1 Abeizy 9

Дослідження

   

1 Sawlawmaw ta ABEIPA o nata abei o sapa ta a byuh ngaitapa ta a chhuahpa zydua a paloh khai tawhna chata,

2 Kibia liata a hnohta aluahpa hawhna khata ABEIPA cha Sawlawmaw hnohta a vaw luah heih ta.

3 ABEIPA chata a hnohta. “Na thlahchhâna nata na hiana, ei hmiakô liata na tlôkheipa zy kha vaw nahthlie na ta; he o sapa he chhâzaw ta ei moh paysa nawpa ta ei pathaisa haw, ei mokhaoh nata ei pathipalôh cha cha liana chata chhâzaw ta a y ha aw.

4 Chatawhcha nâ chhao he bie ei cha piepa maih hawhta tao awpa ta na paw Davi hawhta pathipalôh pha ngaitapa phaopa nata palôhrupa do ngaitapa phaopa ta ei mohmô liata ypa ta ei bieraopa zy nata ei pachiana zy nâ pyh thlâh ha khiahtala,

5 Izarel zy chô liana heta na khihnarâh abeidyuchhai cha chhâzaw châta ei pa-i aw, na paw Davi hnohta, ‘Izarel zy abeidyuchhai liata atyu awpa chi va chi,’ tahpa ta bie ei vaw taih hawpa hawhna khata.

6 Anodeikuacha nâ ta tlyma, nama pathlazy ta tlyma, eina zipa chi cha na kuasaipa ta, ei biepiepa zy nata ei bieraopa zy ei cha pahnosapa ei he a pyh leipa ta khazoh hropa zy chakaopa ta namâ chhy khiahtala,

7 Izarel sahlao zy he râh ei piepa tawhtapa he pahleipadia aw na ta, he o ei moh châta ei pathaisa haw chiehpa he ei hmô pha leipa lâta ei pasie syulyu aw; chatanachata Izarel zy he pho to zy hry liata taolana nata a chhiena lâta pakhopa ta hmâpa châ aw ei ta.

8 Chatawhcha he o he a sâh kaw hrasala, a sie pakhôpa maih chata noâhpa ta ama hmao tôchie aw ei ta; ‘Khaziama ABEIPA ta he râh nata he o he he tlatlu ta a tao tly?’ ama tah aw.

9 Chatawhcha chyhsa zy ta, ‘ABEIPA ama Khazohpa ama mahpaw zy Izi râh tawhtapa a chhithatuhpa kha siesai ei ta, khazoh hropa zy patu ei ta, a chhy ei ta, ama chakao hawpa vâta a châ; chavâta ABEIPA ta he hmo pha leipa zydua he ama chô liata a vaw patlôsa haw hih,’ tahpa ta amâ chhy aw,” tah ta.

10 Sawlawmaw ta o miano, ABEIPA o nata abei o a sa chhôh kô syno hnôh lâta

11 Tyre beipa Hirama ta Sawlawmaw cha sidy tho zy, meisa tho zy, ngôh zy, a byuhpa mai a tôh khaipa châ ta, Abeipa Sawlawmaw chata Hirama cha Kalili râh liata khih syno pie ta.

12 Châhrasala Hirama cha Tyre tawhta Sawlawmaw ta khih a piepa zy moh awpa ta a pua nota, chazy chata palysa leipa ta.

13 Chavâta ano chata, “Unawh y, he khih eina piepa zy chi he kheihawhpa khih ma a châ tly?” tah ta. Chatanachata atahmâ taihta Kabu râh ama tah haw.

14 Hirama chata abeipa cha ngôh talent za kha nata syno paphao ta.

15 Abei Sawlawmaw ta rai a pahriasapa sahlao a tao chhâna cha he vâ heta a châ, ABEIPA o nata ano o a satuhpa châta nata Milô zy, Zerusale kuh zy, Hazaw khih zy, Mekidô khih zy, Keza khih zy a satuh awpa ta a châ.

16 Izi beipa Phirao cha khy ta Keza khih la ta, mei ta rao ta, cha khih liata a ypa Kana mozy cha thie ta, a sawchanônô Sawlawmaw lahpinô cha a pathliena hmo piepa châta a vaw pie haw;

17 chatawhcha Sawlawmaw ta Keza khih zy, Behôrô mathi via lâ tahpa khih zy,

18 Baala khih zy, Izarel râh liata râhpathohpa liata Tamari khih zy,

19 Sawlawmaw ta hmo so pakhyna khih a hneipa zydua zy, a talaili sona khih zy nata a arâ kiapa chyhsa sona khih zy, Zerusale khih liata zy, Lebanaw liata zy nata a ryureina râh chhôh zydua liata Sawlawmaw ta byuh ngaitapa ta tao a chhuahpa chhôh zydua a tao.

20 Izarel pathlazy a châ hra leipa Amawri mozy, Hiti mozy, Periza mozy, Zebu laibâhpa zydua kha cha,

21 ama pathla cha râhzy liata a ypa, Izarel pathlazy ta ama pahleipadia khai thei leipa zy hry liana chata Sawlawmaw ta sei rai pahriasapa py tao ta, atahmâ taih heta.

22 Izarel pathlazy deikua cha Sawlawmaw ta sei ta tao leipa ta; adyuhpa chyhsa zy, a pawhrâhpa zy, a molaipa zy, a pheisaih hyutuhpa zy, a talaili nata a arâ a kiahpa chyhsa hyutuhpa zy tlao ama châ.

23 Chazy cha Sawlawmaw raihria chô liata hyutuhpa za pangawh nata sypangawh raihria a vaihtuhpa zy cha ama châ.

24 Phirao sawchanônô deikua cha Davi khihpi tawhtapa cha ano o Sawlawmaw ta a sapa lâna chata khy haw ta; chatanachata Milô cha sa haw ta.

25 Sawlawmaw chata ABEIPA châta maisâh a taopa liana chata kô chareih ta ei tho raopa hlâna nata adyhna hlâna hlâ tyh ta, ABEIPA hmiakô liata maisâh liana chata rohpahâhpa zy raopa tyh hra ta. Chatanachata o cha paloh haw ta.

26 Abei Sawlawmaw chata Edôma râh liata Tilaipi Saihpa ngiakâ Elô kiapâh liata a ypa Eziôkeba su liata balyh py tao ta.

27 Chatawhcha Hirama ta a chakaotuhpa balyh chyhsa zy tilaipi liata a y tyhpa, balyh liata Sawlawmaw chakaotuhpa zy sielâh awpa ta tuah ta;

28 cha chyhsa zy cha Ôphaira lâ vawh ei ta, cha liatahpa cha ngôh talent za palih nata syno vaw phaoh ei ta; Abei Sawlawmaw lâta vaw tlôkhei ei ta.