Zawhana 13

¹ Zawpakhô kyhchhi hlâta, Zisu ta he khizaw he puasaipa ta Paw lâ a sie daihti a tlô haw tahpa pahno ta, ano chyhsa khizaw liata a ypa kyh a pachâ tyhpazy cha, a chhâna taih chhaota ama kyh pachâ ta.

² Chatawhcha zâpati nie nota, cha hlâ chhaota ahripa ta Saimaw sawchapawpa Zuda Iskari cha Zisu patusa awpa a palôhrupa ta pachâsa ta.

³ Zisu ta Paw ta a ku liata hmo to a pavaosapa zy, Khazohpa tawhta a vaw puapa a châpa zy, Khazohpa lâta a sie heih awpa zy pahno thlâh hana chôta,

⁴ zâpati a dopa cha thyu ta, a pohzy soh ta, ahruna poh la ta, a sai ta.

⁵ Chatawhcha rahô liata ti patlai ta, pachupazy phei pasi pathao ta, ahruna poh a saipa chata hru lymâ ta.

⁶ Saimaw Pity lâ a vy ta; ano chata, “Abeipa, nâ ngâsâ ta ei phei na pasi aw ma?” tah ta.

⁷ Zisu ta a hnohta, “Ei hmotaopa he atahmâ pahno va chi, châhrasala noh hro na pahno aw,” tah ta a chhy ta.

⁸ Pity ta a hnohta, “Ei phei pasi chacheita aw va chi,” tah ta. Zisu ta a hnohta, “Ei cha pasi vei khiahtala, kei liata khâpahma topa hnei aw va chi,” tah ta.

⁹ Saimaw Pity ta a hnohta, “Abeipa, chata a châ khiahtala ei phei dei châ leipa ta, ei ku nata ei luh chhao sy!” tah ta.

¹⁰ Zisu ta a hnohta, “Ngaisi chiehpa cha phei leipa ta cha pasi byuh vei, a pathaih thlâh ha mâ tâh; nâmo nama pathaih na, nama zydua ta deikua châ vei,” tah ta.

¹¹ A patusatuh awpa cha pahno tlôh ta; chavâta, “Nama zydua ta pathaih veih eichi,” a tah.

¹² Zisu ta ama phei pasi khai tawhta, a pohzy la ta, a thyu heih nahta ama hnohta, “Nama chô liata ei hmotaopa he khâpa tahna ma a châ nama pahno ma?

¹³ Nâmo ta Pachutuhpa nata Abeipa eina tah tyh eichi; nama reipa â do na, châ tlai na ta.

¹⁴ Kei, nama Beipa nata Pachutuhpa hmahta nama phei ei pasi khiahtala, nâmo chhaota nama phei namâ pasipa awpa a châ.

¹⁵ Nama chôta ei taopa hawhna heta, nâmo chhaota nama tao hra nawpa ta ei cha pamosapa châ tlôh ta.

¹⁶ Hmeiseihta ta, hmeiseihta ta, ei cha chho ei chuh, sei a zibeipa hlâta lai via vei; lyuhchâpa chhao a tuahtuhpa hlâta lai via hra vei.

¹⁷ Cha hmozy cha nama pahno khiahtala, tao ula nama nohlao aw.

¹⁸ Nama zydua kyh reih va na; ei tlypazy cha ei pahno; châhrasala cha cha, ‘Ei viahchhâ a nietuhpa ta a phei chakopa ei chôta a hy,’ tahpa, Khazohpa châ bie kha a vaw tlô thei nawpa ta.

¹⁹ Atahmâ tawhta a vaw tlô hlâta, ei cha chho ei hih, a vaw tlô tita keima ano ei châ tahpa namâ ngiapâ thei nawpa ta.

²⁰ Hmeiseihta ta, hmeiseihta ta, ei cha chho ei chuh, ahyrai ei tuapa maih alypa cha, keima nâ lypa a châ, ahyrai kei nâ lypa cha nâ tuahtuhpa alypa a châ,” tah ta.

²¹ Zisu ta cha hawhta a rei khai nahta, a palôhrupa ta a nôpo ta, “Hmeiseihta ta, hmeiseihta ta, ei cha chho ei chuh, nama hryta mo pakha ta eina patusa aw,” tahpa ta pahnosa ta.

²² Pachupazy chata pahno leipa ei ta, âmosasyh ta a moh ei ta;

²³ pachupazy hryta pakha Zisu ta a kyh a pachâpa cha tlâhkhai kâ lâta Zisu kiapâh liata a hniehpa ta y ta.

²⁴ Saimaw Pity ta cha hnohna chata, ‘Ahy kyh ma a reih, maniah chho tua,” tahpa ta thlihthlâh ta.

²⁵ Chatawhcha ano cha a yna ualua ta y ta, Zisu chachôhna a hniehpa ta a vaw heih ta a hnohta, “Abeipa, ahy maw?” tah ta.

²⁶ Zisu ta, “Viahchhâ tlaw nypa ta ei piepa cha a châ aw,” tah ta a chhy ta. Chatanachata viahchhâ tlaw cha a ny khai nahta, la ta, Saimaw sawchapawpa Zuda Iskari pie ta.

²⁷ Chatawhcha viahchhâ tlaw cha a pie tawhna chata a chhôh liata Sâtâ a ngia pâ ha ta. Zisu ta a hnohta, “Na tao awpa cha tao parah teh,” tah ta.

²⁸ Chatawhcha tlâhkhai kâ lâtahpazy chata ahyhmah ta kheihtazie ta a tahpa ma a châ tahpa pahno veih ei.

²⁹ Thokha ta Zuda chata tâkâ sahria a vaopa vâta Zisu ta, “Kyhchhi châta hmo eima byuhpa maih chalei teh,” a tah tlyma; sipasapazy hnohta khâpaleipa pie awpa a tah tlyma ama tah.

³⁰ Chatawhcha ano chata viahchhâ tlaw cha la ta, thlai pua pâ ha ta.

³¹ Zuda a pua tawhta, Zisu ta reih ta, “Atahmâ cha Chyhsa Sawchapawpa parônahsapa ta a y haw, ano vâta Khazohpa chhao parônahsapa ta a y,

³² ano liana chata Khazohpa cha parônahsapa ta a y ha khiahtala, Khazohpa ta anosasyh liana chata ano cha a parônahsa aw, thlai a parônahsa aw.

³³ Sawnawh saih u, buakhata nama hnohta ei y chy. Nâmo ta eina tlua aw ei chi; chatawhcha Zuzy hnohta, ‘Ei siena awpa lâ a vy thei aw vei ei chi tahpa, ei reipa hawhna khata, atahmâ cha hawhna hra chata nama hnohta ei reih.

³⁴ Biepiepa thiehpa ei cha pie ei hih, kyh a pachâ rairieh ula; kei ta nama kyh ei pachâpa hawhna heta, nâmo chhao kyh a pachâ rairieh teh u.

³⁵ Nama kyh namâ pachâ rairieh khiahtala, chyhsa zydua ta ei pachupazy nama châpa cha liana chata ama pahno aw,” tah ta.

³⁶ Saimaw Pity ta a hnohta, “Abeipa, khataih lâ na sie aw?” tah ta. Zisu ta, “Ei siena awpa la, nâma ta atahmâ na zi thei aw va chi; noh hrota deikua cha eina zi aw chi,” tah ta a chhy ta.

³⁷ Pity ta a hnohta, “Abeipa y, khazia atahmâ chhao ei cha zi thei aw vei? Nâma vâta ei hro ei thy aw,” tah ta.

³⁸ Zisu ta, “Keima vâta na hro na thy aw mâ? Hmeiseihta ta, hmeiseihta ta, ei cha chho, nâma ta ei thôh einâ papha hlâ lei chi cha, awh khoh aw vei,’ tah ta.;