Theihthaina 22

¹ ABEIPA ta Mawsi chho ta.

² Arawna nata a sawchapawpazy hnohta reih la, Izarel pathlazy hmo pathaihpa ei châta ama hlâpa liana zy chata, a panano mawh sy, ei moh pathaihpa ama pachhie lei nawpata: Kei he ABEIPA cha, châ na ta.

³ Ama hnohta, ‘Nama chhâzy liata, nama pathla zydua ta ABEIPA châta ama hlâpa hmo pathaihpa a vaw hniapa maih cha, kei tawhtapa pathluapa ta a y awpa a châ: Kei he ABEIPA cha ei châ.

⁴ Arawna pathla ahyrai aphawhpa tlyma, khâpaleipa a lohpa tlyma chata, a pathaih hlâ lei cha hmo pathaihpazy hry liata a nie awpa châ vei. Ahyrai athihpa papuapaleipa tlyma, chi a puapa tlyma a hriapa maihzy.

⁵ ahyrai âmo a papuapalei theipa alyhthaipa rai tlyma, pathaih leina a kiah theipa a hneipa chyhsa tlyma, a hriapa maihzy.

⁶ cha hawhpa a hriatuhpa cha zâlâ taihta pathaih leipa châ aw ta, ti liata a ngai a si leipa khiahtala hmo pathaihpazy hry liatahpa cha a nie awpa châ vei.

⁷ No a tla nahta a pathaih ha aw; cha khai tawhna chata hmo pathaihpazy hry liatahpa cha a nie thei aw, a nie awpa a châpa vâta.

⁸ A papuapalei awpata ano kho ta a thipa tlyma, sa taipa tlyma, a nie awpa châ vei: Kei he ABEIPA cha ei châ.

⁹ Chavâta ei bie piepa cha a pyh awpa a châ, chata leipatala ama pachhiepahru khiahtala a moleipa maoh cha phaoh aw ei ta, ama thi aw: Kei he ABEIPA âmo a pathaituhpa châ tlôh na ta.

¹⁰ Râh hropa chyhsa ta hmo pathaihpa cha ama nie awpa châ vei. Theihthaipa hnohta a ypa tlyma, hlaopa tlyma chata hmo pathaihpa cha ama nie awpa châ vei.

¹¹ anodeikuacha theihthaipa ta ahy tlyma ano sôh ta a chalei khiahtala, cha chyhsa chata a nie thei aw; chatawhcha a o liata a pihpazy chata a nie awpa cha ama nie hra aw.

¹² Theihthaipa sawchanônô ta râh hropa chyhsa a hnei khiahtala, hiepa hlâna hmo pathaihpazy hry liatahpa cha a nie awpa châ vei.

¹³ Anodeikuacha theihthaipa sawchanônô cha saw hnei leipata, nôhmeipa ta tlyma, mapa ta tlyma ypa ta, a paw o lâ a kua heih khiahtala a laihsa no hawhna khata a paw nie awpa cha a nie heih hra aw; châhrasala râh hropa chyhsa chata ama nie awpa châ vei.

¹⁴ Chyhsa ta pahno leipa ta hmo pathaihpa cha a nie khiahtala, a su pangawh ta pachhaih ta, su kha cha baichha aw ta, hmo pathaihpa cha theihthaipa a pie awpa a châ.

¹⁵ Ama hmo pathaihpazy niepa chata thailei châna a tlôkheipatuhpa hmo paraona maoh cha a paphaosa awpata,

¹⁶ Izarel pathlazy hmo pathaihpa ABEIPA lâta ama hlâpazy cha ama pachhiepahru awpa châ leipa ta: Kei he ABEIPA âmo a pathaituhpa cha, châ tlôh na ta, tah teh,” tahpa ta.

¹⁷ ABEIPA ta Mawsi chho ta.

¹⁸ Arawna nata a sawchapawpazy nata Izarel pathla zydua chho la, ama hnohta, Izarel chhôhkha hry liatahpa tlyma, Izarelzy hry liata a ypa râh hropa chyhsa tlyma, ahyrai ama hmohlâpa raopa hlâna ABEIPA lâta ama hlâpa ama bietaipa tlyma, ama lôhthai ta hmohlâpa tlyma, a hlâpa maih chata.

¹⁹ a chhy tlâh nama châ thei nawpata viahchao tlyma, mietahkupa tlyma, mie tlyma, a chapawhpa seina a hnei leipa nama hlâ awpa a châ.

²⁰ Seina a hneipa rai nama hlâ awpa châ vei, nama châta a pyhpa tlâh châ tlôh leipa aw ta.

²¹ Ahyrai bietai paki nawpa tlyma, âmo lôhthai ta hmohlâpata tlyma, dyhna hlâna atheihna a sahroh zaw hry liatahpa tlyma, a mietahkupa zaw hry liatahpa tlyma, ABEIPA lâta a hlâpa maih chata a pyh tlâh a châ thei nawpata, seina a hnei leipa a hlâ awpa châ ta; seina a hneina rai a y awpa châ vei.

²² A mochaopa zy, a ru tliepa zy, a sypa zy, hmah a phaohpa zy, hmahchhiepa a hneipa zy, aphawhpa zy cha ABEIPA lâta nama hlâ awpa châ leipa ta, mei ta hmohlâpata ABEIPA lâta nama hlâ awpa châ vei.

²³ Âmo lôhthai ta hmohlâpa liana chata viahchao tôhpa tlyma, mietahkupa taw tlyma, a ku phei a sei tupa tlyma, a chyu tupa tlyma rai hlâ thei aw eichi ta; bietaina châta a pyhpa awpa châ vei.

²⁴ A tihmô thi padôpa tlyma, chhuchheipa tlyma, pakeipa tlyma, lyupa tlyma cha ABEIPA lâta nama hlâ awpa châ leipa ta; nama râh liana heta, cha hawhpa cha atheihna ta nama hmâh awpa châ hra vei.

²⁵ râh hropa chyhsa tawhta lapa ta, chazy hry liatahpa rai cha nama Khazohpa niepa tovyuh ta nama hlâ awpa châ vei, chazy liata raona nata reipasipasuana a ypa vâna chata a pyhpa theipa châ aw vei, tah teh,” tahpa ta.

²⁶ Chatawhcha ABEIPA ta Mawsi chho ta.

²⁷ Viahchao tôhpa tlyma, mietahkupa tlyma, mie tlyma a vaw pataw nahta a panô hnohta noh sari a y awpa a châ, noh charie noh tawhta cha hnôh lâna chata ABEIPA châta mei ta hmohlâpa ta a pyh theipa a châ aw.

²⁸ Viahchao panô tlyma, mietahkupa panô tlyma, a taw chhaota noh khata nama thie awpa châ vei.

²⁹ Alyna bie reina atheihna a theihpa ta ABEIPA lâta namâ theih tita, a chhy tlâh nama châ thei nawpa ta namâ theih awpa a châ.

³⁰ Cha noh liana chata nie khai awpa châ ta, a mylâ taihta khâpahmah nama soh awpa châ vei: Kei he ABEIPA cha ei châ.

³¹ Chavâta ei biepiepazy he a pyhpa ta nama zyh awpa a châ: Kei he ABEIPA cha ei châ.

³² Ei moh pathaihpa he nama pachhie awpa châ leipa ta, Izarel pathlazy hry liata palyupalihpa ta ei y awpa a châ; Kei he nâmo cha palyupalihtuhpa nama Khazohpa châ awpa t.

³³ Izi râh tawhtapa châ chhithatuhpa cha ei châ: Kei he ABEIPA cha ei châ,” tahpa ta.