Ijob第6章

¹ Ijob respondis kaj diris:

² Se estus pesita mia cxagreno, Kaj samtempe estus metita sur la pesilon mia suferado,

³ GXi estus nun pli peza, ol la sablo cxe la maroj; Pro tio miaj vortoj estas plenaj de plendo.

⁴ CXar la sagoj de la Plejpotenculo estas en mi, Ilian venenon trinkas mia spirito; La terurajxoj de Dio direktigxis sur min.

⁵ CXu krias sovagxa azeno sur herbo? CXu bovo blekas kolere cxe sia mangxajxo?

⁶ CXu oni mangxas sengustajxon sen salo? CXu havas guston la albumeno de ovo?

⁷ Kion ne volis tusxi mia animo, Tio nun estas abomeninde mia mangxajxo.

⁸ Ho, se mia peto plenumigxus, Kaj se Dio donus al mi tion, kion mi esperas!

⁹ Ho, se Dio komencus kaj disbatus min, Donus liberecon al Sia mano kaj frakasus min!

¹⁰ Tio estus ankoraux konsolo por mi; Kaj mi gxojus, se en la turmento Li ne kompatus, CXar mi ne forpusxis ja la vortojn de la Sanktulo.

¹¹ Kio estas mia forto, ke mi persistu? Kaj kia estas mia fino, ke mi havu paciencon?

¹² CXu mia forto estas forto de sxtonoj? CXu mia karno estas kupro?

¹³ Mi havas ja nenian helpon, Kaj savo estas forpusxita for de mi.

¹⁴ Al malfelicxulo decas kompato de amiko, Ecx se li forlasas la timon antaux la Plejpotenculo.

¹⁵ Miaj fratoj trompas kiel torento, Kiel akvaj fluegoj, kiuj pasas,

¹⁶ Kiuj estas malklaraj pro glacio, En kiuj kasxas sin negxo;

¹⁷ En la tempo de degelo ili malaperas, En la tempo de varmego ili forsxovigxas de sia loko.

¹⁸ Ili forklinas la direkton de sia vojo, Iras en la dezerton, kaj malaperas.

¹⁹ Sercxas ilin per sia rigardo la vojoj de Tema, Esperas je ili la karavanoj el SXeba;

²⁰ Sed ili hontas pro sia fido; Ili aliras, kaj rugxigxas de honto.

²¹ Nun vi neniigxis; Vi ekvidis terurajxon, kaj ektimis.

²² CXu mi diris:Donu al mi, El via havajxo donacu pro mi,

²³ Savu min el la mano de premanto, Aux liberigu min el la mano de turmentantoj?

²⁴ Instruu min, kaj mi eksilentos; Komprenigu al mi, per kio mi pekis.

²⁵ Kial vi mallauxdas pravajn vortojn? Kaj kion povas instrui la moralinstruanto el vi?

²⁶ CXu vi intencas riprocxi pro vortoj? Sed paroloj de malesperanto iras al la vento.

²⁷ Ecx orfon vi atakus, Kaj sub via amiko vi fosus.

²⁸ Nun, cxar vi komencis, rigardu min; CXu mi mensogos antaux via vizagxo?

²⁹ Rigardu denove, vi ne trovos malpiajxon; Ripetu, vi trovos mian pravecon en la afero.

³⁰ CXu estas peko sur mia lango? CXu mia palato ne komprenas tion, kio estas malbona?