1
Ahrupa chata a palôhrupa ta, “Khazohpa rai y vei,” tah tyh ta. Rao khai haw ei ta, hmo moleina pasi chhihpa tao ei ta; ahy hmahta hmophapa a taopa rai y veih ei.
2
Pahno thaipa ta Khazohpa a tluapa rai ama y tlyma tahpa pahno awpa ta, Khazohpa ta avâ tawhta chyhsa sawzy he za moh ta.
3
Kua khai ha chyu ei ta; pua ngaitapa ta y khai haw ei ta; ahy hmahta hmophapa a taopa rai y veih ei, pakha hmah y veih ei.
4
Hmoparaotuhpa zy chata pahnopa rai hnei veih ei ma? Viahchhâ ama niepa hawhta ei chyhsa zy nie khai ha tyh ei ta, Khazohpa hra cha pado beih veih ei.
5
China rai y leina liana chata chi ngaitapa ta y ei ta! Khazohpa ta tei châ chhuahtuhpa ruzy cha hie patla khai haw tlôh ta; Khazohpa ta âmo cha a thy pathlapa vâta mao paphyusa haw chi ta.
6
Izarel sahlao pachhana cha Zaio tawhta a vaw pua ta mawh sala! Khazohpa ta a chyhsa sei ta ama ypa cha a pakuasa heih tita, cha hnôh lâna chata Zakaw sahlao thaphapa ta y aw ei ta, Izarel sahlao amâ ly aw.
