2 Samuel 7

¹ Abei cha a o liata y ta, ABEIPA ta ama chheipâh liata a khakhaipa zydua tawhtapa thlahlôhpa ta a paysa tawhna chata,

² abei chata hrohsopa Natha hnohta, “Keima cha sidy tho o liata pahrâ na ta, Khazohpa Byh deikua cha poh-o liata y ta,” tah ta.

³ Natha chata abei hnohta, “Na palôhrupa liata a ypa hawh tlaita tao teh; ABEIPA na hnohta a y mâ tâh,” tah ta.

⁴ Châhrasala cha zâ lilaw liana chata Natha hnohta,

⁵ “Ei chakaotuhpa Davi cha kei chho teh, ABEIPA chata he tana heta a tah, ‘Ei yna awpa ta nâma ta o eina sapa aw chi ma?

⁶ Izarel pathlazy Izi râh tawhtapa ei chhihtha no tawhta atahmâ taihta o liata y leipa na ta, poh-o liata nata achhyna byureih liata tlao y lymâ tyh na ta.

⁷ Izarel pathla zydua hry liata ei siena maih liata chhao ei chyhsa Izarel zy pasa awpa ta bie ei piepa ryureituhpa zy hnohta, “Khazia sidy tho ta o eina sapa veih eichi,” tahpa ta ei reih beih ma?’

⁸ Chavâta ei chakaotuhpa Davi hnohta, ‘Pheisaih zy ABEIPA chata he tana heta a tah. mietahkupa bâna su na mietahkupa vaihpa tawhtapa cha ei chyhsa Izarel mozy chô liata hyutuhpa châta cha lana ta;

⁹ na siena maih liata na hnohta y lymâna ta, na hmiakô liata na khakhaipa zy pahlei lymâ na ta; alei liata chyhsa rôhnah ngaitapa zy, moh rôhnah ngaitapa ta ei cha tao aw.

¹⁰ Chatawhcha ei chyhsa Izarel châta su rao aw na ta, âmo ei su liata ypa ta ama pasi khao lei awpa ta âmo chalo aw na ta; hmialâ hawhna khata moleina sawzy tâ ama rie pathei khao leipa aw ei ta,

¹¹ ei chyhsa Izarel zy chô liata ryureituhpa zy ei rao no hawhna kha, cha khao hra aw vei; chatawhcha na khakhaipa zydua tawhtapa he ei cha pahâsa aw. Cha leipa chhaota ABEIPA ta chhôhkhapa chata a cha paduapa aw tahpa a cha chho.

¹² Na noh a kipa ta na mahpaw zy hnohta nâ mô tina chata, na hnôh lâta na pathla na chhi liata a pathei awpa cha padua aw na ta, a khihnarâh cha ei pa-i aw.

¹³ Ano chata ei moh châta o sa aw ta, a khihnarâh abeidyuchhai cha chhâzaw châta ei pa-i aw.

¹⁴ A paw châ aw na ta, ano cha ei sawchapawpa châ aw ta. Hmo a parao khiahtala chyhsapa chôhchahrei nata chyhsapa sawzy tuna ta chhorei aw na ta;

¹⁵ châhrasala na hmiakô tawhta ei soh hapa Sawla tawhta ei lapa hawhna khata ei zawngiahna chata ano la siesai aw vei.

¹⁶ Chatawhcha ei hmiakô liata na chhôhkha nata na khihnarâh cha chhâzaw ta khâchâ pa-ipa châ aw ta; na beidyuchhai cha chhâzaw ta pa-ipa a châ aw,’ a tah,” tahpa ta ABEIPA bie vaw tlô ta.

¹⁷ Cha bie zydua lymâ hawhta nata cha aluahna hawhna tlai chata Natha ta Davi hnohta reih ta.

¹⁸ Chatanachata Abei Davi cha angia ta, ABEIPA hmiakô liata a tyuh ta, Hy Abeipa KHAZOHPA y, ahyma châ na ta, ei chhôhkha zy chhao ahyma châ ei ta, he taihta einâ chhi chi?

¹⁹ Hy Abeipa KHAZOHPA y, chazy chhao cha na mohmô liata cha hmo chyhpa ta châ ta; châhrasala na chakaotuhpa cha chhôhkha yzie nawpa kyh cha kô hluhpi chhôh châta vaw reih haw hra chi ta, hy Abeipa KHAZOHPA y, hezy chhao he chyhsapa zy tahzie haw hra ta châ ta!

²⁰ Davi heta nâ lâta khapa e a reih hlei aw? Na chakaotuhpa he pahno khai tlôh chi, hy Abeipa KHAZOHPA y!

²¹ Na chakaotuhpa pahno awpa ta na bie vâta nata nama pathipalôh lymâ hawhta he hmo rôhnah ngaitapa zy he tao haw chi ta.

²² Chavâta hy ABEIPA Khazopa y, nâ cha na rôhnah na; eima nah ta eima theina zie ta nâma hawhpa rai y leipa ei ta, nâma leipa ta cha Khazohpa rai y hra veih ei.

²³ Khazohpa ta ano chyhsa zy châta â vaw tlyhpa Izi râh tawhtapa nata pho to nata ama Khazohpa tawhtapa na châta nâ tlypa na chyhsa zy hmiakô liata nâma châta hmo rôhnah ngaitapa nata na râh châta hmo chichhi ngaitapa tao awpa nata ano moh rôhnah ngaitapa tao awpa ta na chysa Izarel zy hawhpa rai he khizaw liana heta pho hropa ahy e a y?

²⁴ Chatanachata na chyhsa Izarel zy cha chhâzaw ta na chyhsa ama vaw châ thei nawpa ta na châta pa-i haw chi ta; ABEIPA nâ cha Khazohpa vaw châ haw chi ta.

²⁵ Chatanachata hy ABEIPA Khazohpa y, na chakaotuhpa kyh nata a chhôhkhapa zy kyh na reipa cha chhâzaw châta pa-i la, na rei hawpa hawhna khata tao mah y;

²⁶ ‘Pheisaih zy ABEIPA cha Izarel zy Khazohpa a châ,’ tahpa ta na moh cha chhâzaw ta palyupalihpa ta y mawh sy, na chakaotuhpa Davi chhôhkhapa zy na hmiakô liata pa-ipa ta ama y aw.

²⁷ Hy Pheisaih zy ABEIPA Izarel Khazohpa y, na chakaotuhpa hnohta, ‘Chhôhkha ei cha paduapa aw,’ tahpa ta phuah haw tlôh chi ta, chavâta na chakaotuhpa chata he thlahchhâna he nâ lâta a tlôkhei ngâ.

²⁸ Hy Abeipa KHAZOHPA y, nâ cha Khazohpa châ chi ta, na bie cha hmeihseihpa châ ta. he hmo phapa he, na chakaotuhpa lâta taih haw chi ta;

²⁹ chavâta na chakaotuhpa chhôhkha zy cha na hmiakô liata chhâzaw ta ama y thlâh ha thei nawpa ta byhnâ pie mah y; hy Abeipa KHAZOHPA y, nâ chata reih haw tlôh chi ta, na byhnâ ta na chakaotuhpa chhôhkha zy cha chhâzaw ta byhnâ piepa ta y mawh sy,” tah ta.