1 Abeizy第21章

¹ Cha hmozy hnôh lâna chata Zezrel chyhsa Nabô ta kresahdô hnei ta, cha cha Zezrel liata Samari beipa Ahaba o rôhnahpa kiapâh liata y ta.

² Ahaba ta Nabô hnohta, “Ei o kiapâh a châpa vâta chicheipa sahdô châta na kresahdô he na pie teh; kresahdô pha viapa ei cha pie aw: a châ vei khiahta na khoh via khiahtala a tâkâ lâta a ty a phuhna cha ei cha pie aw,” tahpa ta chho ta.

³ Nabô ta Ahaba hnohta, “Ei mahpaw zy ryu ei cha pie awpa cha ABEIPA ta pasaih kha se,” tah ta.

⁴ Zezrel chyhsa Nabô ta cha hawhpa bie a hnohta a reipa vâna chata, Ahaba cha pachâ chhie ngaitapa nata palôh châ lei ngaitapa ta a o lâ a ngia haw ta; “Ei mahpaw zy ryu cha pie thei aw va na,” khâchâ tah tlôh ta. Chatanachata a rakhô liata a zia ta, hiakha lâ a heih ta, pati rai nie khoh khao leipa ta.

⁵ Châhrasala a lahpinô Zezebel cha vawh ta, a hnohta, “Kheihta zie ta e, na palôhrupa cha tlatlu ta a pachârôh ta, pati rai na nie vei?” tah ta.

⁶ Ano chata a hnohta, “Zezrel chyhsa Nabô hnohta, ‘Na kresahdô he na chalei sa teh, a châ vei khiahta na khoh via khiahtala kresahdô hropa ei cha pie aw,’ tah na ta; ano chata. ‘Ei kresahdô la cha pie aw va na,’ tahpa ta einâ chhy,” tah ta.

⁷ Chatawhcha a lahpinô Zezebel chata a hnohta, “Izarel râh ryu reih va chi mâ? Thyu la, pati nie la, palôhrupa thapha ngaitapa ta y teh; Zezrel chyhsa Nabô kresahdô cha keima ta ei cha pie aw,” tah ta.

⁸ Chatanachata Ahaba moh ta châ roh ta, a chahnaona ta chahnao ta, cha cha a yna khih liata Nabô opapa machâpa zy nata molaipa zy lâta paphao ta.

⁹ Chatawhcha cha liana chata, “Pati nie leipa kyh phuah ula, zawpi hry liata Nabô cha parôhnahsa ula;

¹⁰ chyhsa hmoparaopa a hmiakô liata patyusa ula, ‘Khazohpa nata abeipa na reipachhie’, tahpa ta a leihtuhpa ta tao teh u. Chatawhcha puakhei ula, alô ta vawh sao teh u,” tah ta.

¹¹ Chatawhcha a yna khih liata chyhsa a ypa machâ zy nata molaipa zy chata Zezebel ta âmo lâta bie a paphaopa hawhta tao ei ta. Âmo lâta châ a paphaopa a ropa hawhna chata,

¹² pati nie leipa kyh phuah ei ta, zawpi hry liata Nabô cha parôhnahsa ei ta.

¹³ Chatawhcha chyhsa hmoraopa pano zy cha a hmiakô liata atyuh ei ta; hmoparaopa chyhsa zy chata zawpi sahlao hmiakô liata, “Nabô heta Khazohpa nata abeipa a reipachhie,” tahpa ta Nabô cha leih ei ta. Chatanachata khih tawhta chhihtha ei ta, alô ta vawh ei ta, thi haw ta.

¹⁴ Chatanachata Zezebel hnohta, “Nabô alô ta vawh ei ta; a thi haw,” tahpa ta chyhsa tuah ei ta.

¹⁵ Zezebel ta Nabô cha alô ta vawh ei ta, a thi haw tahpa a thei nahta, Ahaba hnohta, “Thyu la, Zezrel chyhsa Nabô kresahdô chalei awpa a cha pasai leipa kha hnei teh; Nabô cha hroh khao vei, a thi haw na,” tah ta.

¹⁶ Ahaba ta Nabô a thi haw tahpa a thei pata nahta, Zezrel chyhsa Nabô kresahdô hnei awpa ta thyu ta, zu ha ta.

¹⁷ ABEIPA bie cha Tisabi chyhsa Elaiza hnohta vaw tlô ta,

¹⁸ “Thyu la, Samari liata a ypa Izarel beipa Ahaba a tyh awpa ta zu teh, Nabô kresahdô liata y ta, hnei a chhuahpa ta cha lâna chata a zu. “A hnohta, ‘ABEIPA ta,

¹⁹ Thie chi ta, na hnei pâ haw ma?” tahpa ta,’ tah la, a hnohta, ‘ABEIPA ta he tana heta a tah, “I ta Nabô thisaih a paliena su liana tlai heta nâma thisaih chhao he a palie hra aw,” tahpa ta tah mah y,” tahpa ta.

²⁰ Ahaba ta Elaiza hnohta, “Hy ei khakhaipa, eina vaw hmô haw chi mâ?” tah ta. Ano chata a chhy ta, “Ei cha hmô haw he, ABEIPA mohmô liata hmo pha leipa tao awpa ta nâma sasyh ta na zuah hapa cha.

²¹ Na chô liata hmo pha leipa vaw patlôsa aw na ta; ei cha vaw pahlei aw. Ahaba tawhna heta chapaw saw maih cha Izarel râh liatahpa chyhsa a pabohpa nata khotalaipa chhao pahleipadia aw na ta;

²² nâma ta ei hie eina pahâhpa vâ chi ta nata Izarel sahlao hmo na paraosapa vâta, Neba sawchapawpa Zerôbaw chhôhkha zy nata Ahiza sawchapawpa Baasha chhôhkha zy hawh tlaita na chhôhkha zy he ei tao aw.

²³ Zezebel kyh chhao ABEIPA ta reih ta. ‘Zezrel khih kuh kiapâh liata i ta Zezebel he a chai aw,’ tah ta.

²⁴ Ahaba chhôhkha hry liata a thipa maih cha pavaw zy ta ama dyh aw,” tah ta.

²⁵ A lahpinô Zezebel pasyupalipa ta ABEIPA mohmô liata hmo pha leipa tao awpa ta azuahpa Ahaba hawhpa rai he ahyhmah y veih ei.

²⁶ ABEIPA ta Izarel pathlazy hmiakô liata a papuapa Amawri mozy hmotaopa to hawhta, khazoh nohthlahpa zy achhypa ta hmo pasichhih ngaitapa tao tyh ta.

²⁷ Ahaba ta cha bie zy a thei nah chata, a poh hrie ta, a sapa padaihpa ta latho poh a bu ta, nie leipa ta y ta, latho poh liata a zia ta, pacharôhpa ta sie ta,

²⁸ ABEIPA bie cha Tisabi chyhsa Elaiza hnohta vaw tlô ta,

²⁹ “Ahaba ei hmiakô liata a panawh zie he na hmô ma? Ei hmiakô liata a panawhna zie vâna heta ano chhâ liana heta cha hmo pha leipa patlôsa leipa aw na ta; a sawchapawpa chhâ liata deikua a chhôhkha zy chô liata hmo pha leipa ei patlôsa aw,” tahpa ta.