapawpa cha a mohmô tlai liata thie ei ta, Zedekia mozy cha thao ei ta, bâlia zy ta buh ei ta, Babylaw lâta siekhei haw ei ta.

⁸ Babylaw beipa, Beipa Nebukaneza a beina kô hrawhleichakina, thla pangawhna, noh sari noh liana chata Babylaw beipa chyhsa a vaihtuhpa sahlao hyutuhpa Nebuzarada cha Zerusale liata a ngia ta.

⁹ ABEIPA o nata abei o cha mei ta rao ta, Zerusale o zydua, o rôhnah ngaitapa zy cha rao khai ta.

¹⁰ Vaihtuhpa sahlao hyutuhpa hnohta a ypa Kaldia phesaih zydua chata Zerusale chheipâh liata kuh cha pacho khai ei ta.

¹¹ Chatawhcha khihpi chhôh liata chyhsa a ypa, âmosasyh ta a piepa sahlao Babylaw beipa lâta a piepa zy, zawpi a ypa zy cha vaihtuhpa sahlao hyutuhpa Nebuzarada chata sei ta a chhi khai ta.

¹² Cha râh liata sipasapa zy hry liatahpa deikua cha vaihtuhpa sahlao hyutuhpa chata krezôh a mokhâhtuhpa châta nata lyu a taotuhpa châta siesai ta.

¹³ ABEIPA o liata dawh tôh zy nata ABEIPA o liata patyuna nata ti pa-ona cha Kaldia sahlao zy chata pakei khai ei ta, a dawh cha Babylaw lâta siekhei ei ta.

¹⁴ Chatawhcha beih zy, buhchâh lina zy, meiôh lao chakiena zy, phiathla zy nata dawh hmobaoh zydua chakaona ta ama hmâpa zydua cha la ei ta,

¹⁵ mei lana zy, rahô zy chhaota, vaihtuhpa sahlao hyutuhpa châta ngôh ta taopa zy cha a ngôh cha la ta, tâkâri ta taopa zy cha a tâkâ cha la ta.

¹⁶ Sawlawmaw ta ABEIPA o châta a taopa, a tôh miano nata dawh ti pa-ona nata patyuna zy cha cha hmobaoh zydua liata dawh khoh a tliahpa hluh zie cha pahno tiah awpa châ vei.

¹⁷ Otôh miakha a sâhna lâ cha dy hrawhleichaki châ ta, a pawhmao liata dawh pabyuhpa y ta; cha pabyuhpa â sâhna lâ cha dy thôh châ ta; pabyuhpa kâ lâna chata chapaicharupa nata pawmikranat taopa ei ta, dawh sai a châ. Chazy hawhna hra chata a tôh miakha chhao cha chapaicharupa a châ.

¹⁸ Vaihtuhpa sahlao hyutuhpa chata theihthaipa beipa Seraiah nata a pazipa theihthaipa Zephania nata ochhi vaihtuhpa pathôh patu ta;

¹⁹ adyuhpa chyhsa zy chô liata hyutuhpa pakha chhao, beipa hmia a hmô tyhpa khihpi chhôh liata a ypa papangawh chhao; zawpi moh a rohtuhpa pheisaih hyutuhpa chârohtuhpa chhao; khihpi chhôh liata a ypa cha lyurâhpa liatahpa chyhsa sycharu chhao khihpi chhôh tawhtapa a chhi hra ta.

²⁰ Vaihtuhpa sahlao hyutuhpa Nebuzareda chata a chhi ta, Babylaw beipa lâta Riblah khih lâta siekhei ta,

²¹ Babylaw beipa chata Hama râh Riblah khih liana chata thie ta. Chatanachata Zudah cha a râh chhôh tawhta sei ta a chhipa ta vaw y haw ta.

²² Babylaw beipa Nebukaneza ta Zudah râh liata a siesaipa zy chhao cha ama chô liana chata Shaphana sawchapawpa Ahika sawchapawpa Kedaliah cha ryureituhpa ta tao ta.

²³ Pheisaih sahlao hyutuhpa zydua nata ama sahlao zy ta Babylaw beipa ta Kedaliah ryureituhpa ta a tao tahpa ama thei nahta, Mizpali khih liata Kedaliah lâta sie ei ta, chazy cha Nethaniah sawchapawpa Ishmael zy, Karia sawchapawpa Zôhana zy, Nethôpha chyhsa Tahume sawchapawpa Seraia zy, Maaka chysa sawchapawpa Zazaniah zy, ama sahlao zy chhaota ama châ.

²⁴ Chatawhcha Kedaliah chata cha sahlao nata ama hyutuhpa zy hnohna chata chhie sa ta, ama hnohta, “Kaldia sahlao chakaotuhpa ta ypa chi khah u; he râh liana heta y thlâh ha ula, Babylaw beipa bie ry liata y teh u, chatanachata nama châta a pha aw,” tah ta.

²⁵ Châhrasala thla sarina liata abei pathla Elisama sawchapawpa Nethaniah sawchapawpa Ishmael cha chyhsa pahrawh a chhipa ta sie ta, Kedaliah cha Mizpah liata Zu zy nata Kaldia sahlao a hnohta a ypa zy chhao ta adyuh ei ta, thie khai haw ei ta.

²⁶ Chatanachata chyhsa zydua a lai a chyh ta, pheisaih hyutuhpa zy chhaota pua ei ta, Izi râh lâta sie haw ei ta, Kaldia sahlao zy cha chi tlôh ei ta.

²⁷ Zudah beipa Zehôikina seichâna ta a yna kô sythôh nata kô sarina, thla hrawh hleino na, noh syno nata noh sari noh liata, Babylaw beipa Evimerôda ta a bei tua kô liata Zudah beipa Zehôikina patâhna o tawhta papua ta;

²⁸ ano hnohta a pha ngaitapa ta bie reih ta, Babylaw liata abei sahlao a y hrapa zy abeidyuchhai chô liana chata a abeidyuchhai cha a sâh pachaipa ta soh ta.

²⁹ A tâhna chysia zy patly ta. A hro chhôhta a hnohta pati dôh tyh ta;

³⁰ a chyhna châta a hmô awpa â daihpa ta abeipa ta nohchareih a hro chhôh zydua liata tovyuh taopa ta.