Maka 8

¹ Cha nohzy liana chata zawpi thata a vy pakhy heih ei ta, niepa khâpahmah hnei veih ei, Zisu ta a pachupazy aw ta, ama hnohta,

² “Zawpizy he atahmâ noh thôh tlai ei hnohta y haw ei ta, niepa khâpahmah ama hnei leipa vâta, ei tha eina pasa ei;

³ nie leipa ta ama o lâ ei padisa khiahtala, lâpi liata panao tlôh ei ta, thokhazy cha amâ vyna a hla kaw tlôh ta,” tah ta.

⁴ A pachupazy chata, “Chyhsa ta he râhpathohpa liana heta khataih liata viahchhâ ta e, he zydua chyhsa he ama rih eima pabiesa thei aw,” tahpa ta ano a chhy ei ta.

⁵ Ano chata, “Viahchhâ tlâ khazie e nama hnei?” tahpa ta âmo cha hiahri ta. Âmo chata, “Tlâ sari,” tah ei ta.

⁶ Chatawhcha zawpizy cha alei liata patyusa ta; viahchhâ tlâ sari cha la ta, alyna bie a rei khai nahta, ei chheih ta, a pachupazy hnohta zawpizy rai awpa ta pie ta; âmo chata zawpizy cha tô ei ta.

⁷ Chatawhcha nga dipa a chyhta hnei hra ei ta; ano chata byhnâ aw ta, cha chhao cha ama hmiakô liata tô awpa ta pie ta.

⁸ Chatanachata nie ei ta, ama rih bie khai chyu ta; ama nie laibâhpa a zôpa chhao cha hrâbyh hmo sari a biepa ta amâ huah.

⁹ Chatawhcha a niepa zydua cha sâh palih rachhôh ama châ.’

¹⁰ Chatawhcha âmo cha pasiesa ta; balyh liana chata a pachupazy chhaota thlai kiah ei ta. Dal-manutha râh cha a ngia ei ta.

¹¹ Pharisaizy vaw pua ei ta, Zisu pasiapa awpa ta, ano liata avâ tawhta ngiana tluapa ta ano cha ei ei ta.

¹² Ano chata a palôhrupa ta thata a rôh ta, “Khazia e atahmâ ta thyutliazy heta ngiana ama tlua? Hmeihseihta ta, ei cha chho ei chuh, atahmâ ta thyutliazy hnohna heta ngiana rai piepa châ aw vei,” tah ta.

¹³ Chatawhcha âmo cha siesai ta, balyh liata kiah heih ta, haosâ lâ chaka ha ta.

¹⁴ A pachupazy chata viahchhâ a chei awpa my haw ei ta; balyh liana cha viahchhâ tlâ kha dei leipa cha a hropa rai hnei veih ei.

¹⁵ Chatawhcha ano chata ama hnohta, “Pharisaizy thinô nata Herawda thinô liana chata a vaih ula, a chado teh u,” tah ta.

¹⁶ Chatawhcha âmo chata, “Viahchha hnei ma pi,” tahpa ta reih ei ta.

¹⁷ Zisu ta cha cha pahno ta ama hnohta, “Khazia e viahchhâ nama hnei leipa kyh cha nama reih ngâ tly? Atahmâ taih pahno thai to veih eichi ma? Nama pathipalôh cha a kuhchha haw ma?

¹⁸ Mo hnei eichi ta hmô veih eichi ma, nahkhao hnei eichi ta thei veih eichi ma? Pahno thlâh ha veih eichi ma?

¹⁹ Sâh pangawh hryta viahchhâ tlâ pangawh ei pachhai nona khata, nama nie laibâhpa kha hrâbyh hmo khazie namâ huah khâ?” tah ta. Chatawhcha âmo chata, “Hmo hrawhleino,” tah ei ta.

²⁰ “Cha khiahtala chyhsa sâh palih hryta, viahchhâ tlâ sari ei pachhaih nona khata a laibâhpa khazie e namâ huah?” tah ta. Chatawhcha âmo chata, “Hmo sari,” tah ei ta.

²¹ Ano chata ama hnohta, “A pachâna pahno thai to veih eichi mâ?” tah ta.

²² Besaida khih cha vaw tlô ei ta. A hnohta mochaopa a vaw chhi ei ta, ano hria awpa ta a haw ei ta.

²³ Chatawhcha ano chata mochaopa ku cha patu ta, khih tawhta puakhei ta; a mo liata a pachih pachhao ta, a chô liata a ku a pazawh khai nahta, “Khâpa chhâ na hmô thei ma?” tahpa ta hiahri ta.

²⁴ Chyhsa cha kaw ua ta, “Chyhsa hmô na ta; tho a pasiepasâ ngâpa hawhta ei hmô,” tah ta.

²⁵ A mo liana chata a ku pazawh heih ta; ano cha moh thlâh ha ta, a vaw tlâ haw, ato a sia ngâsâpa ta a hmô thei haw.

²⁶ Zisu chata, “Khih liata a ngia khah y,” tahpa ta o lâta padisa ha ta.

²⁷ Zisu nata a pachupazy cha pua ei ta, Kaisaria Philipi khih lâta sie ei ta; ama sie laih nota a pachupazy hnohta, “Chyhsazy ta ahy a châ eina tah ei?” tahpa ta hiahri ta.

²⁸ Âmo chata, “Bâtituhpa Zawhana a châ, cha tah ei ta; a hropazy ta, Elaiza a châ, cha tah ei ta; thokhazy ta hrohsopa ahy tlyma a châ, ama cha tah,” tahpa ta chho ei ta.

²⁹ Chatawhcha ano chata ama hnohta, “Cha khiahtala nâmo zaw ahy a châ eina tah ei chi?” tahpa ta hiahri ta. Pity chata a hnohta, “Mesiah cha na châ,” tahpa ta a chhy ta.

³⁰ Ano chata a thâtih ahyhmah chho lei awpa ta bie pie ta.

³¹ Chyhsa Sawchapawpa chata hmo hluhpi pasa a tao awpazy, machâzy, theihthaipa abeizy, Ryhpa pachutuhpazy khoh leipa ta a y awpa zy, thiepa ta a y awpa zy, noh thôh khai tawhta a thyu heih awpa zy cha, âmo pachu pathao ha ta.

³² Cha bie cha a sia ngâsâpa ta reih ta. Pity chata a chhi nano ta, ra ta.

³³ Anodeikua cha a vaw heih ta, a pachupazy moh ta. “Sâtâ, ei hnôh lâta sie teh! Khazohpa hmozy pachâ leipa ta, chyhsapa hmozy tlao na pachâ via he,” tahpa ta Pity ra ta.

³⁴ Zawpi cha a pachupazy chhaota aw ta ama hnohta, “Ahyrai ta eina zi khoh khiahtala, rietheina a papeisa leipa ta, a kraws pupa ta na zi mawh sy.

³⁵ Ahyrai a hro a pabohsa khohpa maihta pahlei aw ta; ahyrai keima vâta nata thâtihpha vâta a hro a pahleipa maih a pabohsa aw.

³⁶ Chyhsa ta khizaw he a pôhpa ta hnei sala, a hro pahlei sala a châta khâpa e a phahnai aw?

³⁷ Chyhsa ta a hrona vyuhpa ta khâpa a pie thei aw?

³⁸ Ahyrai he thyutlia apheipa nata moleipa chhâ chô liana heta, keima nata ei biezy a zakheipa maih cha, ano cha Chyhsa Sawchapawpa heta a Paw rôhnahna nata vâlyuhchâpa pathaihpazy chhaota a zu tita a zakhei hra aw,” tah ta.;