Zawba 13

¹ “He zydua he ei mo ta hmô haw ta, ei nahkhao ta thei ta no a vâh hra.

² Nâmo pahnopa cha kei chhao ei pahno, kei cha nâmo hlâta nawh via va na.

³ Châhrasala Atotaotheipa hnohna chata ei reih aw, Khazohpa nata pachâ khoh awpa ei byu.

⁴ Nâmo deikua haipa taochhypa châ eichi ta; nama zydua ta patlâhtuhpa phahnai leipa nama châ.

⁵ Phie a chalih thlâh ha tlai u la; sopa nama hlao via aw!

⁶ Ei pachâna zie nahthlie ula, ei hiapa he rie nahthlie teh u.

⁷ Khazohpa chata sia lei ngaitapa ta nama rei aw ma, ano cha nama dôpakhei aw mâ?

⁸ Ano lâta biehneina nama pamosa aw ma, Khazohpa châta tlao namâ duakhei aw ma?

⁹ Cha tlua papua ei sala a pha aw ma? Cha leipa ta chyhsa ta chyhsa hropa a dôpa hawta, ano cha nama dô aw ma?

¹⁰ A ru lâta khokheina nama hnei khiahtala, a cha ra thlyu aw ei na.

¹¹ A rôhnahna chata cha pachisa thlyu va ei ma? Chichhihna nama chôta tla aw vei ma?

¹² Namâ chhypa bieso cha meipaoh dei châ ta, namâ vaihna cha a vaihna beihlei dei châ tlôh.

¹³ “Ei rei theina awpa ta a vaw chalih tua u, ei chô liata khâpa rai cha tlâ vaw tlô se.

¹⁴ Ei sapa he ei hâh ta sie aw na ta, ei hrona he ei ku liata ei soh aw.

¹⁵ Na thie ta; hnabeiseina rai hnei khao va na; châhrasala a hmiakô liata ei lâthlôh cha ei vaih thlâh ha aw.

¹⁶ He he ei pachhana cha châ ta, a hmiakô liata khazoh pahno leipa zy cha a vy thei aw veih ei.

¹⁷ Ei reipa he a phapata ta nahthlie ula, ei phuahpa he nama nahkhao liata a ngia mawh sy.

¹⁸ Atahmâ nahthlie teh u, ei bie paryh pasia haw na ta, thai ei châ aw tahpa ei pahno.

¹⁹ Ahy e na ei tuh awpa a y? Chatanachata a chalih aw na ta ei thi aw.

²⁰ Ei chô liata hmo miano he na pasai la; chatanachata na hmia tawhtapa a nyu aw va na,

²¹ kei tawhtapa na ku la ha la, na chichhihna heta na pachisa khah se.

²² Chatanachata na aw la, ei châ chhy aw; cha leipa ta kei ta reih aw sala, tlao nâ chhy mah y.

²³ Ei hmoparaona zy nata ei moleipa zy khatlu ta hluhpa e a châ? ei paraona nata ei moleina na pahnosa mah y.

²⁴ Khazia e na khakhaipa ta, na hmia na nyu tly?

²⁵ Chhohna a zaw ngâpa chata chapa chisa aw ta, sâhkô raopa cha nâ chadai aw ma?

²⁶ Ei chô liata pasa ngâsâpa ta roh chi ta. ei thyutlia noh hmoparaona cha eina paphaosa chi.

²⁷ Ei pheizy liata keihrai na daih chi ta, ei lâthlôh zydua ngia chi ta; ei pheipazah padôpa ta râhri na pakhâh.

²⁸ Ano cha hmo hmypa hawhta tlâ zao thlâhpa hawhta nata, chysia, chhôma-u ta tlâ a niepa hawh deita ta a châ.