Ezekiel 1

¹ Kô sythôhna, thla palihna, cha thla noh pangawhna liana chata, Keba chavah kiapâ ta atâhpazy hry liata ei y nona chata, avâ a pahy ta, Khazohpa aluahnazy hmô na ta.

² Cha thla noh pangawhna liata, cha cha Abei Zehôiakina seichâna kô pangawhna châ ta,

³ Kaldia râh liata Keba chavah kiapâh ta Buzi sawchapawpa theihthaipa Ezekiel hnohna chata ABEIPA bie cha vaw tlô ta, ABEIPA ku cha a chô liata y ta.

⁴ Cha ei mo no ta, maw lâ tawhta thlihpi ru ngaitapa vaw pua ta, meihdo chhakalupa a ia ngâpa a chheipâh zydua phu a khaih hapa amei chhôh liah liata a pathliepa hawhta a ypa châ ta.

⁵ Chatawhcha cha hry tawhta hmohrohneipa miapalih alyupa vaw pua ei ta. Amâ lânazie cha he hawhna heta a châ: chyhsapa lyuna hnei ei ta,

⁶ hmia sâpalih hnei chyu ei ta, mathlaw sâpalih hnei chyu hra ei ta.

⁷ Ama pheizy cha patlâh ta, ama pheipazah rylâ cha viahchao taw pheipazah hawhta châ ta; dawh pathlie ngaitapa hawhta pathlie ta.

⁸ Ama kâ lâ bao palih liata, ama mathlaw ry liana chata chyhsapa ku hawhpa he hnei ei ta. Âmo papalih ta ama hmia nata ama mathlawzy cha he hawhna heta a châ:

⁹ ama mathlawzy cha apazao lymâpa ta, ama sie nota chhao a pahie beih leipa ei ta, ama dady ta a siepa ama châ chyu.

¹⁰ Ama hmia ta a lyupazy cha chyhsa hmia hawhta châ ta, ama papalih chata ama chachâh lâchhâhta chakeibarôhneipa hmia phaoh ei ta, ama papalih chata ama chavei lâchhâh viahchao tôhpa hmia hawhta phaoh ei ta, ama papalih chata pahmô hmia hawhta phaoh hra ei ta.

¹¹ Ama hmiazy cha hawhna cha châ ta. Chatawhcha ama mathlawzy cha pakai ei ta, ama mathlaw miano chata pakaipa ta pazao chyu ei ta, miano ta ama pôhpa khu ei ta.

¹² A hmia lâchhâ ta sie chyu ei ta, thlahpa siena la awpa liana chata sie ei ta, ama sie nota chhao a pahie beih veih ei.

¹³ Ama lânazie ta hmohrohneipazy ama lyu chaipa cha lôiatheipa kâ ngâpa hawhna he châ ta, meirei hawh tlaita a châ, hmohrohneipazy hry liana chata kiah tyh chô tyh ta; mei cha khaih ngaita ta mei tawhna chata dôhla vaw pathlie ngâ kaw ta.

¹⁴ Chatawhcha hmohrohneipazy cha dôhla pathliepa hawhna tlai chata a râ hrei ei ta.

¹⁵ Hmohrohneipazy ei mo no ta, hmohrohneipazy kiapâh liana chata ama hmia sâpalihzy chata alei liata talaili phei miakha lymâ ta hmô na ta.

¹⁶ Talaili phei nata a pielyunazie cha: bery lô hawh tlaita a lâ ta; miapalih ta alâna zie miakha hnei ei ta, ama lânazie nata ama pielyuzie cha talaili phei miakha chhôh liata talaili phei hropa a ypa hawhta a châ.

¹⁷ Ama sie nota cha ama kâ lâ miapalih ta ama sie thei, ama sie nota chhao a pahie beih veih ei.

¹⁸ Ama talaili phei a hlôhpa tlâhzy cha a sâh ngaitapa nata rarôh y ngaitapa a châ; ama miapalih chata a hlôhpa tlâhzy cha mohzy ta a bipa hnei ei ta.

¹⁹ Chatawhcha hmohrohneipazy cha ama sie nota ama kiapâh liata talaili pheizy cha sie tyh ei ta; hmohrohneipazy cha alei tawhta chalopa ta ama y nata talaili pheizy cha chalopa ta y tyh hra ta.

²⁰ Thlahpa siena lâ awpa maih ta sie ei ta, cha lâna chata thlahpa cha sie awpa châ ta; talaili pheizy cha ama kiapâh ta chalopa ta y ei ta, hmohrohneipa thlahpa cha talaili pheizy liana chata y tlôh ta.

²¹ Chazy ama sie nona chata hezy he sie ei ta; chazy ama duah nona chata hezy he a duah ei ta; chazy alei tawhta chalopa ta ama y nona chata talaili pheizy cha ama hnohta chalopa ta y ei ta; hmohrohneipazy thlahpa cha talaili pheizy liana chata y tlôh ta.

²² Hmohrohneipzy luh chô liana chata avâ khuna alyupa y ta, dâhaw pasohpa hawhta pathliepa rarôhy ngaitapa ama luh chô liata pakai ta.

²³ Chatawhcha vadô ry liana chata ama mathlaw bao kha cha hmohrohneipa hropazy hriapa ta pakai ta; ama mathlaw bao kha heih chata ama pôhpa khu ei ta.

²⁴ Chatawhcha amâ zaw nona chata ama mathlaw pyu cha ti hluhpi pyu hawhta, Atotaotheipa ao hawh tlaita, zawpi pyu paro ngâpa pheisaih sahlao pyu hawhna tlai heta thei na ta; amâ vaw dua nona chata ama mathlaw cha pazi ei ta,

²⁵ Chatawhcha ama luh chô liata avâ khuna chô liana khata ao vaw y ta: amâ dua nona chata ama mathlaw cha pazi ei ta.

²⁶ Chatawhcha ama luh chô liata avâ khuna liana khata abeidyuchhai alyupa, saphai lô hawhna tlaita a lâpa y ta, abeidyuchhai alyupa chô liana chata chyhsapa hawh tlaita a lâpa y ta.

²⁷ Chatawhcha a chai tawhta a chô lâ a lânazie cha dawh pathliepa hawh tlaita, mei hawhna tlai heta a châpa ta hmô na ta; a chai tawhta a ry lâ a lânazie cha mei hawhna tlai he a châpa ta hmô na ta, a chheipâh phu khaih ha ta.

²⁸ Vâsua nota meihdo liata meisakupa a luahnazie hawhna tlai heta a châpa ta hmô na ta, a chheipâh phu khaih ha ta. He he ABEIPA rôhnahna aluahnazie hawhpa cha a châ. Chatawhcha ei hmô nota a khu lâta pao na ta, bie reipa ao cha thei na ta.