2 Samuel 1

¹ Davi cha Amale mo kei pahnie ta, a vaw kua tawhta Zikla khih liata noh no y ta,

² a noh thôh nohna chata Sawla a thi ha tawhta chyhsa pakha ama riehmo tawhtapa a pohzy hriepa ta a luh liata alei â hlaopa he a vy ta. Davi lâta a vaw tlô nahta alei liata akhupa ta a naoh ta.

³ Davi chata a hnohta, “Khataih tawhta â vypa e na châ?” tah ta. Ano ta a hnohta “Izarel mozy riehmo tawhta ei vaw râ,” tah ta.

⁴ Davi chata a hnohta, “Kheihta e hmo yzie? Na chho tua,” tah ta. Ano chata, “Adyuhna tawhta chyhsa zy cha a râpai ei ta, chyhsa hluhpi pao ei ta, thi ei ta; Sawla nata a sawchapawpa Zawnatha chhao kha ama thie hra,” tah ta.

⁵ Chatawhcha Davi chata a chhotuhpa satlia hnohna chata, “Kheihta e, Sawla nata a sawchapawpa Zawnatha cha ama thie tahpa na pahno?” tah ta.

⁶ A chhotuhpa satlia chata, “Kheihtazie ta tlyma Kilbô Tlâh liata vaw y na ta; Sawla cha a asei hniepa ta â duapa hmô na ta; talailih zy nata arâ a kiahpa chyhsa zy chata a vaw hnia ei ta.

⁷ Chatawhcha a hnôh lâ a vaw heih ta, na vaw hmô ta, na vaw aw ta. Chatawhcha kei ta, ‘He liata ei y,’ tahpa ta a chhy na ta.

⁸ Chatawhcha ei hnohta, Ahy e na châ?’ na tah ta. Chatawhcha kei ta, Amale chyhsa ei châ,’ tahpa ta a chhy na ta.

⁹ Ano chata ei hnohta, ‘Ei kiapâh liana heta a vaw duah la, na vaw thie tua; hroh thlâh ha tlôh na ta, nôpona ta na tla thlu tlôh ta,’ tah ta.

¹⁰ Chatanachata a kiapâh liata a duah na ta, cha hawhta liahsa a pao tawhna cha hroh thei aw vei tahpa ei pahnopa vâta thie na ta; a luh liata beilakho nata a bâh liata lâkyu cha la na ta ei zibeipa lâta he liana heta ei vaw cheih,” tah ta."

¹¹ Davi ta Hebraw liata Zudah chizy chô liata ryu a vaw reihna cha kô sari nata thla charu châ haw ta.

¹² Sawla nata a sawchapawpa Zawnatha nata ABEIPA chyhsa zy nata Izarel chhôhkhapa zy chata mâchhiesa ei ta, chakhei ei ta, zâlâ taihta nie leipa ta y ei ta, zaozi ta thiepa ama châ hawpa vâta.

¹³ Chatawhcha Davi chata a chhotuhpa satlia hnohna chata, “Khataih lâta chyhsa e na châ?” tah ta. Ano chata, “Râh hropa chyhsa Amale chyhsa sawchapawpa ei châ,” tah ta, a chhy ta.

¹⁴ Davi chata a hnohta, “ABEIPA sathaw thupa pahleipadia awpa ta a chô liata ku pathlapa cha kheihta zie ta a chi leipa e na châ?” tah ta.

¹⁵ Chatanachata Davi chata satliapa pakha aw ta. “A kei hnia la, thie teh,” tah ta. Chatawhcha chhawh ta, thie haw ta.

¹⁶ Davi chata a hnohta, “Na thisaih cha nâma luh chô tlai liata y mawh sy; nâma pakah tlaita, ‘ABEIPA sathaw thupa cha ei thie,’ tahpa ta cha phuah tlôh ta,” tah ta.

¹⁷ Davi chata Sawla nata a sawchapawpa Zawnatha cha he chaphôh heta chakhei ta,

¹⁸ chatawhcha châtai kana hla cha Zudah pathlazy pachu awpa ta bie pie ta, Zasa Châbu liata ropa a châ.

¹⁹ Hy Izarel, na rôhnahna cha na su sâhpa zy liata thie ei ta! Molaipa zy ama pao haw hih!

²⁰ Katha lâna cha chho leipa ula. Askelaw othliah zy liana cha phuah khah u, chata leipata la Philistina sawchanô zy aly aw ei ta, chopawtai leipa sawchanô zy thaphapa ta ama awh pathlei awh na.

²¹ Nâmo Kilbô tlâh zy saih u, nama chô liata diati nata vâsua tla khah se; hmohlâ awpa zy papua hra kha se! Cha liana chata molaipa vyhphao cha pasichhihpa ta thy tlôh ei ta. Sawla vyphao, sathaw thu leipa chyhsa vyhphao hawh tlai ta.

²² Thiepa zy thisaih tawhta nata moleipa thaw tawhta, Zawnatha libaw cha kua leipa ta, Sawla zaozi cha khâpa hrao leipa ta kua beih vei.

²³ Sawla nata Zawnatha hrozie cha kho a chhih ta, a ngia ta! Ama thipa chhaota a chhaih veih ei, pahmôpi hlâta chatlie via ei ta, chakeibarôhneipa zy hlâta ama tha a tlô via.

²⁴ Nâmo Izarel sawchanôzy saih u, Sawla cha chakhei teh u, poh saipa a ngiapa zy cha pabu ei ta, nama pohzy liata ngôh ta pangiana zy cha tobituhpa châ.

²⁵ Adyuh locho ta molaipa zy ama pao hawhpa rimâ cha! Na su sâhpa zy liata Zawnatha ama thie haw.

²⁶ Ei unawhpa Zawnatha, na kyh liana heta ei nô a po na; ei chô liata pha ngaita tyh chi ta, kyh eina pachâna chi cha noâh a chhih ta, chanô kyhpachâna a khô.

²⁷ “Molaipa zy pao ei ta, Adyuhna chhaichhi zy chhao a leidia khai haw!”