1
Chatanachata Shuhi chyhsa Bilda chata a chhy ta:
2
“Khachâ e bie ryhpaopa na tlua aw? Pachâ la, cha khai tawhna chata eima reih aw.
3
Kheihta zie e sahroh hawhta pachâpa eima châ? Na mohmô ta eima hru ngâsâ ha ma?
4
Na hiehâhpa ta nâmasasyh ta a chaphie chi ta, nâma vâta alei he siesaipa châ aw ta, alôpanô chhao he a su tawhta pasiepa a châ aw ma?
5
“Hmoparaotuhpa khaihna cha pachhaihpa a châ aw, a meipalei chhao khaih aw vei.
6
A poh-o liata khaihna zoh aw ta, a chôta mei-ôh cha pachhaipa a châ aw.
7
A keih chakâna thatlôna a cha-ie aw ta, ano ryhraona tlai chata a thy pathla aw.
8
Ano phei tlaita sao liata thy pathla aw ta, khoheih chô liata a sie aw.
9
Khoheih chata a phei ngavâh hmaothy liata a ao aw ta, ano cha khoheih chata a patu aw.
10
Ano chata alei liata heibawh pakawpa ta y ta, a lâpi liata khoheih chôpa a châ hra.
11
Ki to liata chichhihna ta pachisa aw ta, tlypa lymâpa ta a chadai aw.
12
A thatlôna panao aw ta, a kiapâh liata paona cha âmâ thlâh ha ta.
13
A pasa hri chata a vopa zy nie khai aw ta, thina saw tuapa ta a pachiapa zy a nie khai aw.
14
A ngâna poh-o tawhtapa phia pathlapa châ aw ta, chichhihpa abei lâna cha chhihthapa a châ aw.
15
A chyhsa châ beih leipa zy cha a poh-o liata pahrâ aw ei ta, a pahrâna liata kaih hie patlapa a châ aw.
16
A thari a chhôh lâtahpa taih rao aw ta, a chô lâta. a chiahzy raohpa ta a y hra aw.
17
A pahnona alei tawhtapa lei aw ta, o thliah liata chhao a moh hnei khao vei.
18
Ano cha khaihna tawhtapa zohna liata topa ta châ aw ta, khizaw tawhtapa chhao a chadaipaipa a châ aw.
19
A chyhsa zy hry liata tu nata saw hnei khao aw vei, a pahrâna liana cha ahy hmah ta hroh khao aw veih ei.
20
Notla lâta chyhsa zy ta a vâchhiena ama thei nahta, noâh tah aw ei ta, nochhi lâta chyhsa zy ta ama chi ngâsâ aw.
21
Khazoh hnei leipa chyhsa tovyuh cha cha hawhta a châ aw, cha cha Khazohpa a pahno leipa zy su cha a châ,” tah ta.
